ඉන්දියාවේ මුම්බායි නුවර සිට කටුනායක ගුවන්තොටුපොළ වෙත ශ්රී ලංකන් ගුවන් යානයක පැමිණි ගුවන් මගියෙකු, යානයේ ගුවන් සේවිකාවන්ට ලිංගික අඩන්තේට්ටම් කර මගීන්ට කරදරකාරීව හැසිරීම හේතුවෙන් අත්අඩංගුවට ගෙන තිබේ.
අද (12) අලුයම ගුවන් තොටුපොළ පොලීසිය මඟින් අදාළ මගියාව එලෙස අත්අඩංගුවට ගෙන කොළඹ මහේස්ත්රාත් අධිකරණය වෙත ඉදිරිපත් කිරීමට තීරණය කර තිබේ.
මොහු ස්වීඩනයේ ද පුරවැසි භාවය සහිත යාපනය, නාගද්වීපය ප්රදේශයේ පදිංචි, ද්විත්ව පුරවැසියෙකි. වයස අවරුදු 65ක් පමණ වන මේ තැනැත්තා අද අලුයම 12.45ට ඉන්දියාවේ මුම්බායි නුවර සිට ශ්රීලන්කන් ගුවන් සේවයේ UL-144 දරන ගුවන් යානයෙන් කටුනායක ගුවන් තොටුපොළ වෙත පැමිණෙමින් සිටියදී, අධික ලෙස මත්පැන් පානය කර මෙම අවකල් හැසිරීම ප්රකට කර ඇත.
ඉන් අනතුරුව එම ගුවන් යානය තුළ සිටි මගීන්ට කරදර වන ආකාරයට හැසිරීමට පටන් ගෙන ඇති අතර පසුව එම යානය තුළ සේවය කළ ගුවන් සේවිකාවන් දෙදෙනෙකු වෙත ලිංගික අඩන්තේට්ටම් කිරීමට ද ඔහු තැත් කර ඇත.
පසුව ගුවන් යානයේ ආරක්ෂක නිලධාරීන් ඔහු මැඩ පවත්වා තිබූ අතර, මෙම සිදුවීම පිළිබඳව, ගුවන් නියමුවා දැනුවත් කිරීමට ද පියවර ගෙන තිබුණි.
ඒ අනුව සිදුකළ දැනුවත් කිරීම අනුව ගුවන් යානය කටුනායක ගුවන් තොටුපොළ වෙත ගොඩ බැස්ස වූ පසුව, ශ්රීලන්කන් ගුවන් සේවයේ ආරක්ෂක නිලධාරීන්, ගුවන් තොටුපොළ පොලීසිය සමග පැමිණ, මෙම ගුවන් මගියා අත්අඩංගුවට ගෙන තිබේ.
ගුවන් මගියාව පොලීසිය විසින් වෛද්ය පරීක්ෂණයක් සඳහා යොමු කර තිබූ අතර, එහිදී මොහු මත්පැන් පානය කර ඇති බවට කරුණු සනාථ වී ඇත.
ඒ අනුව මොහු අද දින කොළඹ ප්රධාන මහෙස්ත්රාත් අංක 01 අධිකරණය වෙත ඉදිරිපත් කිරීමට නියමිතය. ( දෙරණ)
