කීර්ති ප්රනාන්දු –
තීරු බදු වලින් නිදහස් කර තිරිඟු පිටි ආනයනයට රජය නැවතත් ඉඩ ලබා දෙන්නේ නම් පාන් ගෙඩියක් රුපියල් 100කට හා බනිස් ගෙඩියක් රුපියල් 50කට ලබා දෙන බව බේකරි හිමියන්ගේ සංගමයේ සභාපති එන් .කේ. ජයවර්ධන පවසයි.
මෙරට ප්රධාන පිටි සමාගම් දෙකෙන් පිටි මිල අඩු කිරීමක් සිදු නොකළ ද ආනයනික පිටි සඳහා බදු සහනය ලබා දෙන්නේ නම් පිටි ආනයනය කර එමඟින් බේකරි නිෂ්පාදනවල මිල අඩුකර පාරිභෝගික ජනතාවට ඉතා හොඳ වාසියක් ලබා දීමට සූදානම් බව පවසන සභාපතිවරයා නැවත පිටි ආනයනය කිරීමට අවස්ථාව සලසා දෙන ලෙස රජයෙන් ඉල්ලා සිටින බවද පැවසීය .
මේ වන විට ලෝක වෙළෙඳ පොළේ තිරිඟු පිටි කිලෝවක තොග මිල රුපියල් 110 දක්වා අඩු වී ඇතැයි ද ඔහු පෙන්වා දෙයි. එහෙත් ප්රධාන පිටි සමාගම් දෙක තවමත් පිටි කිලෝවක් ලබා දෙන්නේ රුපියල් 210 සහ 220 අතර මිලකට බව බේකරි හිමියෝ කියති. .
මෙරට ප්රධාන පිටි සමාගම් දෙක එම වාසිය පාරිභෝගික ජනතාවට මෙන්ම බේකරිවලට ලබා නොදී පාරිභෝගිකයන් සූරා කෑම කණගාටුදායක තත්ත්වයක් බවත් රජයේ බලධාරීන් මේ ගැන නිහඬව සිටීම පුදුමසහගත බවත් ඔහු කියා සිටියේය .
එසේම තිරිඟු පිටි ආනයනය රජය මගින් තහනම් කිරීම තුළින් එහි වාසිය ද වැඩිවී ඇත්තේ බේකරි කර්මාන්තය ට හෝ පාරිභෝගික ජනතාවට නොව මෙරට ප්රධාන තිරිගු පිටි සමාගම් දෙකට බවද ජයවර්ධන වැඩිදුරටත් පැවසීය .
