කොවිඩ් ආසාදිතයන් හඳුනාගැනීමේ රැපිඩ් ඇන්ටිජන් පරීක්ෂාවන්ට අවශ්ය කට්ටල ගෙන්වීමට ඩොලර් හිඟය බලපා ඇති බවත් දැනට පවතින පරීක්ෂණ කට්ටල කළමනාකරණය කර ගැනීම සඳහා රෝහල්වලට පැමිණෙන රෝගීන් අතරින් අත්යවශ්යම පුද්ගලයන්ට පමණක් මෙම පරීක්ෂණය සිදු කරන ලෙස රජය මඟින් සියලුම රෝහල්වලට උපදෙස් ලබා දී ඇති බව ඖෂධ නිෂ්පාදන සැපයුම් සහ නියාමනය පිළිබඳ ව රාජ්ය අමාත්යංශ ලේකම් වෛද්ය සමන් රත්නායක මහතා ලංකාසර ට පැවසීය.
ලංකාසර විසින් කරන ලද විමසීමකදී පිළිතුරු දුන් රාජ්ය අමාත්යංශ ලේකම්වරයා දැනට රට තුළ රැපිඩ් ඇන්ටිජන් කට්ටල ලක්ෂයක් පමණ පවතින අතර සැත්කමකට ලක් වන අයට , නාසයේ හෝ උගුරේ, කටේ යම් රෝගී තත්ත්වයක් හෝ රෝග ලක්ෂණයක් පෙන්නුම් කරන රෝගීන් එන්ඩස්කොපි පරික්ෂණයක් වැනි වයිරසය තවත් කෙනෙකුට බෝවිය විය හැකි අවදානම් අයට පමණක් රැපිඩ් ඇන්ටිජන් පරීක්ෂාවන් සිදු කළ යුතු බවට උපදෙස් ලබා දී තිබුණද රෝහල්වලට ඒන රෝගීන්ට ඉවක් බවක් නැතිව මෙම පරීක්ෂණය සිදුරන බව ඔහු සඳහන් කළේය. ඒය අනවශ්ය ක්රියාවක් බවද ඔහු අවධාරණය කළේය.
කෙසේ වුවද සෞඛ්ය අංශ ආරංචි මාර්ග සඳහන් කරන්නේ මේ වනවිට මෙරට රෝහල් පද්ධතිය පුරා දැඩි රැපිඩ් ඇන්ටිජන් පරීක්ෂණ කට්ටල හිඟයක් වාර්තා වන බවය. කිසිදු රෝහලක ප්රමාණවත් තරම් කට්ටල නොමැති බවත් පවතින හිගය මත පරීක්ෂණ කට්ටල 30,000ක් පමණක් රජයේ රෝහල් වෙත ලබා දී ඇතත් දැනට රට තුළ පවතින කොවිඩ් රෝග ලක්ෂණ පෙන්නුම් කරන රෝගීන් ප්රමාණය සහ රෝහල්වල අත්යවශ්ය අයුරින් කළ යුතු පරීක්ෂාවන් පිළිබඳව සැලකීමේදී මෙම ප්රමාණය සෑහෙන්නේ දිනකට පමණ බවත් සෞඛ්ය අංශ ආරංචි මාර්ග සඳහන් කරයි. මෙම ආරංචි මාර්ග පෙන්වා දෙන්නේ කොවිඩ් පරීක්ෂණ කට්ටවලට අමතරව ඩෙංගු පරීක්ෂණ කට්ටලවලද දැඩි හිඟයක් පවතින බවය.
කෙසේ වුවද රාජ්ය අමාත්යංශ ලේකම් වෛද්ය රත්නායක ප්රකාශ කළේ මේවනවිටත් රජය කොවිඩ් පරීක්ෂණ කට්ටල මිලියන හතක් ඇණවුම්කර ඇතත් ඒ්වා ගෙන්වීමට පවතින ඩොලර් හිඟය හේතුවක් වී ඇති අතර ඒ් තුළ යම් ප්රමාදයක් පවතින බවය
