දිනසේන රතුගමගේ –
යාපනය මුලතිව් හා කිළිනොච්චි ප්රදේශවල මහවිරු සතිය ආරම්භ කරමින් එම ප්රදේශ වල පිහිටි සුසාන භූමි වලදී 21 දා සවස සොහොන් කොත් වලට මල් පුදා ඉටිපන්දම් හා පහන් දල්වූහ.
යාපනයේ තීවකම් සාට්ටි සුසාන භූමියේදී ප්රධාන මහවිරු උළෙල පැවති අතර යාපනයේ තවත් සුසාන භූමි කීපයක හා මුලතිව් කිළිනොච්චි පළාත් වලද එම උත්සව පවැත්වුණි.
යුද්ධයෙන් සිය ඥාතීන් මියගිය පිරිස් මෙම සුසානභූමි වෙත පැමිණ යුද්ධයෙන් මියගිය පිරිස් සිහිපත් කළ අතර මේ මස 27 වෙනිදා දක්වා දිනපතාම එම උත්සව පවැත්වේ.
නොවැම්බර් මස 27 වෙනිදා පස්වරු 6-05 ට මෙම මහවිරු උත්සවය මහා පරිමාණයෙන් සිදු කෙරෙන අතර එදින මෙම මහවිරු සතියේ අවසන් දිනයද වෙයි.
එදිනට සෑම සොහොන් කොතක් ඉදිරියේම මියගිය පුද්ගලයාගේ ඥාතීන් පැමිණ මල්දම් පළදවා ඉටිපන්දම් හා පහන් දල්වා මියගිය පිරිසට පින් අනුමෝදන් කරණ අතර සංවිධායකයින් විසින් ඒ සෑම පවුලකටම පොල් පැලය බැගින් බෙදා දීමක්ද සිදු කරණු ලබයි.
මෙවර උතුරේ පවැත්වෙන මහවිරු උළෙලවල්වලට ආරක්ෂක අංශ වලින් බාධා එල්ල නොවීම විශේෂ සිද්ධියකි.
