අසේල කුරුළුවංශ –
මුහුණේ ලප කැලල් සඳහා ප්රතිකාර ගැනීමට පැමිණි තරුණියකට අතවර කළ බව කියන සිද්ධියක් සම්බන්ධයෙන් මහනුවර පේරාදෙණිය මාර්ගයේ පිහිටි පෞද්ගලික වෛද්ය ප්රතිකාර මධ්යස්ථානයක පුද්ගලයෙකු මහනුවර ළමා හා කාන්තා කාර්යාංශය මගින් අත්අඩංගුවට ගෙන තිබේ.
තරුණිය අද (13) පස්වරුවේ තම මුහුණේ ලප කැළැල් සඳහා ප්රතිකාර ලබා ගැනීම සඳහා වෛද්ය මධ්යස්ථානයට ගොස් තිබෙන බව ඇය විසින් කළ පැමිණිල්ලේ සඳහන් වේ.
ඒ සඳහා වෛද්යවරයෙකු ප්රතිකාර ලබා දීමෙන් පසු ඇයට දැනුම්දී තිබෙන්නේ ඒ වෙනුවෙන් රුපියල් 35000 ක මුදලක් ගෙවන ලෙසය.
එම අවස්ථාවේ තමන් සතුව රුපියල් 20000 ක මුදලක් පමණක් තිබීම නිසා තරුණිය එය ලබා දීමෙන් පසු ඉල්ලා ඇත්තේ ඉතිරි මුදල පසුව ලබා දීමට අවස්ථාවක් ලබාදෙන ලෙසය.
එම අවස්ථාවේ ඇය අසලට පැමිණි වෛද්ය ප්රතිකාර මධ්යස්ථානයේ පරිපාලකයෙකු යැයි කියන පුදගලයෙකු තරුණියට රුපියල් 5000 ක විශේෂ මුදල් අඩු කිරීමක්ද සිදුකොට ඉතිරි රුපියල් 10000 ක මුදල පමණක් පසුව ගෙවීමට අවස්ථාව ලබාදිය හැකි බව පවසා තිබේ.
තමාද වෛද්ය වෘත්තියට සම්බන්ධ අයෙකු බව පවසා තරුණියගේ ශරීරය පරීක්ෂා කර ඇති එම පුදගලයා තවත් ලප කැළැල් ඇති බැවින් ඒවා ඉවත් කළ යුතු බව තරුණියට දැනුම් දී ඇත.
පළමුව ඇගේ පාද ද අනතුරුව පිට හා පපු ප්රදේශය ද පරීක්ෂා කරන මුවාවෙන් ඔහු ශරීරය ස්පර්ශ කරමින් අතවරයක් කළ බව පැමිණිල්ලේ සඳහන් වේ. තරුණිය කළ පැමිණිල්ලට අනුව පරීක්ෂණ පැවැත්වූ පොලීසිය සැකකරු කැඳවා ප්රකාශයක් සටහන් කර ගැනීමෙන් පසු අත්අඩංගුවට ගෙන තිබේ.
මහනුවර කොට්ඨාස භාර ජ්යෙෂ්ඨ පොලිස් අධිකාරි අනුරුද්ධ බණ්ඩාර හක්මන ගේ උපදෙස් මත මහනුවර පොලිස් මූලස්ථානාධිපති ප්රධාන පොලිස් පරීක්ෂක රසික සම්පත් ගේ මෙහෙයවීමෙන් සිද්ධිය පිළිබඳ වැඩිදුර පරීක්ෂණ පැවැත්වේ.
