ශ්රියානි විජේසිංහ –
රෝහල්වල නොමැති කිසිදු ඖෂධයක් පිටතින් මිලදී ගැනීමට වෛද්ය නිර්දේශ ලබා නොදීමට තීරණය කළ බව රජයේ වෛද්ය නිලධාරීන්ගේ සංගමය සඳහන් කරයි.
මේ වන විට සායනයන් වෙත පැමිණෙන රෝගීන්ට බොහෝ ඖෂධයන් නොමැති බැවින් ඔවුන්ට අවශ්ය ඖෂධයන් පිටතින් ලබා ගැනීමට වෛද්යවරුන් විසින් ඖෂධ වට්ටෝරුව ලියා දෙන නමුත් හෙට (17) සිට එවැනි නිරේදේශයන් නොකරන බව සංගමයේ මාධ්ය ප්රකාශක වෛද්ය චමිල් විජේසිංහ පවසා සිටියි.
ඒත් සමඟම රෝහලේ සිදුනොකරන රසායනාගාර පරික්ෂණයන් පිටතින් සිදුකිරීමට නිරේදේශ නොකරන බවද හෙතෙම පවසා සිටියි.
මේ වන විටත් රෝහල් තුළ රසායනාගාර පරීක්ෂණයන් සිදුකළද ඒවා ප්රමාද වන බැවින් ඉක්මනින් වෛද්ය ප්රතිකාරයන් අවශ්ය රෝගීන් වෛද්ය නිර්දේශ මත පෞද්ගලික අංශයෙන් පරික්ෂණයන් සිදුකරමින් වෛද්ය ප්රතිකාර සඳහා යොමුවිම බොහෝ විට සිදුවන්නක් යැයි ද පැවසේ.
කෙසේ නමුත් මින් ඉදිරියට පිටතින් රසායනාගාර පරික්ෂණයන් සඳහා වෛද්ය නිර්දේශයන් නොලැබෙන බැවින් නිසි වේලාවට වෛද්ය ප්රතිකාරයන් සඳහා යොමුවීමට නොහැකි වනු ඇති බවද වෛද්ය චමිල් පවසා සිටියි.
තවද සහායකයෙකු නොමැතිව රෝගීන් පරික්ෂා කිරීම මින් ඉදිරියට සිදු නොකිරීමටද සංගමය තීරණය කර ඇත.
රෝහල්වල මේ වන විට හෙද සහ කනිෂ්ඨ කාර්ය මන්ඩලවල උග්ර හිඟයක් පවතින බැවින් එවැනි සහායකයෙකු රෝගීන් පරික්ෂා කරන ස්ථානයේ රඳවා ගැනිම අසීරු කටයුත්තක් වන බවද සංගමය අවධාරණය කරයි.
මෙවර අය-වැය මගින් වෛද්යවරුන්ගේ ප්රශ්න නොසලකා හැර ඇති බැවින් තවදුරටත් අවදානම් සහගත රාජකාරිවල නොයෙදිය යුතු බව විධායක සභාව පසුගියදා ඒකමතිකව තීරණය කළ බවද මාධ්ය ප්රකාශකවරයා පැවසුවේය.
