අද (13) පැවති පක්ෂ නායක රැස්වීමේ දී අග්රාමාත්ය රනිල් වික්රමසිංහට එරෙහි ඉතා ප්රබල විරෝධයක් මතු වී ඇත.
ජනාධිපතිවරයා තවමත් ඉල්ලා අස් වී නැති පසුබිමක් තුළ ජනාධිපතිවරයාට පෙර අගමැතිවරයා ධුරයෙන් ඉල්ලා අස්විය යුතු බවත් එසේ ඉල්ලා අස්නොවන්නේ නම් ඔහු ධුරයෙන් ඉවත් කරන ලෙසත් අද පැවැති පක්ෂ නායක රැස්වීමේදී පක්ෂ නායකයන් කථානායකවරයාගෙන් ඉල්ලා තිබේ.
මෙම පක්ෂ නායක රැස්වීමට අගමැතිවරයා සහභාගීව සිට නැති අතර පොදුවේ පක්ෂ නායකයන් තීරණය කර ඇත්තේ අගමැතිවරයා ජනාධිපතිවරයා ඉල්ලා අස්වීමට පෙර ඉවත් විය යුතු බවටය.
අද දහවල් පවතින ආරක්ෂක තත්ත්වය පිළිබඳව සාකච්ඡා කිරීම සඳහා අගමැතිවරයාත් කථානායකවරයාත් ත්රිවිධ හමුදාපතිවරුන් පොලිස්පති සමග ආරක්ෂක මාණ්ඩලික ප්රධානී ශවෙන්ද්ර සිල්වා සහභාගී වූ සාකච්ඡාවක දිගුවක් ලෙස මෙම පක්ෂ නායක රැස්විම පැවති අතර ඊට ත්රිවිධ හමුදාපතිවරුන් පොලිස්පතිවරයා සහ ආරක්ෂක මාණ්ඩලික ප්රධානියාද සහභාගී වීම විශේෂත්වයකි.
මෙම රැස්වීමේදී පාර්ලිමේන්තුවේ ආරක්ෂාව පිළිබඳවද කතා බහට ලක්ව ඇති අතර එම ස්ථානයට අරගලකරුවන් පැමිණියහොත් ගන්නා පියවර කවරේද යන්න ආරකෂක ප්රධානීන් පක්ෂ නායකයන්ගෙන් විමසා ඇත.
එහිදි ඔවුන් ප්රකාශ කර ඇත්තේ මේ සම්බන්ධයෙන් රජයෙන් විමසා කටයුතු කළ යුතු බවය. මෙහිදී අරගල කරුවන් මර්ධනය සඳහා ජීව උන්ඩ භාවිතා නොකරන්නැයි පක්ෂ නායකයින් ආරක්ෂ අංශවලින් ඉල්ලිමක් කර ඇත.
කෙසේ වෙතත් මෙම රැස්වීමට සහභාගී නොවූ රනිල් වික්රමසිංහ සිය මාධ්ය කාර්යාලය හරහා නිවේදනයක් නිකුත් කරමින් පවසා ඇත්තේ සර්වපාක්ෂික ආණ්ඩුවක් පිහිටුවීමට ආණ්ඩුපක්ෂය හා විපක්ෂය යන දෙපාර්ශවය පිලිගන්නා අග්රාමාත්යවරයකු නම් කරන ලෙස තමන් කතානායක මහින්ද යපා අබේවර්ධන වෙත දැනුම් දි ඇති බවය.
පසුගිය (11) වනදා අග්රාමාත්ය කාර්යාලය දි අමාත්ය මණ්ඩලයේ අමාත්යවරුන් සමඟ පැවති සාකච්ඡාවේදී සහභාගී වූ සියලුම අමාත්යවරුන්ගේ අදහස වූයේ සර්ව පාක්ෂික රජයක් පිහිටුවීමට එකඟත්වයක් ඇතිවූ වහාම, එම රජයට වගකීම් භාර දීමට තමන් සූදානම් බව යැයි ද එම නිවේදනයේ දැක්වේ..
