පාස්කු ප්රහාරයට පෙර එම ප්රහාරය සිදුවන බව හිටපු නැගෙනහිර පළාත් මහ ඇමති සිවනේසතුරෙයි චන්ද්රකාන්තන් නොහොත් පිල්ලෙන් දැන සිටි බවට ඉතාම පැහැදිලි තොරතුරු මේ වනවිට අනාවරණය වෙමින් ඇතැයි මහජන ආරක්ෂාව පිළිබඳ ඇමති ආනන්ද විජේපාල අද පාර්ලිමේන්තුවට පැවසුවේය.
මෙතෙක් සිදුකළ විමර්ශනවල දී පිල්ලෙයාන් පාස්කු ප්රහාරය සිද්ධවෙන 2019/04/21 වැනි දින වන විට මඩකලපුව දිස්ත්රික් පාර්ලිමේන්තු මන්ත්රී ජෝෂප් පරරාජසිංහම්ගේ ඝාතනය සම්බන්ධයෙන් මඩකලපු බන්ධනාගාරයේ රඳවා සිට ඇති නමුත් මඩකලපුව බන්ධනාගාරයේ සිටිමින් ඔහු පාස්කු ප්රහාරය සම්බන්ධව පූර්ණ දැනුම්වත් භාවයකින් සිටි බවට සාධාරණ හා යුක්ති සහගත ප්රබල සැකයක් මේ වනවිට ඉස්මතු වන බව ඇමතිවරයා කීවේය. විමර්ශනවලින් අනාවරණයවන බොහෝ සංවේදී කරුණු මේ අවස්ථාවේ මේ සභාවට ඉදිරිපත් නොකරන බවත් ඇමතිවරයා පැවසුවේය.
එමෙන්ම පසුගිය රජය විසින් කොමිෂන් සභා දමා ප්රතික්ෂේප කළ හන්සීර් අසාද් මවුලානා විසින් චැනල් 4 නාලිකාව වෙත කළ හෙළිදරව්ව පිළිබඳව නීතිපතිවරයාගෙන් උපදෙස් ලබාගෙන පාස්කු ප්රහාරය සම්බන්ධව ක්රියාත්මක නඩුවලට අවහිරයක් නොවන ආකාරයට නව විමර්ශනයක් බී/35/82/2024 යටතේ 2024.11.13 වැනි දින මහේස්ත්රාත් අධිකරණයට කරුණු වාර්තා කරමින් ආරම්භ කරන බව ද ඇමතිවරයා කීවේය.
අසාද් මවුලානා ලබා දී ඇති තොරතුරු මත විමර්ශන රාශියක් සිදුවෙමින් ඇති බවත් අසාද් මවුලානා ශ්රි ලංකාවට ගෙන්වා ගැනීමට නීත්යානුකූලව සහ රාජ්ය තාන්ත්රික මට්ටමින් මේ වනවිට ක්රියාත්මක වෙමින් සිටින බවත් ඔහු පාර්ලිමේන්තුවට හෙළි කළේය.
