මනම්පිටිය නිමල් ජයරත්න –
වසර දාහතක් යල මහ දෙකන්නයේ වගා කෙරූ ඔප්පු සහිත අක්කර එකහමාරකින් යුත් කුඹුරු ඉඩම වගා නොකරන ලෙසට මහවැලි අධිකාරියෙන් ලබාදුන් නියෝගයකට එරෙහිව පොළොන්නරුව වැලිකන්ද කුරුලුබැද්ද ගම්මානයේ දෙදරු මවක් සිය අවුරුදු දෙකක දියණිය ද රැගෙන විත් අද (27) පෙරවරුවේ තම කුඹුරේ විරෝධතාවයක් ආරම්භ කළාය.
මෙම විරෝධතාවය ආරම්භ කර ඇත්තේ නව මහසෙන්පුර, කුරුලුබැද්ද අංක 633 ලිපිනයේ පදිංචිව සිටින 41 වියති දෙදරු මවක වන ඩී.එම් ලක්මිණි මල්ලිකා නැමැති කාන්තාවකි.
ඇයගේ ස්වාමි පුරුෂයා ආබාධිතව රෝගාතුර තත්ත්වයෙන් පසුවන අතර ඇයද නිධන්ගත රෝගවලින් පෙළෙන මවකි.
2008 වසරේ සිට ඇය විසින් තම කුඹුරු ඉඩමේ වගා කටයුතු කර තිබේ. තම කුඹුර අසලින් පසුගිය කන්නයේ දී ශ්රී ලංකා මහවැලි අධිකාරිය අපවාහන ජලය ගලා බැසීම සඳහා ඇලක් කැපූ බවත්, එහි පිටාර ජලය හා අධික වර්ෂාව සහ ගංවතුර හේතුවෙන් පසුගිය කන්නයේ කුඹුර වගා කිරීමට නොහැකි වූ බවත් ඇය සඳහන් කළාය.
තම කුඹුර නිසි අයුරින් සකසා දෙන්නට ශ්රී ලංකා මහවැලි අධිකාරියට අවස්ථා කිහිපයකදී පැමිණිලි කළද ඊට කිසිදු විසඳුමක් නොමැති තැන මේ සම්බන්ධයෙන් වැලිකන්ද පොලිසියටද පැමිණිල්ලක් යොමු කළද ඉන්ද තමන්ට ප්රතිඵලයක් නොමැති වූ බව ලක්මිණි මල්ලිකා කීවාය.
තම අක්කර එකහමාරට 2021 වසරේ මැයි 05 ඔප්පුවක් නිකුත් කර තිබෙන අතර ශ්රී ලංකා මහවැලි අධිකාරියේ මහවැලි බි කලාපීය කාර්යාලයේ නිලධාරින් විසින් එම ඔප්පුව පිළි නොගන්නා බවත්, තම කුඹුරු ඉඩම වෙනත් අයෙකුට ලබාදීමේ අරමුණින් තමන් සිදුකළ පැමිණිල්ලට පළිගන්නා බවත් ඇය පැවසුවාය.
තමන්ට ශ්රී ලංකා මහවැලි අධිකාරියෙන් සිදුව ඇති බරපතල අසාධාරණයට මහවැලි ඇමතිවරයාගේ හෝ ජනාධිපතිවරයාගේ අවධානය යොමු කර කඩිනම් විසඳුම් ලබාදෙන ඇය ඉල්ලා සිටින්නිය.
