මනම්පිටිය නිමල් ජයරත්න –
-
පොහොර කුඩු නිසා පොහොර ඉසින ගොවීන්ගේ ශරීරත් වන වෙනවා… පොහොර තොග යළි කැඳවූ බව ජාතික පොහොර ලේකම් කාර්යාලය කියයි!
මෙවර මහ කන්නයේ තමන්ට ලැබුණු යූරියා පොහොර, කුඩුකර, පව්ඩර් ලෙස ලබාදුන් පොහොර හේතුවෙන් දැඩි අසීරුතාවට පත්ව ඇති බව පොලොන්නරුව ප්රදේශ ගණනාවක ගොවීහු සඳහන් කරති,
පවතින දේශගුණික තත්වය හේතුවෙන් නැව් මගින් පොහොර ගෙන ඒමේදී සහ එම පොහොර ගබඩා කර තැබීමේදී පැවති අධික සීතලත් සමග පොහොර විශාල කැට බවට පත්ව තිබූ බවත්, සමාගම මගින් එම පොහොර කුඩුකර ගොවීන්ට ලබාදී ඇති බවත් ඔවුහු කීහ.
දැන් තමන්ට ඇති බරපතලම ගැටලුව වන්නේ කැට වෙනුවට තමන්ට ලැබුණු යූරියා පොහොර කුඩු ගොයමට යෙදීමට ප්රායෝගිකව ඇති අපහසුතාවය බව ගොවීහු ලංකාසර සමග අදහස් දක්වමින් කීහ.
“ මේ යූරියා පිටි ඉහින්න බෑ… හුළඟෙ යනවා. ගොයමට හා පසට, ගොයමේ මූල මණ්ඩලයට, කොහොම උරා ගනීද කියලා තවම කියන්න බෑ…“ බවද පොලොන්නරුව ඇතුළු මහවැලි බී කලාපයේ ගොවීහු කීහ.,
මහවැලි බී කලාපයේ සේනපුර කොට්ඨාස ගොවි සංවිධාන සභාපති කපිල සිරිල් පතිරණ සඳහන් කළේ සේනපුර කොට්ටාසයේ ගොවීන් විසින් වගාකර ඇති ගොයමට දින 35ක් පමණ ගතව ඇති බවත්, පොහොර යෙදීමට ප්රමාද වී ඇති බවත්ය. ඒ අතරේ ලැබුණු යූරියා පොහොරද පිටි බවට පත් කරදීම හේතුවෙන් තම ගොවි සංවිධානයේ විශාල ගොවීන් පිරිසක් දැඩි අසීරුතාවට පත්ව ඇති බවත් ඔහු කීවේය.
“යූරියා පොහොර මිටියක් සඳහා එක් ගොවියකු රුපියල් 10,000 බැගින් රජයට ගෙවා තිබෙනවා. යූරියා පොහොර වෙනුවට කුඩු ලැබුණෙ. මේ පොහොර මිටියක් අක්කරයකට යෙදීමට බෑ. ඉසින කුඩු පොහොර ගොයමට නොවැටී, සුළඟට විසිර යනවා. නියමිත ආකාරයට පොහොර යොදාගන්න බෑ… අපි ගොඩක් අසරණයි.“ කපිල සිරිල් පතිරණ සඳහන් කළේය.
මෙම තත්ත්වය සැලකිල්ලට ගෙන ගොවීන්ට ලබාදුන් එම පිටි පොහොර යළි, රජයට ලබාගෙන ඒවා බඩ ඉරිඟු සහ වෙනත් බෝග වලට යෙදීමට කටයුතු කරන ලෙසත්, තමන්ට වී වගාව සඳහා ඉසීමට ප්රමිතියෙන් යුතු යූරියා පොහොර ලබාදෙන ලෙසත් කොට්ඨාස ගොවි සංසංවිධාන සභාපතිවරයා රජයෙන් ඉල්ලීමක් කළේය.
පොළොන්නරුව සේවාගම ගොවි මධ්යස්ථාන මඟින්, වැවේතැන්න, ලක්ෂ උයන, කාලිංගඇල, සිංහපුර, ඕනෑගම ප්රදේශවල ගොවීන්ට ලබාදුන් යූරියා පොහොර ද පවුඩර් බවට පත් වී ඇති බැවින් ඒවාද ගොයමට ඉසීමට නුසුදුසු තත්වයේ පවතින බව එම ගොවීහු සඳහන් කරති.
මහවැලි බී කලාපය ව්යාපාර කමිටුවේ හිටපු ලේකම් සරත් රාජපක්ෂ මහතා සඳහන් කළේ අරලගංවිල 503 කලාපයේද ගොවීන් රැ සකට එම පවුඩර් යූරියා පොහොර ලැබී ඇති බවය.
එම පොහොර ගොයමට යෙදීමේදී ශරීරයට පැමිණ දැවටීම නිසා ශරීරය හම තුවාල වීමට පටන්ගෙන ඇති බවත්, මේ පිළිබඳව වහාම පරීක්ෂණයක් සිදුකර කඩිනම් විසඳුම් ගන්නා ලෙසත් ඔහු ඉල්ලා සිටියේය.
අප මේ පිළිබඳව පොහොර ලේකම් කාර්යාලයේ පොළොන්නරු දිස්ත්රික් සහකාර අධ්යක්ෂ, විමල් කුමාරගෙන් දුරකථනයෙන් කළ විමසීමකදී ඔහු සඳහන් කළේ, මීට දින කිහිපයකට පෙර දෙවන අදියරේ ලැබුණු පොහොර අධික සීතල හේතුවෙන් ගල්ගැසී තිබූ බවත්, එම පොහොර කුඩුකර දීමට කටයුතු කළද එහි ප්රමිතියේ අඩුවක් නොවන බවත්ය.
ලියද්දේ වතුර අඟලක් පමණ රඳවා තිබීමෙන් එම පොහොර ඉසීමෙන් එතරම් ගැටලුවක් නොවන බවත් ඔහු කීවේය.
මෙවර ජාතික පොහොර ලේකම් කාර්යාලය මැදිහත්වීමෙන් පොහොර නොගෙන්වු බවත්, ගොවීන්ට කෙලින්ම අමාත්යාංශය මැදිහත් වී එම පොහොර මෙරටට ගෙන්වා ඇති බවත්, එලෙස පොළොන්නරුවට ගෙන්වන ලද පොහොර සීතල වී 50% ක් පමණ ගල්ගැසී තිබුණු බවත් ඔහු කිවේය.
ගොවීන්ට ලබාදුන් එම පොහොර නැවත ගෙන්වා ගැනීමට උපදෙස් ලබාදුන් බවත් විමල් කුමාර කීවේය.
