දිට්වා සුළි කුණාටුව හේතුවෙන් ඇති වූ ආපදා අවම කරගැනීමට අපොහොසත් වීම තුළින් සිය මූලික මිනිස් අයිතිවාසිකම් උල්ලංඝණය කර ඇති බවට තීන්දුවක් ලබා දෙන ලෙස ඉල්ලා මහනුවර නීතිඥවරයෙක් ගොනුකළ මූලික අයිතිවාසිකම් පෙත්සම ජූලි 15 වැනිදා කැඳවන ලෙස ශ්රේෂ්ඨාධිකරණය අද (16) නියෝග කළේය.
නීතිඥ කීර්ති බණ්ඩාර කිරිදෙන ගොනු කළ එම පෙත්සම කැඳවනු ලැබුවේ අග විනිසුරු ප්රීති පද්මන් සූරසේන සහ අචල වෙග්ප්පුලි යන ශ්රේෂ්ඨාධිකරණ විනිසුරු මඩුල්ල ඉදිරියේ දී ය.
පෙත්සම්කරු වෙනුවෙන් පෙනී සිටි ජනාධිපති නීතිඥ උපුල් ජයසූරිය අධිකරණය ඉදිරියේ කරුණු දක්වමින් කියා සිටියේ අදාල කාල සීමාවේ වැසි තත්ත්වය වර්ධනය විය හැකි බවට කාලගුණ විද්යා දෙපාර්තමේන්තුව නොවැම්බර් මස 12 වැනිදා සිට පුරෝකථන ඉදිරිපත් කළ බවට සඳහන් කරමිනි.
ඉකුත් නොවැම්බර් 21 වැනිදා වැසි තත්ත්වය පැහැදිලිව වර්ධනය වී තිබිය දී මේ සම්බන්ධව සැලකිලිමත් නොවී එදින රාත්රී 11ට පමණ කොත්මලේ ජලාශයේ වාන් දොරටු විවෘත කර විශාල ජල කඳක් මුදා හැරුණු අතර එහි ප්රතිඵලයක් ලෙස පසුදා අළුයම 3 පමණ වනවිට ගම්පොල ප්රදේශය සම්පූර්ණයෙන්ම ජලයෙන් යටවූ බව ද ජනාධිපති නීතිඥවරයා කියා සිටියේය.
ඔහු සඳහන් කළේ ඉන් පසු ගෙළි ඔය මහනුවර සහ පේරාදෙණිය යන ප්රදේශ ක්රමාණුකූලව ජලයෙන් යට වූ බවය.
කාලගුණ විද්යා දෙපාර්තමේන්තුව පුරෝකථන ලබා දී තිබියදීත් බලධාරීන් ඒ සම්බන්ධව නොසැලකිළිමත්ව කටයුතු කර ඇති ආකාරය ජනාධිපති නීතිඥවරයා චෝදනා කළේය.
පෙත්සමේ වග උත්තරකරුවන් ලෙස නම් කර තිබුණේ ජනාධිපතිවරයා වෙනුවෙන් නීතිපතිවරයා, අග්රමාත්ය හරිනි අමරසූරිය ඇතුළු අමාත්ය මණ්ඩල සමාජිකයින්, ජාතික ආපදා කළමනාකරණ කමිටුවේ සමාජිකයින් ඇතුළු පිරිසකි.
පෙත්සම්කාර නීතිඥවරයා පැවසුවේ තම නීතිඥ කාර්යාලය මහනුවර අධිකරණ සංකීර්ණයට යාබදව පිහිටා තිබෙන බවය. පසුගි දා ඇති වූ සුළි කුණාටු සහ ගංවතුර තත්ත්වය හේතුවෙන් එම කාර්යාලය සම්පූර්ණයෙන්ම විනාශයට පත් වූ බවය.
එහි ප්රතිඵලයක් ලෙස සිය පරිගණක පද්ධතියේ තිබූ වැදගත් දත්ත රැසක් විනාශ වී ඇති බවත් ඒ හේතුවෙන් සිය වෘත්තියට දැඩි පාඩුවක් සිදුවී ඇති බවත් නීතිඥවරයා පෙන්වා දෙන්නේය.
ආපදා තත්ත්වය ඇතිවීමට පෙර ගත යුතු ක්රියාමාර්ග පිළිබඳව වගඋත්තරකරුවන්ගේ නොසැලකිලිමත් භාවය හෝ රාජකාරිය පැහැර හැරීම හේතුවෙන් මෙවැනි විනාශකාරී උද්ගත වූ බව පෙත්සම් කරු පෙන්වා දෙන්නේය. ඔවුන් පෙර සූදානමින් කටයුතු කර තිබුණේ නම් පෙර සූදානම අවම කරගතහැකිව තිබූ බව පෙත්සමේ සඳහන් වී ඇත.
