මේ රජය ගොඩනඟන්න එක්වූ නාමික වියතුන් මෙන් නොව සැබෑ බුද්ධිමත් ක්රියාකාරී ප්රායෝගිකව අත්හදා බැලීම් සිදුකොට ඇති බුද්ධිමතුන් එක්කර ගනිමින් රටේ පවතින අර්බුදකාරී තත්වය මැඬලන්නට වහා කටයුතු කරන්න යැයි රජයට බල කිරීමට සිවිල් සංවිධාන එකමුතුව සැලසුම් කර තිබේ.
රටපුරා ජනතාව පෝලිම් ගැසී පාරට වැටෙන විට හමුදාව හෝ ආරක්ෂක අංශ යොදවා ජනතාව පාලනය කිරීමට රජය ගන්නා උත්සාහය වක්රාකාරව මිලිටරිකරණයේ ප්රතිඵලයක් දැයි ශ්රී ලංකා සිවිල් සංවිධාන එකමුතුවේ ප්රධාන විධායක අධ්යක්ෂ ආචාර්ය නිරෝෂන් ඒකනායක විමසා සිටී.
ඔහු වැඩිදුරටත් මෙසේ කීය.
” අපි ඇත්තෙන්ම මේ වෙලාවේ එකමුතු වෙලා ඉන්නේ රටේ ජනතාවට සාධාරණයක් ඉටු කරන්න. මේ තත්ත්වය තවදුරටත් මේ විදිහටම ඉදිරියට ගියහොත් මිනිස්සු පොලු මුගුරු අරගෙන පාරට බැහැලා පාලකයින්ට පන්න පන්න ගහන කාලය වැඩි ඈතක නැහැ.“
අපි මේ මැදිහත්වන්නේ එවන් අනර්ථකාරී තත්වයක් ඇතිවීමේ ඉඩකඩ වළක්වා කළ යුතු පිළියම් මොනවාද කියා රජයට යෝජනා ඉදිරිපත් කරන්න.
රටේ ජනතාව පාලනය කරන්නට අද වන විට මිලිටරිකරණයක් සිදුකර ඇති බව පේන්න තියෙනවා. එවන් තත්ත්වයක් ඇතිවීම රටට එච්චර සුබදායක නැහැ. තුනෙන් දෙකේ බලය තිබූ පමණින් මේ රටේ ජනතාවට මේ තරම් පීඩාවක් ඇති කරන්න ඔවුන්ට ඉඩක් නැහැ.
අද තිබෙන්නේ ජනතාවට අතිශය දුෂ්කර ලෙස ජීවත්වීමට සටනක් කරන්නයි. පෝලිම් වල ඉන්නවා විනා මිනිස්සුන්ට නිදහසේ තම සිතිවිලි පාලනය කරමින් තමන්ට හෝ රටට සංවර්ධනයක් වන වැඩපිළිවෙළට දායක වෙන්න ඉඩක් වත් නැහැ. මේ තත්ත්වය වහා නතර කිරීමට සමස්ත ජනතාවම එක්රොක් විය යුතුයි
