ලලිත් චාමින්ද –
-
නිවාස 127ක් ඉදිකිරීම්වත් ආරම්භ කර නෑ… නීතිමය ක්රියාමාර්ග ගන්න ප්රතිපාදන නැති බව විගණනය හෙළි කරයි!
ආපදා සහන සේවා මධ්යස්ථානය මගින් නැවත පදිංචිකිරීමේ ව්යාපෘතිය යටතේ ඉදිකිරීම් ආරම්භකොට තිබු නිවාස 1,179ක ඉදිකිරීම් අතහැරදමා ඇති බැව් ජාතික විගණන කාර්යාලය මගින් නිකුත්කොට ඇති විගණන වාර්තාවක සඳහන් වේ.
එමෙන්ම නිවාස 127 ඉදිකිරිම් ආරම්භකර නොතිබු බවද විගණන වාර්තාවේ දැක්වේ.
ආපදා සහන සේවා මධ්යස්ථානය මගින් නැවත පදිංචිකිරිමේ ව්යාපෘතිය යටතේ නිවාස 5,025ක් ඉදිකිරීමට සැලසුම්කොට තිබු අතර ඉන් නිවාස 4,898ක ඉදිකිරීම් ආරම්භකොට තිබුණි.
නැවත පදිංචි කිරිමේ නිවාස ව්යාපෘතිය සඳහා 2024 වර්ෂය අවසන්වනවිට වැයකොට ඇති මුදල රුපියල් මිලියන 583.83කි. යටිතල පහුසුකම් නොමැතිවීම සහ අවදානම් සහගත ස්ථානවලින් පදිංචිකරුවන් ඉවත්වීම ප්රතික්ෂේපකිරීම ආදී හේතුමත ඉදිකළ නිවාසවල පදිංචි නොවිමේ තත්ත්වයක්ද දක්නට ඇති බව විගණන වාර්තාවේ සඳහන් වේ.
විගණන නිරික්ෂණ සම්බන්ධයෙන් ආරක්ෂක අමාත්යංශයේ ගණන්දිමේ නිලධාරිවරයා විගණනයට සඳහන් කොට ඇත්තේ නිවාස ඉදිකිරීම් ආරම්භ කර අතහැරදමා ඇති ප්රතිලාභින් සම්බන්ධයෙන් ගතයුතු ක්රියාමාර්ග පිළබඳව උපදෙස් මාලාවක් දිස්ත්රික් ලේකම්වරුන් වෙත ලබාදී ඇති බවය.
එමෙන්ම ඉදිකිරීම් අත්හැරදමා ඇති ප්රතිලාභීන් සඳහා නීතිමය ක්රියාමාර්ග ගැනීම සඳහා නෛතික ප්රතිපාදන නොමැති බවද ගණන්දිමේ නිලධාරිවරයා විගණනයට සඳහන් කොට ඇත.
මෙන්ම 2024/2025 යන වර්ෂවල යටිතල පහසුකම් සංවර්ධන ව්යාපෘති සඳහා පිළිවෙළින් රුපියල් මිලියන 79ක් සහ රුපියල් මිලියන 50.6ක මුදලක් දිස්ත්රික් ලේකම්වරුන් වෙත නිදහස්කොට ඇති බවද ගණන්දීමේ නිලධාරිවරයා විගණනයට සඳහන්කොට ඇත.
ආරක්ෂක අමාත්යංශය සම්බන්දයෙන් 2024 වර්ෂයට අදාළව නිකුත්කොට ඇති විගණන වාර්තාවේ මෙම තොරතුරු ඇතුළත්ව ඇත.
