-
සරසවියට භික්ෂුවක් ලෙස ඇතුළු වී නම් භික්ෂුවක් ලෙසම උපාධිය ලබාගෙන සරසවියෙන් පිටවිය යුතුයි… ජනපති කියයි…
පළමු පරාක්රමබාහු රජු දුස්සීල සංඝයාට මරණ දඬුවම ලබා දුන් බව ජනාධිපති රනිල් වික්රමසිංහ අද පාර්ලිමේන්තුවේ දී සිහි කළේය.
ජනාධිපතිවරයා පැවසුවේ එසේ නමුත් ව්යවස්ථාවෙන් තමන්ට එවැනි බලයක් ලැබී නැති බවය. කෙසේ වෙතත් මේ ගමන් කරනා ආකාරය අනුව ශාසනය බරපතල ලෙස පිරිහෙනු ඇති බව කී ජනාධිපතිවරයා එය වැළැක්විය යුතු බවත් අතීතයේ දී ශාසනික ප්රතිසංස්කරණ සිදුවූයේ රජවරුන්ගේ මැදිහත්වීමෙන් බවත් පෙන්වා දුන්නේය.
එබැවින් තමන් පළමුවතාවට සංඝ විනය ආරක්ෂා කිරීමට මහා සංඝරත්නයට බලතල ලබාදීමේ කතිකාවතක් ලියාපදිංචි කිරීමේ පනත් කෙටුම්පතකට අනුමැතිය ලබාදී ඇති බව කී ජනාධිපතිවරයා විශ්විද්යාල පද්ධතිය තුළ සංඝයා වහන්සෛ් ක්රියාකරන ආකාරය සම්බන්ධව ද ඊට ඇතුළත් විය යුතු බව අවධාරණය කළේය.
ජනාධිපතිවරයා මෙසේ ද කීවේය.
අපේ ශාසනයේ ප්රශ්න ගණනාවක් තිබෙනවා. අපි පළමුව බලාපොරොත්තු වෙන්නේ ගිහි පැවිදි සියලුදෙනා ධර්මය අනුව ක්රියා කරනු ඇති බවයි.
අපේ සංඝයා වහන්සේ ධර්මය අනුව ක්රියා නොකරනවිට ප්රශ්න ගණනාවක් ඇති වෙනවා. ඒක බුදුන්වහන්සේගේ සමයේ සිටම සිදුවන දෙයක්. දේවදත්ත සිවුරු දරාගෙන තමයි බුදුන්වහන්සේට එරෙහිව ක්රියා කළේ.
අපේ ශාසනික කටයුතුවලදී අවධානය යොමුකළයුතු ප්රශ්න ගණනාවක් අද තිබෙනවා. ඒකයි අපි පළමුවතාවට සංඝ විනය ආරක්ෂා කිරීමට මහා සංඝරත්නයට බලතල ලබාදීමේ කතිකාවතක් ලියාපදිංචි කිරීමේ පනත් කෙටුම්පතකට අනුමැතිය ලබාදී තිබෙන්නේ.
මේ සඳහා නීති සම්පාදක දෙපාර්තමේන්තුවෙන් අනුමැතිය ලැබීමෙන් පසු අපි එය මේ සභාවට ඉදිරිපත් කරනවා. මොකද යම් කිසි පාලනයක් තිබිය යුතුයි. අතීතයේ මේ රට පාලනය කළේ රජවරු. ඒ රජවරු මගින් තමයි ශාසනයේ යම් යම් ප්රතිසංස්කරණ සිදු වුණේ.
පරාක්රමබාහු රජතුමාගේ කාලයේ ඇතැම් සංඝයාවහන්සේලාට මරණ දඬුවම නියම කළා. අපිට ඒවා කරන්න බැහැ. ඒ සඳහා ව්යවස්ථාවෙන් අපට බලයකුත් නැහැ.
ආණ්ඩුක්රම ව්යවස්ථාවේ 09 වන වගන්තිය යටතේ භික්ෂූන් වහන්සේලාගේ විනය පිළිබඳ සඳහන් වෙනවා. සියම් නිකාය, අමරපුර නිකාය සහ රාමඤ්ඤ නිකාය නමින් අපිට කතිකාවත් 03ක් තිබෙනවා. ශාසනික කටයුතුවලදී අවධානය යොමු කළ යුතු ප්රශ්න ගණනාවක් අද අපට තිබෙන නිසා මෙම කෙටුම්පත අවශ්ය වෙනවා.
මම දැක්කා විශ්වවිද්යාල අධ්යාපනය ලබන එක් භික්ෂූන් වහන්සේ නමක් අපේ මල්වතු, අස්ගිරි මහානායකහිමිවරුන්ට බනිනවා, දොෂාරෝපණය කරනවා. කවුද මේ අය, භික්ෂූන් වහන්සේලාද, වෛතුල්යවාදීන්ද කියලා අපිට අහන්න වෙනවා.
සිවුරු දැරුවා කියලා ධර්මයට විරුද්ධව ක්රියා කරන්න එයින් විශේෂ ආරක්ෂාවක් ගන්න බැහැ. ඒ නිසා මේ පනත අවශ්යයි. ඇතැම්විට මේ හැසිරීම තුළින් පැවිදි සමාජය තුළ තිබෙන ප්රශ්න ගිහි සමාජය තුළින් මතු කෙරෙනවා. මෙහිදී අපි දීර්ඝ වශයෙන් සාකච්ඡා කළයුතුයි.
අද භික්ෂුන් වහන්සේලා ලෙස විශාල පිරිසක් විශ්වවිද්යාලවලට ඇතුලත්වුණත් අවසන් වෙනකොට ඉන්නේ ගිහියන් විදියට. අපි පළමුවෙන්ම තීරණය කළයුතුයි භික්ෂුන් වහන්සේලා විදියට විශ්වවිද්යාලයට ඇතුළත් වුණොත්, භික්ෂුන් වහන්සේ ලෙසම උපාධිය ලබාගෙන ඉන් පිටවිය යුතු බව. ඒ ගැන මහානායක ස්වාමීන්වහන්සේලා සමග සාකච්ඡා කළ යුතුයි.
ඒවගේම විශ්වවිද්යාල තුළ හැසිරීම මේ කතිකාවන්ට සම්බන්ධ කළයුතුයි. මේ යන ක්රමවේදය තවදුරටත් ඉදිරියට පැවතුනොත් අපේ ශාසනය නැති වෙනවා. ඒකයි මම විශේෂයෙන්ම අද මේ ගැන කතා කළේ.
