-
මම සමන් ඒකනායක පෞද්ගලිකව හඳුනනවා… ඔහු සමඟ වැඩ කර තිබෙනවා… ඔහු අතිශය අවංක, ඉහළ වෘත්තීය මට්ටමක සහිත රාජ්ය නිලධාරියෙක්… මේ ආණ්ඩුව රාජ්ය සේවය විනාශ කරමින් වෘත්තියකින් වෙනුවට පක්ෂයේ කාඩරයින් යොදවනවා…. චන්ද්රිකා පවසයි…
වත්මන් රජය සුදුසුකම් හා පළපුරුද්ද නොසලකා හරිමින් පක්ෂ හිතවතුන් රාජ්ය සේවයට බඳවා ගැනීම හරහා ශ්රී ලංකාවේ ඉතිරිව පවතින රාජ්ය පරිපාලන ව්යුහය ද විනාශ කරමින් සිටින බවට හිටපු ජනාධිපතිනි චන්ද්රිකා බණ්ඩාරනායක කුමාරතුංග මහත්මිය චෝදනා කරයි.
තම නිල ෆේස්බුක් ගිණුමේ සටහනක් තබමින් ඇය අවධාරණය කරන්නේ, දේශපාලන පළපුරුද්දක් නොමැති නායකයින් බලයට පත්වන අවස්ථාවකදී වෘත්තීය මට්ටමේ නිලධාරීන් මත විශ්වාසය තැබීම අත්යවශ්ය කරුණක් වුවද, වත්මන් පාලනය එම මූලධර්මය උල්ලංඝනය කරමින් සිටින බවයි.
එම සටහනේ සිංහල අදහස මෙසේය.
ශ්රී ලංකා රාජ්යයේ පැවැත්මේ පදනමටම බලපාන බරපතළ ගැටලුවක් පිළිබඳව සාකච්ඡා කෙරෙන, ‘pulseline.lk’ වෙබ් අඩවියේ පල කරනු ලැබූ ‘Vox Civis’ විසින් රචිත ‘යුක්තිය තෝරාගත් පිරිසකට පමණක් සීමා වන විට’ (When Justice becomes Selective) නම් විශිෂ්ට ලිපියෙහි උපුටා ගැනීම් පළ කිරීමට මම තීරණය කළෙමි.
ඉතා කල්පනාකාරීව සහ දක්ෂ ලෙස රචිත මෙම ලිපියෙහි අන්තර්ගත අදහස් සමඟ මම කිසිදු පැකිලීමකින් තොරව එකඟ වෙමි. මම සමන් ඒකනායක මහතාව පෞද්ගලිකව හඳුනන අතර ඔහු සමඟ වැඩ කර ඇත්තෙමි. ඔහු අතිශය අවංක, ඉහළ වෘත්තීය මට්ටමක පවතින රාජ්ය නිලධාරියෙකි.
වෘත්තීයභාවයෙන් සපිරි, කාර්යක්ෂම සහ අවංක රාජ්ය සේවයකින් තොරව රජයකට ක්රියාත්මක විය නොහැකිය. දේශපාලන නායකයන් සතුව වසර ගණනාවක අත්දැකීම් හෝ වෘත්තීය ප්රවීණතාවයක් නොතිබුණ ද, ඔවුන් සතුව නොසැලෙන අවංකභාවයක් (Integrity) තිබිය යුතුය. ක්රියාකාරී ප්රජාතන්ත්රවාදී පාලනයක් තුළ, රට පාලනය කිරීම සඳහා දේශපාලන නායකයන් වෘත්තීය මට්ටමේ රාජ්ය සේවයක් මත විශ්වාසය තබයි.
නමුත් වත්මන් රජය උත්සාහ කරමින් සිටින්නේ, අපේ රටේ ඉතිරිව පවතින රාජ්ය සේවය ද විනාශ කර, ඒ වෙනුවට සුදුසුකම් හා පළපුරුද්දක් නොමැති පක්ෂ සාමාජිකයන් සහ හිතවතුන් ඒ සඳහා පත් කිරීමට බව පෙනී යයි.
මෙරට පාලන ක්රමය ඇද වැටී ඇති බිහිසුණු තත්ත්වය ශ්රී ලාංකික ජනතාව වටහා ගත් නිසාම ‘අරගලය’ නිර්මාණය විය. අපේ රටේ පුරවැසියන් අතර පවතින දේශපාලන දැනුවත්භාවය ඉතා ඉහළ මට්ටමක පවතී.
දශක දෙකක කාලයක් තිස්සේ පැවති අයහපත් පාලනය නිසා සිදු වූ විනාශයෙන් අපේ රට අද බැටකමින් සිටී. වත්මන් පාලන රටාව වෙනස් නොවන්නේ නම්, රට සම්පූර්ණ අරාජිකත්වයකට ඇද වැටීම වැළැක්විය නොහැක. ‘Vox Civis’ පවසන පරිදි මෙයට විසඳුම ඇත්තේ ජනතාව අතේය යන කරුණ සමඟ මම පූර්ණ ලෙස එකඟ වෙමි. ජනතාව ප්රශ්න කළ යුතුය; මෙහි පවතින බරපතළ ප්රතිවිපාක වටහා ගත යුතුය. අපගේ ශ්රේෂ්ඨ ජාතිය නැවත ගොඩනඟන්නේ කෙසේද යන්න පිළිබඳව ප්රජාතන්ත්රවාදීව තීරණය කළ යුත්තේ ඔවුන්ය.”
චන්ද්රිකාගේ එෆ් බී සටහන පහත දැක්වේ.
