ඇෆ්ගනිස්තානයේ ජීවන තත්ත්වය ජනතාවට දරා ගැනීමට නොහැකි තත්ත්වයට පත්ව ඇති බව එක්සත් ජාතීන්ගේ සංවිධානයට අනුබද්ධිත ආයතනයක් වන ලෝක ආහාර වැඩසටහන සඳහන් කරයි.
එම සංවිධානය පෙන්වාදෙන අන්දමට ඇෆ්ගනිස්ථානයේ තත්ත්වය දරාගැනීමට නොහැකි තරම් වූ අපහසු සහ කටුක තත්ත්වයකට පත්ව ඇති අතර එරට බහුතරයක් ජනතාව දැඩි දරිද්රතාවයකින් පෙළෙයි.
පවතින තත්ත්වය සම්බන්ධයෙන් ලෝක ආහාර වැඩසටහන් අදහස් දක්වමින් කියා ඇත්තේ ඇෆ්ගනිස්තානය තුල දැඩි ආහාර හිඟයක් නිර්මාණය වී ඇති බවත් එම තත්ත්වයට මුහුණ දීමට ජාත්යන්තර සහය සහ මානූෂීය ආධාර අවශ්ය බවත්ය.
‟ඇෆ්ගනිස්ථානයේ ජනගහනයෙන් අඩකටත් වැඩි පිරිසක් සාගතයෙන් පෙලෙනවා. ඒ ජනතාවට වහාම ජාත්යන්තර මානුෂීය සහයක් අවශ්යකර තිබෙනවා” යනුවෙන් ලෝක ආහාර වැඩසටහන සිය නිල ට්විටර් ගිණුමේ සඳහන් කර තිබිණි.
ඉකුත් වසරේදී ඇෆ්ගනිස්ථායේ පාලන බලය තලේබාන් සංවිධානය විසින් අත්පත් කරගැනීමත් සමඟ එරට ආර්ථික තත්ත්වය සීඝ්රයෙන් පහත වැටිනි. ඊට මුලිකම හේතුව වූයේ ඇෆ්ගනිස්ථානයේ දළ දේශීය නිෂ්පාදිතයෙන් වැඩි ප්රතිශතයක් විදේශ ආධාර වලන් සමන්විත වීමයි.
එ් අනුව ඇමරිකා එක්සත් ජනපදය ඇෆ්ගනිස්ථානයෙන් ඉවත්ව යාමත් සමඟ මෙම ආධාර ගලා ඒම සීමා වූ අතරම එරට විදේශ වත්කම්ද තහනමකට ලක්විය. පසුව එරට ඇතිවූ ස්භාවික විපත් මෙන්ම සමාජ ආර්ථික පෙරලියත් සමඟ දැඩි අවනිෂ්චිත තත්ත්වයක් නිර්මාණය විය.
මෙම තත්ත්වය අදවන විට දරුණු වී ඇති අතර එය දැඩි මානුෂීය අභියෝගයක් දක්වා වර්ධනය වී තිබීමද ගැටලුකාරී වි තිබේ.
