බාල ගල් අඟුරු වංචාව සම්බන්ධව පැහැදිලි පරීක්ෂණයක් නොකර මේ හරහා සිදුවන පාඩුවක් වේ නම් එය ජනතාවගෙන් අය කරගැනීමට රජය කටයුතු කළහොත් රජයට එරෙහිව ජනතාව මහ පාරට බස්සවන බව විපක්ෂ නායක සජිත් ප්රේමදාස අද (20) පාර්ලිමේන්තුවේ දී පැවසුවේය.
අද පාර්ලිමේන්තුවේ දී පැවැත්වුන ගල් අඟුරු ටෙන්ඩරය සම්බන්ධ විවාදයට එක් වෙමින් විපක්ෂ නායකවරයා පැවසුවේ මේ රජය බරපතල දූෂණයක් සිදුකර ඇති බවය.
විපක්ෂ නායකවරයා මෙසේ ද කීවේය.
“මේ අවස්ථාවේ දී ගල් අඟුරු දූෂණය ගල් අඟුරු වංචාව ගල් අඟුරු ඛේදවාචකය ගැන සභාව කතා කරන අවස්ථාවේ දී කිව යුතුයි. දළ වශයෙන් රටට වාර්ෂිකව ගල් අඟුරු නැවු 37ක් ඕන. දැනට ගල් අඟුරු 11ක් ඇවිත් තියනවා. ඒවා රුසියානු ගල් අඟුරු. රුසියානු ගල් අඟුරුවල ප්රමිතියේ ගැටලුවක් සිදු වෙලා නෑ.”
“නමුත් අලුත් ටෙන්ඩරය හරහා ගෙනාපු දකුණු අප්රිකානු ගල් අඟුරු පිළිබඳව ගැටලුව තිබෙන්නේ. “
“අලුත් ටෙන්ඩරය හරහා නැවු 25ක් ඇනවුම් කරලා තියනවා කියලා දැනගන්න ලැබුණා. සැප්තැම්බර් සිට අප්රේල් දක්වා කාලයේ දී පමණයි ගල් අඟුරු රටට ගෙන්වන්න පුලුවන්. ඒ නිසා අප්රේල් මාසයේ ටෙන්ඩරයේ වැඩ කටයුතු අවසන් කරනවා. නව ටෙන්ඩරය යටතේ මෙතෙක් බාපු නැව් 08ම තියෙන්නේ බාල ගල් අඟුරු.”
“බාල ගල් අඟුරු නිසා බලාපොරොත්තු වුනාට වඩා වැඩි ගල්අඟුරු ප්රමාණයක් ඇනවුම් කරන්න වෙනවා. හිඟයක් ඇති වෙනවා තවත් පැත්තකින්. එක්කෝ වැඩිපුර ගල් අඟුරු ගෙන්වන්න සිද්ධ වෙනවා. නැතිනම් ඩීසල් වලින් විදුලිය නිපදවන්න ගිහින් ඩීසල් බලාගාර මාෆියාවට යට වෙන්න සිද්ධ වෙනවා.”
“අවසානයේ පාරිභෝගිකයාට මේ මිල ගෙවන්න සිද්ධ වෙන්නෙ. අප්රේල් මාසයේ විදුලි බිල වැඩි කළ යුතුයි කියන යෝජනාවක් මේ රජය ගෙනත් තියනවා. අප්රේල් මාසයේ පමණක් නොවෙයි, පැහැදිලිවම කියන්න ඕන ඊට පසුවත් තවත් වතාවක් විදුලි බිල වැඩි වෙනවා කියලා මේ සංඛ්යාලේඛණවලින් පෙන්වනවා.”
“බාල ගල් අඟුරුවලින් උපකරණවලටත් අනිවාර්යයෙන් හානි වෙනවා. පැහැදිලිවම බාල ගල් අඟුරු ගෙන්නලා තියෙන්නේ. මේක ඔප්පු කළේ විද්යාත්මක දත්තවලින්. රවට්ටන්න බැරි රියල් ටයිම් දත්තවලින්. ඒ නිසා පැහැදිලිවම අපි රජයෙන් ඉල්ලීමක් කරනවා මේ ගල් අඟුරු කේන්ද්රීයව සිදුවන දූෂණය සම්බන්ධව පැහැදිලි පරීක්ෂණයක් පවත්වන්න කටයුතු කරන්න. “
“අනිවාර්යයෙන් අපි කිසි ලෙසකට මේ ගල් අඟුරු දූෂණය හරහා සිදුවුන පාඩුව පාරිභෝගිකයාගෙන් අය කරගන්න ඉඩ තබන්නේ නෑ. අපි මේ රටේ විදුලි පාරිභෝගිකයින්ව මහ පාරට බස්සලා පාරිභෝගිකයාට සිදුවුන අවාසිය, හානිය අමාත්යවරයා ප්රමුඛ රජයෙන් ලබා ගන්න කටයුතු කරනවා.
විපක්ෂ නායකවරයා කීවේය.
