-
සති හයට මිනිස්සු පස් දෙනෙක් අලි ගහලා මරලා… වනජීවී දෙපාරත්මේන්තුවට පොලිසියට කිව්වට උත්තර නෑ… මිනිහෙක් මැරුණම මරණය බලන්න එනවා… අපි අහිංසක මිනිස්සු මහත්තයො… කාටවත් ගහන්න කරදර කරන්න අපිට ඕන වෙලා තිබුණෙ නෑ… රඹකැපූ වැව ගමේ ගැමියෙක් කියයි…
කැබිතිගොල්ලෑව රඹකැපූවැව ගම්මානයේ දි වන අලි ප්රහාරයකට ලක්ව කාන්තාවක් මිය යෑම සම්බන්ධ සිද්ධියක් සම්බන්ධව එම ගම්මානයේ ජනතාව සිදුකළ විරෝධතාවයක් අතර දී පහර කෑමකට ලක් වී ඝාතනය වුන පොලිස් සැරයන්වරයාගේ මරණයට අදාලව මේ වනවිට තරුණ හිමිනමක් ඇතුළු ගම්වැසියන් 15 දෙනෙක් පොලිස් අත්අඩංගුවට ගෙන තිබේ.
මේ අතර විරෝධතාවයට සම්බන්ධ වූ කාන්තාවන් දෙදෙනෙක් සිටින බවත් තවත් පුද්ගලයින් පරිසක් අත්අඩංගුවට ගැනීමට විමර්ශනය කරමින් සිටින බවත් පොලිසිය කියයි.
අත්අඩංගුවට ගෙන ඇත්තේ රඹකැපූවැව බෝධිරුක්ඛාරාමයේ වැඩ වාසය කරන හිමිනමය.
මේ වනවිට ජනතාව ප්රකෝප කිරීම සම්බන්ධව උන්වහන්සේට ප්රධාන ලෙස චෝදනා එල්ල වී ඇත. උන්වහන්සේ හමුදාවෙන් ඉවත් වී මහණ වී ඇති 29 හැවිරිදි හිමිනමක් බව පොලිසිය කියයි.
ගම්වැසියන් පවසන්නේ උන්වහන්සේ අසරණ ගැමියන් වෙනුවෙන් බොහෝ අවස්ථාවල අසාධාරණයන්ට එරෙහිව කතා කරන ගැම්වැසියන්ගේ ප්රසාදයට ලක් වූ හිමිනමක් බවය.
විරෝධතාවය අතර දී ඝාතනය වී ඇත්තේ අංක 43ඒ, ඩයස්වත්ත, මල්වාන, වාරියපොල ලිපිනයේ පදිංචි 54 හැවිරිදි සැරයන්වරයෙකි.
ඔහු ඝාතනය වී ඇත්තේ හිසට වැදුණු පොළු පහරක් හේතුවෙනි.
පොලිසිය පවසන්නේ මෙම නිලධාරියාට පොළු පහර වැදී ලේ ගලමින් සිටිය දී රෝහලට ගෙන යෑමත් විරෝධතාකරුවන් විසින් අවහිර කර ඇති බවය.
එහිදී අහසට වෙඩි තබමින් පිරිස් විසුරුවා හැර පහර කෑ පොලිස් නිලධාරියා රෝහල් ගත කළ බව පොලිසිය කියයි.
විරෝධතාවයට හේතුව
රඹකැපූවැව තිත්තගෝනෑව ප්රදේශයේ පදිංචි බී ගුණසිංහ නැමැති තිදරු පියෙක් පසුගිය 31 දා සවස 7ට පමණ වන අලි ප්රහාරයකට ලක්ව මිය යෑම මේ විරෝධතාවයට ප්රධාන හේතුව වී තිබිණි.
කැබිතිගොල්ලෑවේ සිට පදවිය බලා ධාවනය වූ බස් රියකින් පැමිණ රඹකැපූවැව හන්දියෙන් බැස වෙල් යායක් මැදින් වැටී ඇති අතුරු පාරක ගමන් කරද්දී ඔහු මෙම වනඅලි ප්රහාරයට ලක් වී ඇත
මේ ප්රහාරයත් සමග ගම්මු කුපිත වී තිබුණහ. මේ පිළිබඳව ලංකාසර කළ විමසුමක දී ගම් වැසියන් ප්රකාශ කළේ ඔවුන් ජීවත් වූයේ බරපතල පීඩාවක බවය.
මාස හත අටක සිට වන අලි උවදුර මුළු ප්රදේශයම වසාගෙන පැතිරී තිබුණු බවත් පසුගිය මාස එක හමාර තුළ වන අලි ප්රහාරවලින් ජීවිත පහක් අහිමි වූ බවත්ය.
ගොවිතැන් කටයුතු මුලුමනින්ම විනාශ කරමින් ජීවිත විනාශ කරමින් නිරන්තරයෙන් සිදුවෙිමන් ඇති වන අලි උවදුරු සම්බන්ධව කැබිතිගොල්ලෑව පොලිස් ස්ථානයට සහ වනජීවී නිලධාරීන් දැනුම්වත් කළත් කිසිම පලක් නොවුණ බවය.
“ අලි හානි කරනකොට පොලිසිය වනජීවි එක දැනුම්වත් කළාම එන්න විදිහක් නෑ කියනවා. වාහන නෑ කියනවා… කියන්න පුලුවන් හැම තැනමට කියන්න ඕන හැම විදිහටම කිව්වා. අපි ඉන්නේ මරණයත් එක්ක මහත්තයො. වන අලියෙක් ගහලා කවුරුහරි මළොත් කට්ටිය මරණය බලන්න එනවා… මේ තත්ත්වය ගැන මිනිස්සු හිටියෙ මහා තරහකින්. “
“ ගුණසිංහ මළාට පස්සේ මිනිස්සුනට තරහා දරාගන්න බැරි උනා. අපි අහිංසක මිනිස්සු. කවුරුත් කාටවත් ගහලා මරන්න තුන් හිතකින්වත් හිතලා තිබුණෙ නැ. අපි ජීවත් වෙලා ඉන්න වෙලාවෙදි අපිට උදව් කරන්න එන්න බැරි අය මළාට පස්සෙ එන්නෙ මොකට ද කියලා මිනිස්සු කිව්වෙ. ඒ හදිසි කෝපය නිසා ඇතිවුන ගැටුමක්“ ඔහු පැහැදිලි කළේය.
පොලිසිය කියන කතාව
පොලිසිය කියන්නේ වන අලි ප්රහාරයට ලක් වූ පුද්ගලයා රෝහලට රැගෙන යෑමට හෝ ගම්වැසියන් ඉඩ නොදී ඔහුගේ සිරුරු තබාගෙන විරෝධතාවයේ යෙදුන බවය.
පුද්ගලයා රෝහලට ගෙනියනවා වෙනුවට ප්රධාන මාර්ගය අවහිර කරමින් විරෝධතාවයේ යේදුන බවය.
පොලිසිය කියන්නේ මේ සංවිධානාත්මක ප්රකෝප කිරීමක් බවය. පොලිස් මාධ්ය ප්රකාශක නිහාල් තල්දූව කීවේ පොලිසියට බැණ වැදී කෑගෝ ගසමින් සිටි පිරිස පොලිස් ස්ථානාධිපතිවරයාට පහර දී ඇති බවත්, එම පහරදීම වැලැක්වීමට ඝාතනය වූ සැරයන්වරයා කටයුතු කරමින් සිටිය දී ඔහුගේ ගිනි අවිය ද පැහැර ගැනීමට කළහකාරීන් උත්සාහ කළ බවත්ය.
අනතුරුව ගිනි අවිය තමන් භාරයට ගෙන අහසට වෙඩි තබා කලහකාරීන් පලවා හැරීමට කැබිතිගොල්ලෑව පොලිස් ස්ථානාධිපතිවරයා කටයුතු කළ බව පොලිස් මාධ්ය ප්රකාශකවරයා සඳහන් කර ඇත.
අනතුරුව පහරකෑමට ලක්වී වැටී සිටි පොලිස් සැරයන්වරයා රෝහල්ගත කර තිබේ. කැබිතිගොල්ලෑව රෝහලින් ඔහු අනුරාධපුර මහ රෝහල වෙත මාරු කරද්දී ඇති වූ හදිසි තත්ත්වයක් මත ඔහුව මැදවච්චි රෝහලට ඇතුළත් කළ බවත්, එහිදී ඔහු මිය ගිය බවත් පොලිසිය පවසයි.
සිද්ධිය සම්බන්ධව අත්අඩංගුවට ගෙන ඇත්තේ වයස අවුරුදු 37-20 අතර පිරිසකි.
පොලිස් මාධ්ය ප්රකාශක ජ්යෙෂ්ඨ පොලිස් අධිකාරී නිහාල් තල්දූව පවසන්නේ මේ ගම්වැසියන් පොලිසිය සමග ඉතා සහයෝගයෙන් වැඩකරන පිරිසක් බවය. හිමිනම විසින් පොලිසියට එරෙහිව ගම්වැසියන් කුපිත කළ බව පොලිසිය පවසයි. එහෙත් ගම්වැසියන් අපට කීවේ මේ හිමිනම ගමේ දායකයන් වෙනුවෙන් දැඩි කැපවීමක් සහිත කාගේත් ගෞරවයට පාත්ර වූ හිමිනමක් බවය.
එම හිමිනම ඇතුළු සිව් දෙනෙක් කැබිතිගොල්ලෑව මහේස්ත්රාත් අධිකරණයට ඉදිරිපත් කිරීමෙන් අනතුරුව රඳවා තබාගෙන විමර්ශනය පැවැත්වීමට අධිකරණය අවසර ලබා දී තිබේ.
බලධාරීන්ගේ නොසලකා හැරීම් බරපතල පීඩනයක් වී එම පීඩනය පුපුරා ගොස් ජීවිත විනාශවන කැරැල්ලක් තෙක් ගමන් කර ඇත. දැන් ප්රශ්නය වෙනත් දිශානතියකට යොමු වී තිබේ. ගම්වැසියන් පස්දෙනෙකුගේ මරණ කෙළවර පොලිස් නිලධාරියෙකුගේ ජීවිතයත් විනාශ වී ඇත.
මේ කැබිතිගොල්ලෑව පමණය. රට පුරා වන අලි ප්රහාරවලින් සිදුවන මරණවල ප්රමාණය ඩොංගුවලින් සිදුවන වාර්ෂික මරණවලට වඩා ඉහළ බව ඔබ දැනගත යුතුය. වන අලි ප්රහාරයට ලක්වී අසරණ මිනිස්සු 108 දෙනෙක් මේ වසරේ ඔක්තොම්බර් 10 වනවිට මිය ගොස් සිටියහ.
කැබිතිගොල්ලෑවේ සිට මේ රටේ පාලකයින්ගෙන් මිනිස්සු ප්රශ්න කරමින් සිටිති.
අපේ ජීවිත පරඬැල් ද?
