ලලිත් චාමින්ද –
යක්කලමුල්ල මාගෙදර කලුවලගල කුරුදුවාඩියක් තුළ පසුගිය 19 දා සිදුවූ වෙඩිතැබීමකදී සිව් හැවිරිදි දරුවෙක් තුවාල ලැබුවේය. වෙඩි වැදී තිබුණේ දරුවාගේ උදරයටය.
රණේපුර හේවගේ අනුත් සත්සර නැමැති සිඟිත්තා අතිශය අසාධ්ය තත්ත්වයෙන් කරාපිටිය රෝහලට ඇතුළත් කළේය. ඔහුට බරපතල සැත්කමක් කෙරිනි. අනතුරුව ඔහු දැඩි සත්කාර ඒකකයට ඇතුළත් කළේය. එහෙත් වෛද්යවරුන්ගේ සියලුම උත්සාහයන් ව්යර්ථ කරමින් පොඩි එකා අද (30) උදේ මෙළොව හැර ගියේය.
ඒ දරුපැටියාගේ සියා එස් ගුණරත්නය. ගුණරත්න දැන් වේදනාවෙන් තෝන්තු වී ය. තම මුණුපුරාගේ වියෝවය දරාගත නොහැකිව හැඬු කඳුලින් ඔහු අප සමග කතා බහට එක් විය.
“ඒ වෙලාවෙ කුරුඳු වාඩිය ඇතුළෙ මාත් හිටියා. දරුවා හිටියෙ දෙයියනේ මගෙ ලඟ.“
“අපි කිසිම දෙයක් දන්නෙ නෑ. මොනව ද උනේ කියලා හිතාගන්න බෑ. අපි ලඟට අඳුනන්නෙ නැති දෙන්නෙක් ආව. අතේ තුවක්කුවක් තිබුණා.“
“මට ඇහුනෙ මෙච්චරයි. “මේ ඉන්නෙ“ කියන වචනෙ.“
“ඊට පස්සේ කුරුඳු තලාගෙන හිටපු මනුස්සයට වෙඩි තියන්න ගත්තා එක දිගට.“
“එහෙම තියනකොට උන්ගෙ වෙඩි උණ්ඩයක් දරුවටත් වැදුනා. දරුවට වෙඩි වැදුන ගමන් ලේ පැන්නා… මම කෑ ගහලා දරුවා මගෙ අත් දෙකට ගත්තා. අරගෙන ඇහුවා බුදු මහත්තයෝ මොකද මේ කරන්නෙ කියලා… කෑ ගහලා ඇහුවා. “
“උන් දෙන්න බලන්නෙවත් නැතිව ගියා. ලේ පෙරාගෙන දරුවා අරන් ඉස්පිරිතාලෙට ගියෙ. දොස්තර මහත්තුරු කිව්වා ඒ වෙලාවෙත් දරුවා ඉන්නෙ අවදානමේ කියලා.“
“අනේ මේ කිරිස්පපයා මොනවා දන්නව ද?. වෙඩි තියපු උන්ට වැරදීමක්… ඒත් මේ අසරණයගෙ ජීවිතේ… අනේ කිසිම දරුවෙකුට මේ වගේ දෙයක් වෙන්න එපා. “
“අපේ දරු පැටවුන්ට කරදරයක් නැතිව ඉන්න ඕන. මේවගේ අපරාධ නැත්තටම නැතිවෙන්න ඕන…“ ඔහු කීවේය.
