උපේක්ෂා උඩුවැරැල්ල –
ඇමෙරිකානු ජනාධිපති ඩොනල්ඩ් ට්රම්ප්ගේ ජනප්රියත්වය ඔහුගේ දෙවන ධුර කාලය තුළ වාර්තා වූ අවම මට්ටම දක්වා බරපතල ලෙස ඛාදනය වී ඇති බව නවතම රොයිටර්/ඉප්සෝස් (Reuters/Ipsos) මත විමසුමකින් අනාවරණය වී තිබේ.
2025 ජනවාරි මාසයේදී සිය දෙවන ධුර කාලය ආරම්භ කළ ට්රම්ප් කෙරෙහි මහජන ප්රසාදය මෙතරම් වේගයෙන් පහත වැටුණු ප්රථම අවස්ථාව මෙය ලෙස ඉතිහාසයට එක්වේ.
සමීක්ෂණ ප්රතිඵල සහ පසුබිම
මාර්තු 20 සිට 23 දක්වා දින හතරක් පුරා පවත්වන ලද මෙම විද්යුත් මත විමසුම් සමික්ෂණය සඳහා ඇමෙරිකා එක්සත් ජනපදය පුරා විසිරී සිටින වැඩිහිටි පුද්ගලයින් 1,272 දෙනෙකුගෙන් සමන්විත නියැදියක් යොදාගෙන ඇත.
මෙහි විශේෂත්වය වන්නේ මෙය හුදෙක් අහඹු ලෙස තෝරාගත් පිරිසක් නොව, සම්භාවිතා පදනම් කරගත් පැනලයක් (Probability-based panel) ඇසුරින් විද්යාත්මකව තෝරාගත් පිරිසක් වීමයි. රොයිටර් සහ ඉප්සෝස් ආයතන විසින් මෙහිදී ‘Ipsos KnowledgePanel’ පද්ධතිය භාවිත කර ඇති අතර, එමඟින් ඇමෙරිකානු ජන සංගණන දත්තවලට (U.S. Census benchmarks) අනුකූල වන පරිදි සහ 2024 ජනාධිපතිවරණයේදී ප්රකාශ වූ ඡන්ද දත්තවලට සාපේක්ෂව මෙම නියැදිය බර තබා (Weighted) සකස් කර තිබේ.
මේ හේතුවෙන් සමස්ත ඇමෙරිකානු සමාජයේ විවිධ තරාතිරම්වල සහ දේශපාලන මත දරන්නන්ගේ නියෝජනය මෙහි මනාව පිළිබිඹු වේ. මෙම සමීක්ෂණයේ දෝෂ පරාසය (Margin of error) ප්ලස් හෝ මයිනස් 3%ක් වැනි අවම මට්ටමක පවතින බැවින්, මෙහි ප්රතිඵල ඉහළ නිරවද්යතාවයකින් යුක්ත බව විශ්ලේෂකයෝ පෙන්වා දෙති.
එහි ප්රතිඵල අනුව ඇමෙරිකානුවන්ගෙන් 36%ක් පමණක් ට්රම්ප්ගේ පාලනය අනුමත කරන අතර, 62%ක් ඔහුගේ ක්රියාකලාපය පිළිබඳ සිය අප්රසාදය පළ කර තිබේ. මෙය ශුද්ධ වශයෙන් සෘණ 26ක ප්රතිශතාත්මක පසුබෑමකි.
මීට පෙර මාර්තු 17-19 කාලසීමාවේ පැවති සමීක්ෂණයේදී ඔහුගේ ජනප්රියත්වය 40%ක මට්ටමක පැවති අතර, ගතවූ දින කිහිපය තුළ එය 4%කින් තියුණු ලෙස පහත වැටීම විශේෂත්වයකි.
2025 වසර ආරම්භයේදී 47%ක ඉහළ ප්රසාදයක් සහිතව සිය පාලනය ඇරඹූ ට්රම්ප්, වසරකුත් මාස දෙකක් ගතවන තැන මෙවැනි පසුබෑමකට ලක්ව ඇත්තේ එරට ආර්ථික සහ විදේශ ප්රතිපත්ති පිළිබඳ ජනතාව තුළ ඇති වී තිබෙන දැඩි කළකිරීම හේතුවෙනි.
මේ නිගමනයන් සාධනීය ද?
මෙම සමීක්ෂණ ප්රතිඵල හුදෙක් එක් අවස්ථාවක ලබාගත් දත්ත නොව, 2025 වසරේ සිට රොයිටර් සහ ඉප්සෝස් (Reuters/Ipsos) ආයතන විසින් අඛණ්ඩව පවත්වාගෙන එනු ලබන දත්ත පද්ධතියක (Poll tracker) නවතම දිගුවකි.
මෙහිදී භාවිත කර ඇති විනිවිදභාවයකින් යුත් විද්යාත්මක ක්රමවේදය සහ ඇමෙරිකානු ජන සංගණන දත්තවලට (U.S. Census benchmarks) අනුකූලව සිදුකරන ලද බර තැබීම් (Weighting), මෙම 36%ක අගයෙහි නිරවද්යතාවය තහවුරු කරයි.
මෙය හුදකලා දත්තයක් (Outlier) නොවන අතර, මෑතකාලීන අනෙකුත් ප්රධාන පෙළේ දත්ත විශ්ලේෂණවල ද දක්නට ලැබෙන ට්රම්ප් පාලනය කෙරෙහි වන මහජන ප්රසාදයේ ‘මෘදු වීම’ (Softening) මනාව නිරූපණය කරන්නකි.
ඒ අනුව, 2026 මාර්තු 25 වන දින වන විට පවතින නිල දත්ත වාර්තා සනාථ කරනුයේ, වත්මන් ඇමෙරිකානු පාලන තන්ත්රය සිය දෙවන ධුර කාලය තුළ දරුණුතම මහජන විශ්වාසය බිඳවැටීමකට මුහුණ දෙමින් සිටින බවයි.
ජනප්රියත්වය කඩා වැටීමට බලපෑ හේතු
මෙම ජනප්රියත්වය ඛාදනය වීමට ප්රධානතම හේතුව ලෙස විදේශ ප්රතිපත්ති හා බැඳුණු ආර්ථික පීඩනය හඳුනාගෙන ඇත.
ඉන්ධන මිල සහ ඉරාන යුද්ධය: 2026 පෙබරවාරි 28 වන දින ඇමෙරිකානු – ඊශ්රායල ඒකාබද්ධ ප්රහාර ඉරානය වෙත එල්ල වීමත් සමඟ මැදපෙරදිග තෙල් ප්රවාහයට බාධා එල්ල විය. මේ හේතුවෙන් ඇමෙරිකාව තුළ පෙට්රල් ගැලුමක මිල ඩොලර් 1කින් පමණ ඉහළ ගොස් ඇත. මෙම ප්රහාර මාලාව අනුමත කරන්නේ ජනතාවගෙන් 35%ක් පමණි.
ආර්ථික කළමනාකරණය: ට්රම්ප්ගේ ආර්ථික මෙහෙයවීම පිළිබඳ ප්රසාදය පළ කරන්නේ 29%ක් වැනි සුළු පිරිසකි. මෙය ඔහුගේ පාලන කාල දෙක තුළම වාර්තා වූ අවම අගය වන අතර හිටපු ජනාධිපති ජෝ බයිඩන්ගේ පාලන සමයේ පැවති අවම මට්ටමටත් වඩා පහළ අගයකි.
ජීවන වියදම: 2024 මැතිවරණ ව්යාපාරයේ ප්රධාන පොරොන්දුවක් වූ ජීවන වියදම පාලනය කිරීම සම්බන්ධයෙන් ට්රම්ප් කෙරෙහි විශ්වාසය තබා ඇත්තේ 25%ක් පමණි. සමස්තයක් ලෙස 63%ක ජනතාවක් ඇමෙරිකානු ආර්ථිකය දුර්වල මට්ටමක පවතින බව විශ්වාස කරති.
දේශපාලන බලපෑම
රිපබ්ලිකන් පාක්ෂිකයන් අතර ට්රම්ප්ට ඇති සහයෝගය තවමත් 80%ක මට්ටමක පැවතුණද, ඔවුන් අතරද යම් නොසන්සුන්තාවක් හටගෙන ඇත. පසුගිය සතියේ ජීවන වියදම සම්බන්ධයෙන් ඔහුට අප්රසාදය පළ කළ රිපබ්ලිකන් පාක්ෂිකයන් සංඛ්යාව 27% සිට 34% දක්වා ඉහළ ගොස් තිබේ.
2026 වසරේ පැවැත්වීමට නියමිත අතුරු මැතිවරණය (Midterms) ඉලක්ක කර ගනිමින් ඩිමොක්රටික් පාර්ශවය මෙම තත්ත්වය දේශපාලන වාසියක් කර ගැනීමට සැරසෙයි.
විශේෂයෙන්ම ආර්ථිකය, ජාතික ආරක්ෂාව සහ ඉහළ යන ජීවන වියදම සම්බන්ධයෙන් ජනතාව තුළ ඇති වී තිබෙන මෙම විරෝධය ට්රම්ප් පාලනයට ඉදිරියේදී දැඩි අභියෝගයක් වනු ඇතැයි දේශපාලන විශ්ලේෂකයෝ පෙන්වා දෙති.
