මහනුවර කුණ්ඩසාල ප්රදේශයේ දී ඊයේ (12) අත් අඩංගුවට ගනු ලැබූ පිලිපීන, තායි, වියට්නාම් සහ චීන තරුණයින් 130 දෙනා කුණ්ඩසාලෙ පොලිසිය මගින් අත් අඩංගුවට ගෙන තෙල්දෙණිය මහේස්ත්රාත්වරයා වෙත ඉදිරිපත් කිරීමෙන් අනතුරුව ලබන 16 දා තෙක් ඔවුන් රක්ෂිත බන්ධනාගාරගත කිරීමට වැඩ බලන මහේස්ත්රාත් වරුණා කරල්ලියැද්ද අද (13) නියෝග කළාය.
මෙම තරුණයින් සැප්තැම්බර් 30වැනි දින සිට කුණ්ඩසාල ප්රදේශයේ හෝටලයක නවාතැන් ගෙන සූක්ෂම ලෙස අන්තර්ජාලය ඔස්සේ බැංකු තැන්පතුවලින් මුදල් සොරකම් කිරීමට කටයුතු කර ඇතැයි පොලිසිය සැක කරයි. පුද්ගලයින් 130 දෙනෙක් මෙම මෙහෙයුමේ දී අත් අඩංගුවට ගනිද්දී තරුණයින් සිවු දෙනෙක් මහවැලි ගඟට පැන පීනා ගොස් පැනගත් බව පොලිස් වැටලීම් කණ්ඩායම කියයි.
මෙම කණ්ඩායම සතුව නවීන ඇපල් පරිගණක 120ක්, ඩෙක්ස්ටොප් පරිගණක 15ක්, ස්මාට් ජංගම දුරකථන 300ක්, රවුටර් 50ක්, සහ තවත් තාක්ෂණික උපකරණ තොගයක් අත් අඩංගුවට ගෙන තිබේ. පිරිස අතර තරුණියන් 17 දෙනෙක් ද සිට ඇත.
භාෂා පරිවර්ථක ලෙස කටයුතු කර ඇත්තේ සිංහල තරුණයෙකි. ඔහුත් අත් අඩංගුවේ පසුවේ.
මින් පෙර හබරන දී ද චීන ජාතික කණ්ඩායමක් අත් අඩංගුවට ගෙන ඇත. ඒ අත් අඩංගුවට ගැනීමේ දී පලා ගිය බව කියන 26ක් කුණ්ඩසාලේ දී අඩංගුවට පත් වී තිබේ.
මේ පිරිස සංචාරක වීසා මත ලංකාවෙ රැඳී සිට ඇති අතර ඔවුන් ලැගුම් ගෙන සිටි කුණ්ඩසාලෙ හෝටලේ සුඛෝපභෝගී කාමර 47ක් ඉදිරි මාස හයක කාලයක් සඳහා මේ පිරිස විසින් වෙන් කරවාගෙන ඇත.
මේ වනතුරු ලක්ෂ පනහ ඉක්මවූ ආහාර බිල් ඔවුන් විසින් හෝටලය වෙත පියවා ඇති බව ද පොලිසිය විසින් සොයාගෙන ඇත.
මේ පිරිසගේ සැකකටයුතු රැඳී සිටිම පිළිබඳ මධ්යම පළාත් භාර ජ්යෙෂ්ඨ නියෝජ්ය පොලිස්පති ලලිත් පතිනායකට ලැබුණු උපදෙස් මත මහනුවර කොට්ටාස අපරාධ විමර්ශන අංශය ස්ථානාධිපති ප්රධාන පොලිස් පරික්ෂක තිලක් සමරනායකගේ මෙහෙයවීමෙන් කණ්ඩායම් රැසක් යොදවා මේ පිරිස අත් අඩංගුවට ගැනීමට කටයුතු කර ඇත.
කෙසේ වෙතත් මෙම අත් අඩංගුවට පත් පිරිසෙන් කිසිවෙක් ප්රකාශ ලබා දීම ප්රතික්ෂේප කරන බවත් ඔවුන්ට තම මවු භාෂාව හැර වෙනත් කිසිම භාෂා පාරිචයක් නොතිබීම ගැටලු සහගත බවත් වාර්තා වී ඇත.
එමෙන්ම මේ පිරිසට එරෙහිව මේ වනතුරුත් කිසිම පැමිණිල්ලක් ලෝකයේ කොතැනකින්වත් ලැබී නොමැති පසුබිමක අත් අඩංගුවට ගත් පිරිස අපරාධ පරීක්ෂණ දෙපාර්තමේන්තුව වෙනුවෙන් පෙනී සිටි පොලිස් සැරයන් අරුණ බංඩාර විසින් අධිකරණයට ඉදිරිපත් කර තිබේ.
මේ අවස්ථාවේ දී විත්ති කරුවන් වෙනුවෙන් නීතිඥවරුන්වන අමිත් පෙරේරා, චමල් ද අල්විස්, තාරක හීන්කෙන්ද, යන නීතිඥවරු විවෘතඅධිකරණයේ දී කරුණු දැක්වූහ.
එහිදී නීතිඥ අමිත් පෙරේරා ප්රකාශ කර තිබුණේ මේ පිරිස සම්බන්ධයෙන් මුදල් ජාවාරමක් හෝ වෙනත් කිසිම මූල්ය චෝදනාවක් නොමැති නිසා මෙම පිරිස අගතියට පත් කිරීම නුසුදුසු බවය.
චීන වියට්නාම් පිලිපීන් තායි තරුණ පිරිස් නිතරම ලංකාවට යන එන බවත්, මේ තරුණයින් අතර ලැප්ටොප්, ජංගම දුරකථන භාවිතය සහ අන්තර්ජාලය ඔස්සේ සබඳතා පැවත්වීම සාමාන්ය දෙයක් බවත්ය.
මේ පිරිස් චෝදනාවක් හෝ නිශ්චිත අපරාධ අනාවරණයක් රහිතව අත් අඩංගුවට රැගෙන සිරගත කිරීම ශ්රී ලංකාවෙ නමටත් කැළලක් සේම සංචාරක ව්යාපාරයට මින් ඍජු බලපෑම් එල්ලවන බව නීතිඥවරයා පෙන්වා දුන්නේය.
මතුවුන කරුණු සියල්ල සලකා බලා වැඩ බලන මහේස්ත්රාත්වරිය දණ්ඩනීති සංග්රහයේ 400 යටතේ පරිගණක අපරාධ පනත සහ ඔට්ටු ඇල්ලිමේ පනත යටතේ නෛතික පදනම මත මේ පිරිස රක්ෂිත බන්ධනාගාගත කරන්නැයි නියෝග කළාය.
තවත් චීන ජාතිකයින් 30 දෙනෙක් අත් අඩංගුවට…
මේ අතර වීසා රහිතව මෙරට රැඳී සිටි චීන ජාතිකයන් 18ක් මහනුවර අනිවත්ත ප්රදේශයේ දි ද චීන ජාතිකයින් 12ක් කොළඹ නුවර මාර්ගයේ පේරාදෙණිය ප්රදේශයේ හෝටලයක ද ලැගුම් ගෙන සිටියදී අත් අඩංගුවට ගනු ලැබුවේය.
අනිවත්ත ප්රදේශයෙ දී අත් අඩංගුවට ගතත් 18 දෙනා අතරින් 16 දෙනෙකුට වලංගු විදේශ ගමන් බලපත්රත් හෝ තිබී නැති බව මහනුවර සංචාරක පොලිසිය පවසයි. එම 18 දෙනා අතර කාන්තාවෝ දෙදෙනෙක් ද වෙති.
මහනුවර දි අත් අඩංගුවට ගත් 18 දෙනා සහ පේරාදෙණියේදී අත් අඩංගුවට ගත් 12 දෙනා ඇතුළු චීන ජාතිකයින් 30 දෙනා හෙට මහනුවර අධිකරණයට ඉදිරිපත් කිරීමට නියමිත බව පොලිසිය පවසයි. මේ අයද පරිගණක මූල්ය වංචාවන්ට සමබන්ධ බවට පොලිසිය සැක කරයි.
මෙම සිද්ධි සම්බන්ධව පුලුල් විමර්ශනයක් මහනුවර පොලිසිය විසින් ආරම්භ කර ඇත.
