ශ්රියානි විජේසිංහ –
ඇල්ල වැල්ලවාය මාර්ගයේ දී අඩි 1000ක් පමණ ප්රපාතයට ඇද වැටුණු බසයේ තුවාල කරුවන් බේරාගැනීමට කටයුතු කළ බදුල්ල රෝහලේ වෛද්ය පාලිත රාපක්ෂ සම්බන්ධයෙන් රාජ්ය සේවා කොමිෂන් සභාව මගින් පවත්වන විනය පරීක්ෂණය ඊයේ (08) පවත්වන ලද බවත් එහි තීරණය ඉදිරියේ දී ප්රකාශ කිරීමට නියමිත බවත් වාර්තා වේ.
වසර 2023දී රෝහල්වල ඖෂධ නොමැතිවීම සම්බන්ධව ජනමාධ්යවෙත ප්රකාශයන් නිකුත් කිරිමට එරෙහිව සෞඛ්ය අමාත්යංශය මගින් නිදහසට කරුනු විමසමින් මෙම විනය පරික්ෂණයක් ආරම්බ කෙරුණි.
මේ වන විට එම විනය පරික්ෂණය රාජ්ය සේවා කොමිෂම මගින් පවත්වාගෙන යන අතර මෙම කාලය තුළ වෛද්යවරයාට උසස්වීම් , විදේශ ගතවීම් සියල්ල අහිමි වී ඇත.
ආරම්බ කර ඇති විනය පරික්ෂණය ඉක්මනින් නිමා කර තීන්දුව ලබා දෙන්නේ නැයි වෛද්යවරු ප්රකාශ කරති.
බැටරියක් ආධාරයෙන් හෘදය ක්රියාත්මක කරමින් රාජකාරි ඉටුකරන වෛද්ය පාලිත රාජපක්ෂ දණහිස් දෙක සහ බෙල්ල සැත්කමකට ලක් කර තිබියදී ප්රපාතයකට බැස ජීවිත බේරා ගැනීම සබන්ධයෙන් සෞඛ්ය අමාත්යංශයේ කිසිවෙකුගේ හෝ ඇගයීමකට ලක් නොවීමද කණගාටුවක් බව වෛද්යවරු පවසා සිටිති.
කෙසේ නමුත් බදුල්ල රෝහල තුළ spinal board 2ක් පමණක් තිබු අවස්ථාවක එයට තවත් spinal board 6ක් එකතු කර ගැනීම වෛද්ය පාලිත රාජපක්ෂ කළ ඉල්ලීමකට අනුව ප්රදේශයේ මුස්ලිම් ජාතිකයින් පිරිසක් එම ඉල්ලීම ඉටු කිරීමට කටයුතු කර තිබුණි.
මේ හේතුවෙන් අනතුරුට පත් තුවාල කරුවන් කිසිවෙකුටත් සුසුම්නාවට හානි නොවන ලෙස ප්රපාතයෙන් ඉහළට ගැනීමට හැකිවිය.
එසේම ඇල්ලවැල්ලවාය බස් අනතුරෙන් පසුව මුස්ලිම් ජාතිකයෙක් වෛද්ය පාලිත සොයාවිත් ඔහුට කරන ගෞරවයක් ලෙස රෝහලට ලක්ෂ 15ක් වටිනා දැඩිසත්කාර එකක ඇදක් පරිත්යාග කළේ පසුගිය 7 වෙනිදාය.
මේ තත්ත්වය තුළ සෞඛ්ය අමාත්යංශය දැනුවත් නොකර වෛද්යවරුන් සියය ගණනක් රැස්කරමින් ඇල්ල වැල්ලවාය බස්රථ අනතුරෙන් තුවාල ලැබූවන් බේරාගැනීමට කටයුතු කිරිම සම්බන්ධයෙන්ද විනය පරික්ෂණයක් පැවැත්වීමට සෞඛ්ය අමාත්යංශයට කටයුතු කළහොත් එහි පුදුමයට කරුණක් නොවන බවද මේ සම්බන්ධව ලංකාසරට අදහස් දක්වමින් බදුල්ල රෝහලේ ප්රකාශකයෙක් පැවසුවේය.
තවත් වසර කීපයකින් පමණ විශ්රාම යාමට නියමිතව සිටින වෛද්ය පාලිත රාජපක්ෂ සෞඛ්ය අමාත්යංශයේ ඇගයීමට ලක්නොවුවද ඌවපළාත් ජනතාවගේ ඇගියීමට ලක්ව අවසන් බව පළාත් සෞඛ්ය ආරංචි මාර්ග කියයි.
