ජාලිය වීරක්කොඩි –
ක්රිකට්වල ආශ්චර්යය සිදුවන්නේ නැත. හෙට අනිද්දා දෙක ගලන්නට නොවැස්සොත් ශ්රී ලංකා කණ්ඩායමට තෝරා ගැනීම් දෙකක් ඇත.
-
ඉනිමකින් පරාජය වෙනවා ද?
-
ඉනිම බේරාගෙන පරාජය වෙනවා ද?
තරගයේ දෙවැනි දිනය වැස්සට සේදී ගියේය. දින තුනකින් නිමා වෙන්නට ගිය තරගය වැස්ස නිසා යන්තම් දින හතරකට වැඩියෙන් ඇදෙන ලකුණු පෙනේ. පකිස්ථානය තුන්වන දිනය නිමා වනවිටට ලකුණු 563කි. කඩුළු 05ක් පමණක් දැවී ගොස් ඇත. දැනට පකිස්ථාන කණ්ඩායම ශ්රී ලංකා කණ්ඩායමට වඩා ලකුණු 397ක් ඉදිරියෙනි.
අසිත ප්රනාන්දු ලකුණු 133කට කඩුලු 03කි. ප්රභාත් ජයසූරිය ලකුණු 181කට කඩුළු 02කි.
වඩාගෙන ගහනවා කියන්නේ මේ ගැහිල්ලටය. මේ ගහන්නේ පිතිකරුවන්ගේ තන තීරුවක යැයි කියන්නට කට අරින්නට බැරිය. කාසියේ වාසිය දිනාගෙන මුලින්ම පන්දුවට පහර දුන් ශ්රී ලංකා කණ්ඩායම පළමු දිනයේ දිවා ආහාරය නිමා වී ටික වෙලාවකින් පන්දු ඕවර 48ක දී ලකුණු 166කට දැවී ගොස් තිබුණ හෙයිනි.
කිසිම කතාවක් නැත. මේ දිස්වන්නේ පකිස්ථානයේ ක්රිකට් වික්රමය ය. ගාල්ලේදී දිනා ගන්නට බැරි වූ තරගය එස්.එස්.සී පිටියේදී පහසු නොවන බව ක්රිකට් නාඩිය ඇති ඕනෑම එකෙක් දන්නේය. එහෙත් එය මේ තරම් විනාශකාරී පීඩනයක් වෙතැයි කිසිවෙක් කල්පනා කළේ නැත. මේ ගැහිල්ල ගහන්නේ වඩාගෙනය. පරාජය වුවත් පිළිගත හැකි සාධාරණ ප්රවේශයකින් පැමිණිය යුතුය.
අපට නොතේරෙන මොකක් හෝ කෙළවීමක් කෙළ වී තිබේ. මේ ෆේල් වීම ඒ තරම් අස්වාභාවිකය.
ආරම්භක පිතිකරු අබ්දුල් ෂාෆිකියු පන්දු 326කට මුහුණ දී හතරේ පහර 19ක් සහ හයේ පහර 04ක් සමග ලකුණු 201ක් රැස් කරගත්තේය.
ආඝා සලමන් පන්දු 148කට මුහුණ දී හතරේ පහර 15ක් සහ හයේ පහරක් සමග නොදැවී ලකුණු 132කි. තවමත් ඔහු පිටියේ ය. ශාන් මසූඩ් පන්දු 47ක දී ලකුණු 51ක් ලබා ගත්තේය. ගාල්ලේ දී ද්විත්ව ශතකයක් ලබා ගත් සවුද් ශකීල් ලකුණු 57කි. ශකීල් ලෝක වාර්තාවක් තිබ්බේය. තමන් මෙතෙක් ක්රීඩා කළ මුල්ම ටෙස්ට් තරග හතේදීම ඔහු ක්රීඩා කළ සෑම ඉනිමකම ලකුණු 50 ඉක්මවා ලබමිනි. මුල්ම විදේශ සංචාරයේ දී ද්විත්ව ශතකයක් වාර්තා කළ දෙවැනි පකිස්ථාන ක්රීඩකයා ඔහුය.
හෙට දිනයත් ඉතිරිය. අනිද්දාත් ඉතිරිය. මොනවා කරන්නදැයි බලන අපට තේරෙන්නේ නැතිනම් ගහන දිමුත්ලාට උතුර දකුණ මාරුවී තිබෙනවා වන්නට පුලුවන.
දිමුත් කරුණාරත්න නායකත්වයෙන් යන බව කීවත් මව් රටේදීම මෙතරම් කුජීත වී සමුගන්නට සිදුවහොත් එය අවාසනාවකි. දිමුත් අපට අභිමානවත් ජයග්රහණ රැසක් ලඟා කර දුන් නායකයා ය. ලෝක ටෙස්ට් ශ්රේණිගතකිරීම්වලදී අවස්ථා ගණනක අංක එකට පැමිණි ක්රීඩකයා ය. තමන් සතුව ඇති ක්රිකට් පරිචය, විශ්වාසය සහ නායකත්වයේ වගකීම දරාගෙන නොපෙනෙන ඈත දුරකින් අඳුරු තිතක් සේ ඇඳී මැකෙන තරගය ජය පරාජයෙන් තොරව බේරා ගැනීමට කණ්ඩායම මෙහෙයවීමේ අතිශය සුලු අවකාශයක් දිමුත්ට ඉතිරිව තිබේ.
ක්රිකට්වලටම නාකි වූ ඈන්ජලෝ මැතිවුස්, අනාගතයේ කෝලි වගේ වනු ඇතැයි කී කුසල් මෙන්ඩිස්, බොහෝ අත්දැකීම් සහිත දිනේෂ් චන්දිමාල්, අලුත්ම ටෙස්ට් සොයා ගැනීම වූ නිශාන් මධුෂ්ක, සධීර සමරවික්රම දැන් මේ රටට යුතුකම් ඉටු කළ යුතුය. ඔවුන් මේ සෙල්ලම් කරන්නේ අපි වැන්නන් කෝටි දෙකක් නියෝජනය කරමිනි. ධනංජය මේ තරගාවලියේ දී සිදුකළ හුදකළා සටන නොවන්නට අපි මීටත් වඩා අජූතය.
දැන් රට ඉල්ලන්නේ ජයග්රහණයක් නොවේ. ගෞරවණීය පරාජයකි. දිමුත්… ඔබට එය කළ හැකි ද?
