මනම්පිටිය නිමල් ජයරත්න –
මත්ද්රව්ය සම්බන්ධව අධිකරණයෙන් වරදකරුවන් වී වැලිකන්ද සේනපුර පුනරුත්ථාපන මධ්යස්ථානයේ වසරක කාලයක් වෘත්තීය පුහුණුව ලබන රැඳවියන් සමාජයට අත්යාවශ්ය පුද්ගලයින් කිරීම සඳහා ගලවා ගැනීමේ සේවකයෙක් ලෙස පුහුණුව ලබා දෙන බව පුනරුත්ථාපන කොමසාරිස් ජෙනරාල් මේජර් ජෙනරාල් දර්ශන හෙට්ටිආරච්චි පැවසීය.
වැලිකන්ද සේනපුර තෘතීයක හා වෘත්තීය සාක්ෂරතා පුහුණු මධ්යස්ථානයේ දින 12ක් කාලයක් ජීවිත ආරක්ෂක ක්රමවේද පිළිබඳ පුහුණුව ලැබූ පුනරුත්ථාපන ලාභීන් සඳහා එම මධ්යස්ථානයේ දී 14 සහතික පත්ර ප්රදානයට ප්රධාන ආරාධිතයා වශයෙන් එක්වෙමින් ඔහු මේ බව ප්රකාශ කළේය.
මෙම අවස්ථාවට තෘතීයක හා වෘත්තීය සාක්ෂරතා පුහුණු මධ්යස්ථානයේ අධ්යක්ෂ කර්නල් ඒ. කේ. සී. එස්.සිල්වා, ජීවිත ආරක්ෂක සංගමයේ සභාපති අසංක නානායක්කාර ඇතුළු යුද හමුදාවේ උසස් නිලධාරින් එක්ව සිටියහ.
එහිදී පුනරුත්ථාපනලාභීන් අමතා කතා කළ පුනරුත්ථාපන කොමසාරිස් ජනරාල් මේජර් ජෙනරාල් දර්ශන හෙට්ටිආරච්චි මෙසේද කීවේය.
“ලංකාවේ දැනට රිය අනතුරුවලින් සෑම දිනකම අටක් පමණ මිය යනවා. ඉන් පසුව ජීවිත නැති වෙන්න ප්රධානම හේතුව තමයි දියේ ගිලී මිය යෑම සහ වෙනත් හදිසි අනතුරු.
එසේ අනතුරට පත්වන ජීවිත බේරා ගැනීම සමාජයට ලොකු මෙහෙවරක්. ඒ වගේම ආගමානුකූලව ගත්තොත් ලොකු පිනක්. ඒ පුහුණුව තමයි අපි පුනරුත්ථාපනලාභීන්ට මේ ලබා දෙමින් සිටින්නේ. මේ පුනරුත්ථාපන මධ්යස්ථානයට එන සෑම කෙනකුටම අපි ජීවිතාරක්ෂක පුහුණුව ලබාදී දුන්නොත් ලොකු පිරිසක් අපිට අනතුරුවලින් මුදවා ගන්න පුළුවන්කම තිබෙනවා. ඉන් රටට විනයගරුක නීතිගරුක පිරිසක් බිහි වෙනවා වගේම ඕනෑම ආපදා අවස්ථාවකට මුහුණ දිය හැකි පෞරුෂයක් සහිත පිරිසක් සිටිනවා. අපි මේ පුනරුත්ථාපනලාභීන් ඔවුන්ගේ පවුල්ට පමණක් නොව රටට ඕන පිරිසක් බවට පත් කිරීමේ පුහුණුව තමයි මේ ලබා දුන්නේ.
සමාජයේ යම් කිසි කෙනෙක් අනතුරුකට මුහුණපාලා සිටින අවස්ථාවක මේ අය ඉදිරිපත් වෙලා ඒ ජීවිත බේරා ගැනීමත් මේ කාර්යයෙන් සිද්ධ වෙනවා. සමාජයේ නිතරම කුඩ්ඩා,කුඩ්ඩා කියලා කොන් කළාට ඉදිරියේදී මේ අයත් සමාජයට අත්යවශ්ය පුද්ගලයෝ බවට පත් කිරීම් තමයි අපේ අරමුණ.
මෙම අවස්ථාවට, වැලිකන්ද සේනපුර තෘතීයක හා වෘත්තීය සාක්ෂරතා පුහුුණු මධ්යස්ථානයේ කාර්ය මණ්ඩලය. මෙන්ම පුනරුත්ථාපනලාභීන් රැසක් එක්ව සිටියහ.
