මැතිවරණ කාලයක් ආසන්න වෙත්ම බුදුවරු, බෝසත්වරු යැයි කියාගත් පුද්ගලයින් මතුවන ස්වරූපයක් රටේ දක්නට ලැබෙන බවත් මේවාට මුලා නොවී ජනතාව නිවැරදි මාවතට යොමු කිරීම සඳහා මහා සංඝරත්නයට සුවිශාල කාර්යභාරයක් පැවරෙන බවත් අස්ගිරි පාර්ශවයේ මහානායක අතිපූජ්ය වරකාගොඩ ශ්රී ඤාණරතන මහානායක ස්වාමින්ද්රයන් වහන්සේ පවසති.
පසුගිය කාල වකවානුව දෙස බැලීමේ දී මේ ආකාර එක් එක් උවදුරු මැතිවරණ කාලයක් ආසන්න වනවිට රට පාත්වන ස්වරූපයක් දක්නට ලැබෙන්නේ යැයි ද උන්වහන්සේ කියති.
පොල්ගොල්ල බෝධිමල්කඩ විහාරස්ථාන දහම් පාසලේ අධ්යාපනය ලබන සිසු සිසුවියන්ට පාසල් පොත් බෙදා දීමේ වැඩසටහනකට ඊයේ (28) පස්වරුව එක් වෙමින් මහ නාහිමියෝ මේ බව පැවසූහ.
භික්ෂූන් වහන්සේ නිර්දය ලෙස විවේචනය කරමින් උන්වහන්සේලාට නොයෙක් ආකාරයෙන් අපහාස කිරීමේ වැඩපිළිවෙළක් රටේ ක්රියාත්මක වෙමින් තිබෙන බව කී නාහිමියෝ බෞද්ධ ජනතාව ඒ සම්බන්ධවත් අවධානයෙන් පසුවිය යුතු බව උන්වහන්සේ දැනුම් දුන්හ.
මේ සමාජ විරෝධී ක්රියාවන් හි නිරත බහුතරයක් දෙනා දහම් අධ්යාපනයක් තබා භික්ෂු ඇසුරක් නොලැබූ අය බව ද උන්වහන්සේ පැවසූහ.
මෙම අවස්ථාවට අස්ගිරි පාර්ශවයේ කාරක සංඝ සභික මුරුද්දෙණියේ ධම්මරතන, ලියන්වල ශාසනරතන යන හිමිවරු ද සහභාගි වූහ
