පසුගිය රජයන් මගින් රාජ්ය සේවය සඳහා සිදුකළ අවිධිමත් බඳවා ගැනීම් පිළිබඳ සමාලෝචනයක් කර රාජ්ය සේවය පිළිබඳ නිශ්චිත ප්රතිසංස්කරණයක් සිදුකිරීම සඳහා අග්රාමාත්ය ලේකම්වරයාගේ ප්රධානත්වයෙන් කමිටුවක් පත් කිරීමට කැබිනට් අනුමැතිය හිමි වී තිබේ.
අද (31) කැබිනට් තීරණ දැනුම් දීමේ මාධ්ය හමුව අමතමින් කැබිනට් ප්රකාශක සෞඛ්ය හා ජනමාධ්ය ඇමති වෛද්ය නලින්ද ජයතිස්ස ප්රකාශ කළේ කොමිෂන් සභා, අමාත්යාංශ, පළාත් සභා සහ ව්යවස්ථාපිත ආයතනවල මෙන්ම පළාත් පාලන ආයතනවල කාර්ය මණ්ඩලය නැවත සමාලෝචනය කිරීමට සහ අත්යාවශ්ය බඳවා ගැනීම් සිදුකිරීමටත්, සේවා අවශ්යතාව අනුව කාර්යමණ්ඩලය නැවත ස්ථානගත කොට උපරිම සේවයක් මහජනතාවට ලබා දීමටත් අවශ්ය පියවර ගැනීමට අග්රාමාත්ය ලේකම්වරයාගේ සභාපතිත්වයෙන් යුතු නිලධාරී කමිටුවක් පත් කරිමට ජනාධිපතිවරයා විසින් ඉදිරිපත් කළ යෝජනාවට අමාත්ය මණ්ඩල අනුමැතිය ලැබුණු බවය.
” විටින් විට එක් එක් ආණ්ඩු විසින් විවිධාකාර බඳවා ගැනීම් සිදුකරලා තියනවා. පහුගිය ආර්ථික අර්බුදය නිසා බඳවාගැනීම් මුලුමනින්ම නතර කරලා තියනවා. මේ අනුව මහජනතාවට සේවාව සැපයීමේ දී ඒ එ් දෙපාර්තමේන්තු සංස්ථා ද ඇතුළත්ව විවිධාකාරයේ අර්බුද පැන නැගිලා තියනවා. ”
“මේ තත්ත්ව හඳුනගත්ත කැබිනට් මණ්ඩලය මහජනතාවට උපරිම කාර්යක්ෂම සේවාවක් ලබා දීම සඳහා දැනට මේ බඳවා ගැනීම් ක්රියාවලිය සමාලෝචනය කරන්නත්, සේවා අවශ්යතා අනුව නව කාර්ය මණ්ඩලය ස්ථානගත කරන්නත් වැනි කරුණු කීපයක් මුල් කරගෙන තමයි මේ කමිටුව පත් කළේ. එම කමිටු වාර්තාව අනුව රාජ්ය සේවයේ ප්රතිසංස්කරණ කරන්න බලාපොරොත්තු වෙනවා.”
මේ සිදුවන්නේ විවිධ දේශපාලන අවශ්යතා මත බඳවා ගැනීම් සිදුකර ඇති බවට නිර්දේශ කර රාජ්ය සේවයේ කප්පාදුවක් සිදුකිරීමට උත්සාහයක් දැයි මාධ්ය විමසූ විට අමාත්යවරයා පැවසුවේ එවැනි කිසිම අදහසක් නොමැති බවය.
“බඳවා ගැනීම් සමාලෝචනයෙන් රජයේ රැකියා කප්පාදුවක් වෙන්නේ නෑ. රජය අපේක්ෂා කරන්නේ මේ බඳවා ගත්ත අය විධිමත් ආකාරයකට කාර්යක්ෂමව සේවයේ යෙදවීම”
” පසුගිය වකවානුවල විශාල වශයෙන් පහළ ශ්රේණ්වල බඳවා ගැනීම් සිදුකර තිබෙනවා. මගේ අමාත්යාංශවන සෞඛ්ය අමාත්යාංශය බැලුවොත් අමාත්යාංශයේ හෝ රෝහල් අවශ්යතාවයන් අනුව නොවෙයි පහළ ශ්රේණිවල අය බඳවාගෙන තියෙන්නේ,,.. දේශපාලන උවමනාවන් මත. ඒ නිසාම ඒ අය ස්ථාන මාරු කිරීමේ දීත් බරපතල ප්රශ්න තියනව. වැඩිම ප්රමාණයක් ඉන්නේ ඉන්නේ පොලොන්නරුව, නුවර, බදුල්ල සහ කළුතර කට්ටිය.”
“මේ බඳවා ගැනීම් රටේ ජනතාවගේ අවශ්යතා මත විධිමත්ව ස්ථානගත කරන්න ඕන. බඳවා ගැනීම් කරලා තියෙන්නේ අත්යාවශ්ය පුරප්පාඩුවලට නෙමෙයි. තාක්ෂණික අංශයේ පුරප්පාඩු ගණනාවක් සෞඛ්ය අමාත්යාංශයේ අධ්යාපන අමාත්යාංශයේ තියනවා. රජය අත්යාවශ්යායවශ්ය බඳවා ගැනීම් කරනවා. දැනට ඉන්න සේවකයින් පිළිබඳ සමාලෝචනය කරන්නයි මේ කමිටුව දාලා තිබෙන්නේ. ”
කප්පාදුව එන්නේ සමාලෝචනය නමට මුවා වෙලාදැයි මාධ්යය විමසුවේය.
“රැකියා කප්පාදුවකට යන්න බලාපොරොත්තුවක් නෑ. මොන විදිහට බඳවා ගැනීම කළත් රජයේ සේවයට ඔවුන් බඳවාගෙන තියනවා. ඒ මත ජීවිතයක් සැලසුම් කරනවා . ජීවිත අඩාල කරන්න අපි කටයුතු කරන්නේ නෑ. රටේ භාණ්ඩාගාරය ඔවුන් වෙනුවෙන් විශාල මුදලක් වැය කරනවා. එබැවින් ඔවුන් මහජන සේවයක් සඳහා උපරිමව යොදවා ගැනීමයි මේ අදහස.”
