ශ්රියානි විජේසිංහ –
හදිසි හෘදයාබාධ රෝගීන් ඇතුළු විශේෂ රෝගී අවස්ථාවල රුධිර කැටි ගැසීම වැලැක්වීම සඳහා ලබාදෙන එනොක්සපරින් (Enoxaparin) නැමැති ඖෂධය මිලදී ගැනීමේ දී ඖෂධ තොගය සඳහා සාමාන්ය මිලට වඩා එකසිය විසි නව ලක්ෂ හැට දහසකට ආසන්න මුදලක් අඩුවෙන් ගෙන්විමට කැමැත්ත පළ කළ සමාගමට ටෙන්ඩර් ක්රියාදාමයට ඇතුළත් වීමට නොහැකි වන ලෙස ලිපිගොනු ප්රමාද කළ ඖෂධ නියාමන අධිකාරියේ සියලුම නිලධාරීන් සම්බන්ධයෙන් වහාම පරික්ෂණයක් පවත්වන ලෙස විශේෂඥ වෛද්ය චමල් සංජීව ජනාධිපතිවරයාගෙන් විශේෂ ඉල්ලීමක් කරයි.
ආරංචි මාර්ග පවසන්නේ එනොක්සපරින් (Enoxaparin) ඖෂධ එක් කුප්පියක් ඩොලර් 4ක මුදලකට කුප්පි 240 000ක් වෙනුවෙන් මුලින්ම ටෙන්ඩරයක් ඉදිරිපත් වි තිබුණු බවය. එහෙත් එම සමාගම වෙනුවට එක් කුප්පියක් ඩොලර් 1.40ක මිලකට ලබා දීමට තවත් සමාගමක් ඉදිරිපත් වී ඇත. ඖෂධය එම සමාගමෙන් මිලදී ගැනීමට එකඟ වී ඇති මොහොතක එම ඖෂධයම ඩොලර් 1.22ට ලබා දීමට තවත් සමාගමක් ඉදිරිපත් වී තිබේ. සාකච්ඡා කර ඩොලර් 1.22ක මිල තවදුරටත් අඩුකර ගැනීමේ හැකියාව තිබු බව සචින් සේමගේ උපුටා දක්වමින් වෛද්ය චමල් සංජීව ලංකාසරට පැවසුවේය.
ඖෂධ නියාමන අධිකාරියේ විධායක අධ්යක්ෂ සචින් සේමගේ ඉල්ලා අස්වීමට ආසන්න කාලයේදී මෙම මිලදී ගැනීමට සිය එකඟතාව පළ කර අදාල සමාගම ලියාපදිංචියට අවස්ථාව ලබා දීම අනුමත කර ඇත. එහෙත් ඖෂධ නියාමන අධිකාරියේ ඇතැම් නිලධාරීන් නිසා එම ටෙන්ඩරය වැලකී ගොස් ඇත.
මෙම ටෙන්ඩරය ප්රධානයට දැනටමත් කටයුතු යොදා ඇති බවත්, ටෙන්ඩර් ගනුදෙනුව වහාම අවලංගු කොට රජයට රුපියල් මිලියන හත්සීයකට අධික පාඩුවක් සිදුකිරීම සඳහා සිතාමත් හා යම් කුමන්ත්රණයක් සිදු වූයේ නම් එයට වගකිවයුතු ඖෂධ නියාමන අධිකාරියේ සියලු නිලධාරීන් නීතිය හමුවට ගෙන එන ලෙසත් ඔහු ජනාධිපතිවරයාගෙන් ඉල්ලා සිටියි.
