එංගලන්තය සහ ශ්රී ලංකාව අතර පැවැත්වෙන දෙවැනි එක් දින තරගයේ පළමු අර්ධය නිමා වී ඇත. කාසියේ වාසිය දිනාගෙන පළමු පන්දුවට පහර දීම තේරූ ශ්රී ලංකා කණ්ඩායම ලකුණු 219 සීමා වී තිබේ. ඉනිමේ පන්දු 03ක් ඉතිරිව තිබිය දී සියල්ලන් දැවී ගොස්ය.
පොතේ හැටියට නම් 219ක් යනු එක් දින තරගයක දී තරගයක් දිය හැකි ලකුණු ප්රමාණයක් නොවේ. විශේෂයෙන්ම එංගලන්ත කණ්ඩායම වැනි ප්රහාරාත්මක පිතිකරණ බලඇණියක් සමග මේ ලකුණු සංඛ්යාව ආරක්ෂා කරගැනීමට නම් ශ්රී ලංකා පන්දු යවන්නන් අපේක්ෂාකළ දක්ෂතාවලින් ඉදිරියට ගොස් ආශ්චර්යයක් නිර්මාණය කළ යුතුය. බොහෝ විට අප දන්නා ආකාරයට ක්රිකට්වල ආශ්චර්යයන් අතිශයින්ම විරලය.
එංගලන්ත කණ්ඩායම ශ්රී ලංකා පිතිකරුවන් මුළුමනින්ම පාලනය කළේ දඟ පන්දු යවන්නන් යොදා ගනිමිනි. එංගලන්තය දඟ පන්දු යවන්නන් හය දෙනෙකු භාවිතා කළේය. අවසන් ඕවර 10 ඇතුළුව ඕවර 41ක් දඟ පන්දු යවන්නෝ පන්දු යැවූහ. ශ්රී ලංකා තණතිරූවල දී ඔවුන් ශ්රී ලංකාවේ ක්රමයට ගේමට පිවිස තිබේ.
චරිත් අසලංක ශ්රී ලංකාව වෙනුවෙන් වැඩිම ලකුණු ලාභියා වූයේය. ඔහු දැවී යන්නේ ලකුණු 45ක් ලබාගෙන තිබියදී ය. අවසන් පන්දු ඕවර 10 දී වේගය ඉහළ නැංවීමට ගිය චරිත් පිටියෙන් ඉවත් වූයේය.
අවසාන කඩුලු පහ ලකුණු 40කට බිඳ වැටුණි. ලකුණු 50කට වැඩි සම්බන්ධතාවයක් ගොඩ නැගුනේ එක් අවස්ථාවක පමණි. ඒ කුසල් මෙන්ඩිස් හා ධනංජය ද සිල්වා අතර සිව් වන කඩුල්ල වෙනුවෙනි.
පැතුම් නිශ්ශංක ලකුණු 26කි. කමිල් මිෂාර මේ තරගයේ දීත් අසාරථකය. ඔහු ලකුණු 5කි. කුසල් මෙන්ඩිස් ලකුණු 26ක්, ධනංජය ද සිල්වා ලකුණු 40ක්, ජනිත් ලියනගේ ලකුණු 12ක්, පවන් රත්නායක ලකුණු 29ක්, දුනිත් වෙල්ලාලගේ ලකුණු 20ක් ලැබුහ.සියල්ලන්ම පන්දු ඕවර 49.3ක දී ලකුණු 219කට දැවී ගියේය.
එංගලන්තය පන්දු යවන්නෝ 08 දෙනෙක් භාවිතා කළහ. ආරම්භක වේගපන්දු යවන්නන් වන ජෙම්ස් ඕවර්ටන් පන්දු ඕවර 05කි. එක් නිලකුණු ඕවරයක් සමග ලකුණු 21කට කඩුළු දෙකක් දවා ගනිද්දීත් ඔහුව අවසන් පන්දු ඕවර කීපය යවන්නටවත් කැඳෙව්වේ නැත. සෑම් කරන් පන්දු ඕවර 04කි. ඔහු ලබා දුන්නේ ලකුණු 16ක් පමණි. නමුත් එංගලන්ත නායක හැරී බූක් ඉතිරි 41ම යවන්නට කැඳවූයේ දඟ පන්දු යවන්නන්ය. ජෝ රූට් අවසන් පන්දු ඕවරය යැව්වේය. ලකුණු 1කට කඩුළු 02ක් දවා ගත්තේය.
ලියම් ඩෙව්සන් කඩුල්ලක්, විල් ජැක් කඩුල්ලක්, අදීල් රෂීඩ් කඩුළු 02ක්, රෙහාන් අහමඩ් කඩුල්ලක් ලැබූවේය.
මැච් එක වැන්ඩර්සේ, ධනංජය, අසලංක සහ වෙල්ලාලගේ පන්දු හමුවේ බොහෝ විට තීරණය වනු ඇත. දැනට නම් පෙනෙන විදිහට අප ඉන්නේ ගවු ගණනක් පසුපසිනි.
