දූෂණ චෝදනා මත අත්අඩංගුවට ගෙන රක්ෂිත බන්ධනාගාරගත කර සිටි ජාතික ජලසම්පාදන හා ජලාපවහන මණ්ඩලයේ අතිරේක සාමාන්යාධිකාරී දර්ශන මැදවත්ත ඇතුළු සැකකරුවන් තිදෙනෙකු ඇප මත මුදා හැරීමට කොළඹ ප්රධාන මහේස්ත්රාත් අධිකරණය අද (20) නියෝග කළේය.
මෙම නඩුව කොළඹ ප්රධාන මහේස්ත්රාත් අසංග එස්. බෝදරගම ඉදිරියේ කැඳවූ අවස්ථාවේදී, එක් සැකකරුවෙකුට රුපියල් ලක්ෂ 50 බැගින් වූ ශරීර ඇප දෙකක් මත ඔවුන් මුදා හැරීමට මහේස්ත්රාත්වරයා නියෝග කළේය.
මෙහිදී අධිකරණයේ පෙනී සිටි අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරීන් විසින් අදාළ විමර්ශනවල ප්රගතිය දැක්වෙන සවිස්තරාත්මක වාර්තාවක් ඉදිරිපත් කරන ලදී.
සැකකරුවන්ට ඇප ලබා දීම සම්බන්ධයෙන් විමර්ශන නිලධාරීන්ගෙන් අධිකරණය විමසා සිටි අතර, ඒ සඳහා තමන්ගේ විරෝධයක් නොමැති බව විමර්ශන නිලධාරීහු අධිකරණයට දන්වා සිටියහ.
ඇප ලබා දීමට අමතරව සැකකරුවන්ට විදේශ ගමන් තහනමක් පැනවූ මහේස්ත්රාත්වරයා, ඔවුන්ගේ විදේශ ගමන් බලපත්ර අධිකරණයට භාර දිය යුතු බවට ද නියෝග කළේය.
මෙම සැකකරුවන්ට එරෙහිව චෝදනා එල්ල වී ඇත්තේ ජාතික ජලසම්පාදන හා ජලාපවහන මණ්ඩලයේ සභාපතිවරයා වෙත අයුතු වාසියක් සලසා දීම සම්බන්ධයෙනි.
නිල වාහන දෙකක් පරිහරණය කරමින් සිටි සභාපතිවරයා වෙනුවෙන් ටොයෝටා ප්රාඩෝ (Toyota Prado) වර්ගයේ වාහනයක් කුලී පදනම මත ලබා ගැනීමට කටයුතු කිරීම හරහා රජයට රුපියල් මිලියන 12.75ක (ලක්ෂ 127.5ක) මූල්ය අලාභයක් සිදු කිරීම මොවුන්ට එරෙහි දූෂණ සහ කුමන්ත්රණ චෝදනාවල පදනම වී තිබේ.
මෙම නඩුව නැවතත් මැයි මස 29 වනදා කැඳවීමට නියමිතයි.
