කඩුවෙල වැලිවිට සුද්දාට අයත් නීති විරෝධී වත්කම් බව පවසා විශාල ප්රචාරණයක් ලබා දෙමින් යුක්තිය මෙහෙයුම යටතේ අත් අඩංගුවට ගෙන අපරාධ පරීක්ෂණ දෙපාර්තුමේන්තුව භාරයේ තබා ගත් රුපියල් කෝටි දහයක පමණ වටිනාකමකින් යුත් රථ වාහන එහි ලියාපදිංචි අයිතිකරු වෙත ලබාදෙන ලෙස කඩුවෙල මහෙස්ත්රාත් චානිමා විජේබණ්ඩාර ඊයේ (16) අපරාධ පරීක්ෂණ දෙපාර්තමේන්තුවට නියෝග කළාය.
යුක්තිය මෙහෙයුම යටතේ අපරාධ පරීක්ෂණ දෙපාර්තමේන්තුවේ නීති විරෝධී වත්කම් කොට්ඨාසය මගින් අත් අඩංගුවට ගත් මෙම වාහන මාස දෙකකට ආසන්න කාලයක් එම කොට්ඨාසය භාරයේ රඳවාගෙන තිබිණි.
එම වාහන තවදුරටත් අපරාධ පරීක්ෂණ දෙපාර්තමේන්තුවේ නීතිවිරෝධි වත්කම් කොට්ඨාසයේ රඳවා තබාගෙන වැඩිදුර විමර්ශන සඳහා අවස්ථාව ලබා දෙන ලෙස එම කොට්ඨාසය කළ ඉල්ලීම ප්රතික්ෂේප කරමින් මහේස්ත්රාත්වරිය ඊයේ එම නියෝගය නිකුත් කළාය.
කඩුවෙල පොලිසිය මගින් ඉකුත් 2023 වර්ෂයේ දෙසැම්බර් මාසයේ දී කඩුවෙල පොලිස් වසමේ පදිංචි මළලගේ සුදත් කිත්සිරි නොහොත් වැලිවිට සුද්දා නැමැත්තාට අයිති බව පවසමින් ඔහුගේ සහෝදරියවන එච්.එම්.හීන්මැණිකේ යන අය සතුව තිබූ සුඛෝපභෝගී බස් 05ක්, නවීන මෝටර් රථයක් සහ යතුරුපැදියක් අත් අඩංගුවට ගෙන අපරාධ පරීක්ෂණ දෙපාර්තමේන්තුවේ නීති විරෝධි වත්කම් විමර්ශන කොට්ඨාසය වෙත ලබා දීමට කටයුතු කළේය.
ඒ අනුව මුදල් විශුද්ධිකරණ පනතේ හත්වන වගන්තිය යටතේ අදාළ රථ වාහන සම්බන්ධයෙන් විමර්ශන කළ යුතු බවට සහකාර පොලිස් අධිකාරී එස්.ඊ.ආර් සමරනායක කඩුවෙල මහෙස්ත්රාත්අධිකරණයෙන් සිදුකළ ඉල්ලීමක් මත එම රථ වහාන දින 07ක කාලයක් රඳවාගෙන වැඩිදුර විමර්ශනය සඳහා අධිකරණය විසින් නියෝග කර තිබිණි.
එහෙත් මාස දෙකකට ආසන්න කාලයක් දිගින් දිගටම මෙම වාහන සඳහා රඳවා ගැනීමේ නියෝග ලබාගෙන තිබිණි. අදාළ වාහන අත්පත් කර ගැනීම සඳහා හෝමාගම මහාධිකරණයෙන් නියෝග ලබා ගැනීමට අපරාධ පරීක්ෂණ දෙපාර්තමේන්තුවේ නීති විරෝධී වත්කම් විමර්ශන කොට්ඨාසය වෙත අවස්ථා කීපයක් ලබා දීමට කඩුවෙල මහේස්ත්රාත්වරිය කටයුතු කළාය.
මේ අතර ජනවාරි 02 සිට යළිත් අදාළ රථ වාහන රඳවා ගැනීමට අපරාධ පරීක්ෂණ දෙපාර්තමේන්තුව මගින් අධිකරණයෙන් ඉල්ලීම් කිරීමේ දී ඊට විරුද්ධව අදහස් දැක්වු නීතිඥවරුන් එම වාහන මේ ආකාරයෙන් රඳවා තබාගැනීම හෝ රඳවා තබා ගැනීමට අවසර ඉල්ලීම නීති විරෝධි බවට කරුණු ඉදිරිපත් කර තිබිණි.
මෙසේ තිබිය දී අපරාධ පරීක්ෂණ දෙපාර්තමේන්තුව මගින් ඊයේ දින ද යළි අදාළ රථ වාහන රඳවා ගෙන විමර්ශනය සඳහා අධිකරණයෙන් අවසර ඉල්ලා සිටියේය. ඒ සඳහා අවස්ථාව ලබා නොදෙන ලෙසත්, අපරාධ පරීක්ෂණ දෙපාර්තමේන්තුව මගින් අදාල මහාධිකරණ නියෝයෙන් අත්පත් කර ගැනීමේ නියෝග ලබාගෙන නොමැති බවත් පෙන්වමින් විත්තියේ නීතිඥවරු ඊට දැඩි විරෝධයක් පල කළහ.
එකී නීති තත්ත්වය 6/2024 දරන මහාධිකරණ නඩු තීන්දුවෙන් ද තහවුරු කර ඇති බව ද නීතිඥවරයා විසින් අධිකරණය හමුවේ අනාවරණය කළේය.
එම අවස්ථාවේ දී අපරාධ පරීක්ෂණ දෙපාර්තමේන්තුවේ නීති විරෝධී වත්කම් විමර්ශන කොට්ඨාසය මගින් එකී වාහන දිගින් දිගටම රඳවා තබා ගැනීමට අධිකරණයෙන් අවසර ඉල්ලුවේය.
එම ඉල්ලිම ප්රතික්ෂේප කළ කඩුවෙල මහේස්ත්රාත්වරිය අදාල රථ වාහන ඒවායේ ලියාපදිංචි අයිතිකරු වෙත නිදහස් කරන ලෙස අපරාධ පරීක්ෂණ දෙපාර්තමේන්තුවට නියෝග කළාය. – දිනමිණ
