-
ලඟ තැනකින් පඩි දෙන්න ඕන නම් වාර්ෂික ස්ථානමාරු පටිපාටිය උල්ලංඝණය නොකර ජපුර රොහල් සභාපතිව අමාත්යාංශයට අනුයුක්ත කරගන්න… ඔබ කරන්නේ නිදහස්ව සිතන සෑම විශේෂඥ වෛද්යවරයෙකුටම රැකියාවත් එපා කිරීමක්… විශේෂඥ වෛද්යවරු සෞඛ්ය ලේකම්ට දන්වති!
විශේෂඥ වෛද්යවරුන්ගේ සාමාන්ය වාර්ෂික ස්ථාන මාරුවීම් පටිපාටිය උල්ලංඝණය කර ජයවර්ධන පුර රෝහලේ සභාපති ප්රසව හා නාරිවේදය පිළිබඳ විශේෂඥ වෛද්ය ජයංග තිලකරත්න කාසල් කාන්තා රෝහලේ නේවාසික ප්රසව හා නාරි රෝග විශේෂඥවරයෙක් ලෙස අවිධිමත්ව පත් කිරීම සම්බන්ධව රජයේ වෛද්ය නිලධාරීන්ගේ සංගමය සහ විශේෂඥ වෛද්යවරුන්ගේ සංගමය සෞඛ්ය අමාත්යාංශ ලේකම් විශේෂඥ වෛද්ය අනිල් ජාසිංහට ලිඛිතව සිය ප්රබල විරෝධය පළ කර තිබේ.
රජයේ වෛද්ය නිලධාරීන්ගේ සංගමය අවධාරණය කරන්නේ මේ පත්වීම සිදුකර ඇත්තේ විශේෂඥ වෛද්ය නිලධාරීන්ගේ ස්ථාන මාරුවීම් මණ්ඩලයේ එකඟතාවයකින් තොරව අත්තනෝමතික ලෙස සහ සියලු ස්ථාන මාරුවීම් නියමයන් උල්ලංඝනය කරමින් බවය.
රජය විසින් ශ්රී ජයවර්ධනපුර රොහලේ සභාපති ලෙස පත් කළ ජයංග තිලකරත්නට ප්රසව හා නාරිවේදය පිළිබඳ විශේෂඥ වෛද්යවරයෙක් ලෙස සායනික කටයුතු කිරීමේ අභිලාෂයක් ඇතිනම් ඔහු කළ යුත්තේ මෙවැනි නීති විරෝධී අකටයුතු නොකර නියමිත පරිදි ස්ථානමාරු ක්රමවේදයට අනුගත වීම බව එම සංගමය පවසයි.
එබැවින් මෙම අත්තනෝමතික පත්වීම වහාම අවලංගු කරන ලෙසත්, ස්ථාන මාරුවීම් පිළිබඳ විධි නියමයන් අනුගමනය කරන ලෙසට සහතිකවන ලෙසත් සෞඛ්ය ලේකම්වරයාගෙන් රජයේ වෛද්ය නිලධාරීන්ගේ සංගමය අවධාරණයෙන් ඉල්ලා සිටී.
විශේෂඥ වෛද්යවරුන්ගේ සංගමය මෙම පත්කිරීමට විරෝධය පළ කරන්නේ කරුණු 07ක් ඔස්සේය. ලිපිය අනුව කරුණු පෙළ ගැසෙන්නේ මෙසේය.
- ජයංග තිලකරත්න ඇල්පිටිය මූලික රෝහලේ ප්රසව හා නාරිවේදය පිළිබඳ විශේෂඥ වෛද්යවරයා ලෙස කටයුතු කරමින් සිටිය දි ශ්රී ජයවර්ධනපුර රොහලේ සභාපතිවරයා ලෙස පත්කරනු ලැබුවේ මාලිමා ආණ්ඩුව බලයට පැමිණි පසුය. ජයංග තිලකරත්නගේ නියමිත රැකියා ස්ථානයය ඇල්පිටිය මූලික රෝහලය.
- ඔහු ඇල්පිටිය මූලික රෝහලේ ප්රසව හා නාරිවේදය පිළිබඳ විශේෂඥවරයා වී සිටිය දී ශ්රී ජයවර්ධනපුර රෝහලේ සභාපතිවරයා ලෙස පත් වන්නේය.
- දැනට පුරප්පාඩු වී ඇති කාසල් රෝහලේ ප්රසව හා නාරිවේදය පිළිබඳ නේවාසික විශේෂඥ වෛද්ය ධූරය වාර්ෂික ස්ථාන මාරු පටිපාටිය හරහා පුරවා ගන්නා තෙක් තාවකාලික පදනමින් පත් කළ හැකි විශේෂඥ වෛද්යවරුන්ගෙන් කළමනාකරණය කරගත හැකිය.
- ජයවර්ධනපුර රෝහලේ සභාපතිවරයාට කාසල් රෝහලේ නේවාසික වෛද්යවරයෙක් ලෙස කටයුතු කිරීමට කැමැත්තක් තිබුණා නම් ඔහුට ද අයදුම්පත්රයක් දමා වාර්ෂික ස්ථානමාරුවීමේ පටිපාටිය අනුගමනය කරන්නට හැකියාව තිබුණේය.
- එසේ තිබිය දී විශේෂඥ වෛද්යවරුන්ගේ ස්ථාන මාරු ක්රමයේ සියලුම නීති රීති උල්ලංඝනය කරමින් සෞඛ්ය ලේකම්වරයා විසින් ඔහුව කාසල් රෝහල වෙත පත් කිරීම මේ රටේ නිවැරදි ලෙස සිතන සියලුම වෛද්ය විශේෂඥයින්ට කිසිසේත්ම පිළිගත නොහැකිය.
- කාසල් රෝහල වැනි වගකීම් අධික කාර්ය බහුල රෝහලක ප්රසව හා නාරිවේද නේවාසික විශේෂඥවරයෙක් ලෙස ජයවර්ධන පුර රෝහලේ සභාපතිවරයා තමන්ගේ සභාපතිකමද කරමින් කටයුතු කරන්නේ කෙසේ ද යන්න අපැහැදිලිය.
- සෞඛ්ය අමාත්යාංශයේ අභිප්රාය වන්නේ ඔහුගේ වැටුප ලබා ගැනීම සඳහා පමණක් සමීප ස්ථානයක් සොයා දීම නම් සෞඛ්ය ලේකම්වරයාට නිසැකවම ඔහුව සෞඛ්ය අමාත්යාංශය වෙත අනුයුක්ත කරගෙන අවශ්ය දේ කළ හැකිය.
අවසානයේ දී විශේෂඥ වෛද්යවරුන්ගේ සංගමය සෞඛ්ය ලේකම්වරයාට කියන්නේ මෙවැන්නකි.
” රාජ්ය සේවා කොමිෂන් සභාවේ අනුමත වැදගත් තනතුරක් දරන නිලධාරියෙකුට ඒ හා සමාන තනතුරකට ස්ථාන මාරුවක් ලබා ගත හැක්කේ සෞඛ්ය අමාත්යාංශයේ විධිමත් වාර්ෂික ස්ථාන මාරු පටිපාටිය හරහා පමණක් බව කරුණාවෙන් සලකන්න.”
“වාර්ෂික ලැයිස්තු තනතුරුවල කිසියම් පුරප්පාඩුවක් ඇති වුවහොත් එය සාමාන්යයෙන් පුරවන්නේ වාර්ෂික ලැයිස්තුවෙන් ස්ථිර නිලධාරියා පත් කරන තෙක් වැඩබලන විශේඥවරයෙක් පත් කිරීමෙන් මිස වාර්ෂික ස්ථාන මාරු ලැයිස්තුවක් පිට සිටින වෙනත් විශේෂඥ වෛද්යවරයෙක් පත් කිරීමෙන් නොවේ.”
“වෛද්ය විශේෂඥයින්ගේ මෙම නීත්යානුකූල ස්ථාන මාරු ක්රියා පටිපාටිය උල්ලංඝනය කරන්නේ නම්, එය නිසැකවම විශේෂඥ වෛද්යවරුන් අතර සැලකිය යුතු නොසන්සුන්තාවයක් ජනනය කරන නරක පූර්වාදර්ශයක් නිර්මාණය කරනු ඇත.
සාමාන්යයෙන් වෛද්ය සභාව තීරණවලට යටත්ව වෛද්ය හේතූන් මත විශේඥ වෛද්ය නිලධාරීන්ට තාවකාලික ස්ථාන මාරුවීම් ලබා දෙන බව මෙහිදී සඳහන් කළ යුතුය. එම තාවකාලික පත්වීම් විශේෂයෙන් අතිරේක පදනම මත ලබා දී තිබේ. පත්වීම්වලින් නිසැකවම වාර්ෂික ස්ථාන මාරු ලැයිස්තුවේ සඳහන් තනතුරු පුරවන්නේ නැත.
තාවකාලික අනුයුක්තයන් සම්බන්ධයෙන් නම් ඔහුගේ හෝ ඇයගේ වැටුප ගෙවනු ලබන්නේ නිලධාරියාගේ ස්ථිර සේවා ස්ථානයෙන් මිස ඔහු තාවකාලිකව අනුයුක්ත කර ඇති ස්ථානයෙන් නොවේ.
අසාමාන්ය හේතුවක් මත මෙවැනි තාවකාලික ස්ථාන මාරුවක් අවශ්ය වුවහොත් ඔහු තාවකාලික පදනමින් සෞඛ්ය අමාත්යාංශයට පත් කිරීමට සෞඛ්ය ලේකම්වරයාට බලය ඇත.
වාර්ෂික ස්ථාන මාරු ක්රියාවලියට අවනතවන වෛද්ය විශේෂඥයින් අතර නොසන්සුන්තාව සහ බලාපොරොත්තු සුන්වීම වැළැක්වීම සෞඛ්ය සේවයේ යහපත් සෞඛ්යයට හේතු වනු ඇති බවත්, මෙම අසාධාරණ සහ තාවකාලික තීරණය ආපසු හැරවීමට සෞඛ්ය ලේකම් ලෙස ඔබට ධෛර්යය සහ ශක්තිය ලැබෙනු ඇතැයි විශේෂඥ වෛද්යවරුන්ගේ සංගමය අවංකවම බලාපොරොත්තු වේ.”
