අලුත්කඩේ මහේස්ත්රාත් අධිකරණ සංකීර්ණයේ නඩු භාණ්ඩ ගබඩාවෙන් හෙරොයින් කිලෝවක් සොරකම් කිරීමේ සිද්ධියක් සම්බන්ධව සැකපිට අත්අඩංගුවට ගෙන බන්ධනාගාර ගත කළ එම ගබඩාවේ හිටපු භාරකරු රිමාන්ඩ් බන්ධනාගාරයේ සිටිය දීත් දිනපතා පැමිණ නඩු භාණ්ඩ ගබඩාවේ රාජකාරි කරන බව වාර්තා වේ.
මෙම සැකකාර සේවකයා බන්ධනාගාර බසයෙන් අධිකරණ සංකීර්ණය වෙත දිනපතා පැමිණ සවසට බන්ධනාගාර බස් රථයෙන්ම ආපසු යන බව ද අධිකරණ සංකීර්ණය පුරා මාංචු නොමැතිව සැරිසරන බව ද මේ සම්බන්ධව අදහස් දක්වන නීතිඥවරු සඳහන් කරති.
ඔහු දවසේ වැඩි කාලයක් භාණ්ඩ ගබඩාවේ ගත කරන බව ද ඔවුහු කියති.
මෙම නඩු භාණ්ඩ ගබඩාවේ කෝටියකට ආසන්න රත්තරන් තොගයක් ව්යාජ මහේස්ත්රාත් නියෝගයක් ඉදිරිපත් කරමින් කිසියම් පුද්ගලයෙක් විසින් රැගෙන යන ලදැයි කියන සිද්ධියක් සම්බන්ධව අපරාධ පරීක්ෂණ දෙපාර්තමේන්තුව පරීක්ෂණ ආරම්භ කර ඇත.
මේ පිලිබඳව බන්ධනාගා කොමසාරිස් චන්දන ඒකනායක පවසන්නේ නඩු භාණ්ඩ ගැන හොඳින්ම දන්නේ ඔහු නිසා ඒවා නිදහස් කිරීමට සිදුවන අවස්ථාවල රිමාන්ඩ් භාරයේ සිටින සැකකරු නඩු භාණ්ඩ ගබඩාවට යොමු කරන ලෙස අධිකරණ නියෝගයක් තමන්ට ලැබී ඇති බවය.
එම නියෝගය සම්බන්ධයෙන් බන්ධනාගාර කොමසාරිස් ජනරාල්වරයා සමග ද සාකච්ඡා කර ඔහු අදාල කටයුත්ත සඳහා යොමු කළ බව චන්දන ඒකනායක කියයි.
ලංකාදීප –
