මාතර බන්ධනාගාරයේ ගොඩනැගිල්ලක් මතට බෝ අත්තක් කඩා වැටීම නිසා බරපතල තුවාල ලැබ දැඩි සත්කාර ඒකකයේ ප්රතිකාර ගනිමින් සිටි රැඳවියා අද (03) අළුයම ජීවිතක්ෂයට පත් වූයේය.
මෙලෙස මිය ගොස් ඇත්තේ දික් කසාද නඩුවක නඩත්තු නොගෙවීම නිසා මාස 10ක සිරදඬුවමක් විඳමින් සිටි දෙවිනුවර ප්රදේශයේ පදිංචි 43 හැවිරිදි පුද්ගලයෙකි.
පෙරේදා (01) රාත්රියේ 10.15ට පමණ සිදුවූ මෙම අනතුරින් එදිනම එක් රැඳෙවියෙක් මියගියේය. එසේ මිය ගොස් තිබුණේ මත්ද්රව්ය චෝදනා මත මාස 2ක සිර දඬුවමක් විඳිමින් සිටි මාතර මිදිගම තුර්කි ගම්මනයේ පදිංචි 34 හැවිරිදි පුද්ගලයෙකි. අද මිය ගියේ එම අනතුරින් තුවාල ලද දෙවැනි රැඳවියා ය.
බන්ධනාගාරයේ ජී සහ එෆ් වාට්ටු මතට බෝ අත්ත කඩා වැටී එම අනතුර සිදුවන අවස්ථාවේ දී එම ගොඩනැගිල්ල තුළ රැඳවියන් 100ක් පමණ රඳවා තිබිණි.
අනතුරෙන් රැදවියන් 12 දෙනෙකු තුවාල ලැබූ අතර, ඔවුන් සියලු දෙනා මාතර මහ රෝහලට ඇතුළත් කරනු ලැබීය.
අනතුරින් මරණ දෙකක් සිදුවිය. තුවාල ලැබූ 07 දෙනෙක් යළි බන්ධනාගාරය වෙත රැගෙන ආවේය. තවත් රැඳවියෝ තිදෙනෙක් මාතර රෝහලේ ප්රතිකාර ලබති.
