සූරියවැව නුවන් ජයසේකර –
තංගල්ල – මිද්දෙණිය – කඩේවත්ත හන්දියේ ඊයේ රාත්රියේ සිදුවූ වෙඩි තැබීමෙන් වෙඩි වැදී තුවාල ලද ඔහුගේ හය හැවිරිදි දියණිය ද මියගොස් තිබේ. බරපතල තුවාල ලද 09 හැවිරිදි දරුවා මේ වනවිට ඇඹිලිපිටිය රෝහලේ ප්රතිකාර ගනිමින් ඇත.
වාර්තාවන පරිදි සිද්ධිය මෙසේය.
තංගල්ල මිද්දෙණිය පොලිස් වසමට අයත් කඩේවත්ත ප්රදේශයේ ඊයේ (18) රාත්රී සිදු කළ වෙඩි තැබීමකින් පියෙකු හා දියණියක ජීවිතක්ෂයට පත්ව පුත්රයා බරපතල තුවාල ලැබුවේය.
මෙලෙස ඝාතනයට ලක්ව ඇත්තේ මිද්දෙණිය ගල්පොත්තයාය ප්රදේශයේ පදිංචි 39 හැවිරිදි අරුණ විදාන ගමගේ නොහොත් “කජ්ජා” නැමැත්තා සහ ඔහුගේ 06 හැවිරිදි ඩබ්ලිව් .ජී.අහස්යා නැමති දියණියයි.
ඝාතනයට ලක් වූ පුද්ගලයා පෙරේදා (18) රාත්රී 10.15ට පමණ සිය පුත්රයා හා දියණිය සමඟ යතුරු පැදියෙන් ගමන් කරමින් සිටියදී මිද්දෙණිය කඩේවත්ත ප්රදේශයේදී කිසියම් පිරිසක් විසින් ඔහුට වෙඩි තබා ඇත. වෙඩි වැදීමෙන් යතුරු පැදිකරු එම ස්ථානයේදීම මිය ගිය අතර සිද්ධියෙන් බරපතල තුවාල ලැබූ ඔහුගේ 06 හැවිරිදි දියණිය ප්රතිකාර සඳහා තංගල්ල මූලික රෝහලට ඇතුලත් කෙරුණු අතර, 09 හැවිරිදි පුත්රයා ප්රතිකාර සඳහා ඇඹිලිපිටිය මූලික රෝහලට ඇතුළත් කෙරුණි .
එහිදී බරපතළ තුවාල ලබා තංගල්ල මූලික රෝහලට ඇතුළත් කෙරුණු 06 හැවිරිදි දියණියද මියගොස් ඇති අතර සිද්ධියෙන් බරපතල තුවාල ලබා ඇඹිලිපිටිය මූලික රෝහලට ඇතුළත් කර සිටින 09 හැවිරිදි පුත්රයාද දැඩි සත්කාර ඒකකය ප්රතිකාර ලබන බවයි රෝහල් ආරංචි මාර්ග පැවසුවේ.
මෙම වෙඩි තැබීම ටී 56 වර්ගයේ ගිනි අවියක් භාවිතා කර ඇති බවට මූලික පොලිස් පරීක්ෂණවලදී අනාවරණය වී තිබේ. වෙඩි තැබීමට හේතුව මෙතෙක් අනාවරණය වී නොමැත. ඝාතනයට ලක් වූ පුද්ගලයාගේ බිරිඳ ද විදෙස් ගතව සිටින අතර ඝාතනයට ලක්වූ පුද්ගලයා විසින් දරු දෙදෙනා සමග නිවසේ සිට තිබේ.
සිද්දිය සම්බන්ධයෙන් මිද්දෙණිය පොලීසිය විසින් වලස්මුල්ල මහේස්ත්රාත් අධිකරණයට කරුණු වාර්තා කිරීමෙන් පසු වලස්මුල්ල මහේස්ත්රාත්වරිය සිද්දිය වූ ස්ථානයට පැමිණ අද (19)පෙරවරුවේ මහේස්ත්රාත් පරීක්ෂණය සිදු කළාය.
සිරුරු පිළිබද පශ්චාත් මරණ පරීක්ෂණයක් පවත්වා එහි වාර්තාවක් අධිකරණයට ඉදිරිපත් කරණ ලෙසත් හා සිද්ධියට සම්බන්ධ සැකකරුවන් අත් අඩංගුවට ගෙන අධිකරණයට ඉදිරිපත් කරන ලෙසටත් මහේස්ත්රාත්වරිය මිද්දෙණිය පොලිස් ස්ථානාධිපතිවරයාට නියෝග කළාය.
