දිනසේන රතුගමගේ-
වන්නි දිස්ත්රික්කයේ හිටපු පාර්ලිමේන්තු මන්ත්රීවරුන් දෙදෙනෙකුවන රිෂාර්ඩ් බදුයුදීන් හා කාදර් කාදර් මස්තාන් යන දෙදෙනාගේ ආධාරකරුවන් අතර ඇතිවූ ගැටුමකින් තුවාල ලැබූ පුද්ගලයින් තුන් දෙනෙකු ඊයේ (11) රාත්රී වවුනියාව මහ රෝහලට ඇතුළත් කොට තිබේ.
මෙම ගැටුමේදී රිෂාර්ඩ් බදුයුදීන් හිටපු මන්ත්රීවරයාගේ සහයට පැමිණි වාහන තුනකට හා හිටපු මන්ත්රීවරයාගේ වාහනයටද අලාභ හානි සිදුව තිබේ. රිෂාර්ඩ් බදුයුදීන් හිටපු මන්ත්රීවරයා වාහනය තුළ සිටියදීම ඔහුගේ වාහනයට ප්රහාර එල්ල කොට එම වාහනයට දැඩි අලාභහානි සිදු කොට තිබේ
වවුනියාවේ පට්ට්ටානිචචපුලියන්කුලම ප්රදේශයේදී හිටපු මන්ත්රී කාදර් කාදර් මස්තාන්ට ආධාර පිණිස රැස්වීමක් සංවිධානය කොට තිබූ අතර රිෂාඩ් බදියුදින්ගේ ආධාරකරුවන් පිරිසක් එම රැස්වීමට යතුරු පැදි වලින් ගොස් රැස්වීමට සහභාගී වී සිටි පිරිසට තර්ජනය කොට පහර දීමටද තැත් කොට ඇත.
රැස්වීමේ සිටි පිරිසෙන් ඔවුන්ට දැඩි විරෝධයක් එල්ලවීමත් සමගම ඔවුන් පැමිණි යතුරු පැදිවලින්ම ආපසු පලා ගොස් තිබේ.
මේ සිද්ධියෙන් කුපිත වු මස්තාන් හිටපු මන්ත්රීවරයාගේ ආධාරකරුවන් මග රැක සිට රිෂාර්ඩ් බදුයුදීන් හිටපු මන්ත්රීවරයාගේ පිරිසක් වාහන වලින් පැමිණෙමින් සිටියදී පහර දීම සිදු කොට තිබේ. සිද්ධියත් සමගම එම ස්ථානයට පැමිණි වවුනියාව පොලීසියේ නිලධාරීන් සිද්ධිය සමථයකට පත් කොට කාදර් මස්තාන් හිටපු මන්ත්රීවරයාගේ රැස්වීම සුපුරුදු පරිදි පවත්වා ගෙන යාමට ඉඩ සලසා දී ඇත.
මෙම පහර දීම සම්බන්ධයෙන් මේ වන විට දෙපාර්ශ්වයෙන්ම වවුනියාව පොලීසියට පැමිණිලි ලැබී ඇති අතර සිද්ධිය සම්බන්ධයෙන් පරීක්ෂණ ආරම්භ කොට තිබේ.
