ඉදිරි මාසවලදී ඇතිවිය හැකි බලශක්ති අර්බුදයක් වළක්වා ගැනීම සඳහා නොරොච්චෝල ලක්විජය බලාගාරයට හදිසි පදනම මත ගල්අඟුරු මිලදී ගැනීමට කැබිනට් මණ්ඩලය අනුමැතිය ලබා දී ඇති බව රජයේ ජ්යෙෂ්ඨ මූලාශ්රයක් උපුටා දක්වමින් සන්ඩේ ටයිම්ස් වාර්තා කර තිබේ.
දකුණු අප්රිකාවෙන් මිලදී ගත් ගල්අඟුරු තොගවල ගුණාත්මකභාවය පරීක්ෂණවලින් අසමත් වීම හේතුවෙන් මෙම තීරණය ගෙන ඇති බව ද එම වාර්තාවේ දැක්වේ.
මැයි මාසයේදී මෝසම් වැසි ආරම්භ වීමට පෙර ප්රමාණවත් ගල්අඟුරු තොග ලබා නොගතහොත් ගොඩබෑමේ කටයුතු දුෂ්කර වී බලශක්ති අර්බුදයක් නිර්මාණය වීමේ අවදානමක් පවතින බැවින් මෙම තීන්දුව ගෙන ඇතැයි වාර්තා වේ.
“අවශ්යතාවයක් මතු වුවහොත් හදිසි මිලදී ගැනීම් සිදු කිරීමට කැබිනට් අනුමැතිය ලැබී තිබෙනවා. එසේ නොවුවහොත් බලශක්ති අර්බුදයක් ඇති වීමට ඉඩකඩ තිබෙනවා,” උක්ත රජයේ ජ්යෙෂ්ඨ නිලධාරියා උපුටා දක්වමින් සන්ඩේ ටයිමිස් වාර්තා කර ඇත.
දකුණු අප්රිකානු ගල්අඟුරු මෙට්රික් ටොන් 60,000ක් රැගත් පළමු නෞකාවේ සාම්පල කිලෝ ග්රෑමයක් සඳහා උත්පාදනය කළ හැකි කිලෝ කැලරි ශක්තිය ප්රමාණාත්මකව අඩු වීම ඇතුළු කාරාණ 11කින් යුතු ගල් අඟුරු ප්රමිතිය නිශ්චය කරන සාධකවලින් 03කින් අසමත් වූයේය.
මේ ගල් අඟුරු මෙට්රික් ටොන් 60, 000 සඳහා මුළු නැව් වාර 23ක් සැලසුම් කර ඇති අතර ඉන් 9ක් දැනටමත් මෙරට බලා පැමිණෙමින් තිබේ. පළමු නෞකාවේ ගල්අඟුරු බාල වීම නිසා සෙසු නෞකාවල ගල්අඟුරු ද පරීක්ෂාවට ලක් කිරීමට නියමිතව තිබේ.
අපේක්ෂිත කිලෝ කැලරි ප්රමාණය නොමැති වීම පදනම් කරගෙන මූලික ගිවිසුම් කොන්දේසියක් උල්ලංඝණය කිරීම හේතුවෙන් පළමු නෞකාව සඳහා රජය දැනටමත් ඇමෙරිකානු ඩොලර් මිලියන 2ක දඩයක් පනවා ඇති අතර, දෙවන නෞකාවේ ගුණාත්මක පරීක්ෂණ දැනට සිදු කෙරෙමින් පවතී.
මෙම ගල්අඟුරු ටෙන්ඩරය සම්බන්ධයෙන් මේ වන විට විවිධ දූෂණ චෝදනා එල්ල වෙමින් පවතී. දකුණු අප්රිකානු ගල්අඟුරු ආනයනය කළ ඉන්දීය සමාගමකට වාසි සහගත වන අයුරින් ටෙන්ඩර් කොන්දේසි වෙනස් කර ඇති බවට චෝදනා එල්ල විය.
විශේෂයෙන්ම, සාමාන්යයෙන් දින 42ක් පවතින ටෙන්ඩර් කාලසීමාව දින 21ක් දක්වා අඩු කර ඇති බව මෙහිදී උපුටා දැක්විනි. විපක්ෂය මේ සම්බන්ධයෙන් විරෝධය පළ කර ඇති අතර අදාළ සියලුම ලේඛන පාර්ලිමේන්තුවට ඉදිරිපත් කරන ලෙස ඉල්ලා තිබිණි.
මේ චෝදනා සම්බන්ධව පසුගිය දා පාර්ලිමේන්තුවේ දී දීර්ඝ පැහැදිලිකිරීමක් කළ බලශක්ති ඇමතිවරයා අදාල සියලුම ලේඛණ පාර්ලිමේන්තුව තුළ සභාගත කරමින් මේ කලබලය ඇති කළ පොහොට්ටුවේ මන්ත්රීවරයෙකුගේ වේදනාවට හේතුව ටෙන්ඩර් ලබා දීමකින් තොරව පසුගිය කාලය පුරා ඔවුන්ගේ හිතවතෙකුට රුසියානු ගල් අඟුරු ගෙන ඒමට ලබා දී තිබුණු ඩෙන්ඩරය පරාද වීම බව පෙන්වා දුන්නේය.
තරගකාරී ලන්සුකරුවන් ගණනාවක් අතරින් එම ඩෙන්ඩරය අසමත් වූයේ රුසියාවට වැටී ඇති සම්බාධකත් සමග එම ටෙන්ඩරයේ මිල ගණන් ඉහළ අගයක පැවතීම නිසා බව ඇමතිවරයා පෙන්වා දුන්නේය.
මෙම ටෙන්ඩර් ප්රදානය ගැන අනෙක් කිසිම තරගකාරී ලංසුකරුවෙක් අභියාචනායක් හෝ ඉදිරිපත් නොකළ බව ද අවධාරණය කළ ඇමතිවරයා මෙම ගනුදෙනුවේ විනිවිද භාවය තහවුරු කළේය. ටෙන්ඩර් පටිපාටිය ක්රියාත්මක කළ බොහෝ අවස්ථාවල එක් එක් නැව්ගත කිරීම් සඳහා මෙවැනි ප්රශ්න ඇති වී තිබෙන බවද ඔහු සලකුණු කළේය.
