හිටපු අමාත්යවරුන් වන මහින්දානන්ද අලුත්ගමගේ සහ නලින් ප්රනාන්දු විසින් දඩුවමට එරෙහිව අභියාචනයක් ඉදිරිපත් කර ඇති නිසා තමන්ව ඇප මත මුදා හරින ලෙස ඉල්ලා ගොනු කළ ඇප ඉල්ලීම් ප්රතික්ෂේප කිරීමට කොළඹ ස්ථිර ත්රිපුද්ගල මහාධිකරණ විනිසුරු මඩුල්ල නියම කර තිබේ.
ප්රියන්ත ලියනගේ, විරාජ් වීරසූරිය සහ පී.එම්.ටී. බන්ඩාරගෙන් සමන්විත ත්රිපුද්ගල මහාධිකරණ විනිසුරු මඩුල්ලක් විසින් මෙම නියෝගය ප්රකාශයට පත් කර ඇත.
තීන්දුව ප්රකාශයට පත් කරමින් විනිසුරු මඩුල්ල සඳහන් කළේ, අධිකරණය මගින් වරදකරු කළ විත්තිකරුවකු අභියාචනයට යටත්ව ඇප ඉල්ලීමේ දී සුවිශේෂී කරුණු ඉදිරිපත් කිරීම අත්යවශ්ය බවය.
එහෙත් මෙම විත්තිකරුවන් ඉදිරිපත් කළ කරුණු ඇප දීමට තරම් සුවිශේෂී කරුණු නොවන බැවින් ඔවුන්ගේ ඇප ඉල්ලීම් ප්රතික්ෂේප කරන බව විනිසුරු මඩුල්ල සිය තීන්දුව ප්රකාශයට පත් කරමින් සඳහන් කර තිබේ.
2015 වසරේ පැවැති ජනාධිපතිවරණ සමයේ එවක ජනාධිපති අපේක්ෂක මහින්ද රාජපක්ෂ ගේ දේශපාලන කාර්යාලවලට බෙදා හැරීම සඳහා සතොස ආයතනය හරහා කැරම් බෝඩ් 14,000ක් සහ දාම් ලෑලි 11,000ක් ආනයනය කිරීම තුළින් රජයට රුපියල් මිලියන 53කට ආසන්න පාඩුවක් සිදු කළේ යැයි චෝදනා කරමින් ඉකුත් හිටපු ක්රීඩා අමාත්ය මහින්දානන්ද අලුත්ගමගේ සහ නලින් ප්රනාන්දු යන අයට එරෙහිව අල්ලස් කොමිසම විසින් කොළඹ ස්ථිර ත්රිපුද්ගල මහාධිකරණ විනිසුරු මඩුල්ල ඉදිරියේ නඩු පවරනු ලැබීය.
දීර්ඝ නඩු විභාගයකින් අනතුරුව එම චෝදනාවලට වරදකරු කළ මහින්දානන්ද අලුත්ගමගේ ට බරපතළ වැඩ සහිත වසර 20ක සිර දඬුවම් සහ නලින් ප්රනාන්දුට බරපතළ වැඩ සහිත වසර 25ක සිර දඬුවම් එම අධිකරණය විසින් නියම කළේය.
එම දඩුවම්වලට එරෙහිව විත්තිකරුවන් සිය නීතිඥවරු මාර්ගයෙන් ශ්රේෂ්ඨාධිකරණයට අභියාචනා ඉදිරිපත් කර තිබේ.
එම අභියාචනා විභාග කර අවසන් තීන්දුවක් ප්රකාශයට පත් කරන තුරු තමන්ව ඇප මත මුදා හරින ලෙස ඉල්ලා මහින්දානන්ද අලුත්ගමගේ සහ නලින් ප්රනාන්දු යන විත්තිකරුවන් දෙදෙනා සිය නීතිඥවරු මාර්ගයෙන් මෙම ඇප ඉල්ලීම් ඉදිරිපත් කර තිබුණි. ( අද දෙරණ )
