ගල්ෆ් කලාපයේ පවතින යුදමය වාතාවරණය සමනය කිරීම වෙනුවෙන් ඇමරිකා එක්සත් ජනපදය සහ ඉරානය අතර සාකච්ඡා පැවැත්වීම සඳහා සත්කාරකත්වය ලබා දීමට තමන් සූදානම් බව පකිස්ථාන අගමැති ෂෙබාස් ෂරීෆ් ප්රකාශ කරයි.
ඉරාන විදුලි බලාගාරවලට බෝම්බ හෙලන බවට එල්ල කළ තර්ජන ජනාධිපති ඩොනල්ඩ් ට්රම්ප් විසින් තාවකාලිකව අත්හිටුවීමෙන් පසු පකිස්ථානය මෙම යෝජනාව ඉදිරිපත් කර තිබේ.
පකිස්ථාන අගමැතිවරයා සිය ‘X’ ගිණුමේ සටහනක් තබමින් පවසා ඇත්තේ, පවතින අර්බුදය විසඳා ගැනීම සඳහා දෙපාර්ශවයම එකඟ වන්නේ නම් ඒ වෙනුවෙන් පහසුකම් සැලසීමට පකිස්ථානය ගෞරවයෙන් යුතුව සූදානම් බවයි. මේ වන විටත් පකිස්ථාන රජයේ අභ්යන්තර ආරංචි මාර්ග පවසන්නේ මෙම සාකච්ඡා පිළිබඳ මූලික වටයන් සාර්ථකව සිදුවෙමින් පවතින බවත්, ඉදිරි සතියක් ඇතුළත තීරණාත්මක හමුවක් සිදුවීමට ඉඩ ඇති බවත්ය.
Pakistan welcomes and fully supports ongoing efforts to pursue dialogue to end the WAR in Middle East, in the interest of peace and stability in region and beyond. Subject to concurrence by the US and Iran, Pakistan stands ready and honoured to be the host to facilitate…
— Shehbaz Sharif (@CMShehbaz) March 24, 2026
කලාපීය නොසන්සුන්තාව සහ මිලිටරි බලය
සාකච්ඡා පිළිබඳ බලාපොරොත්තු මතු වුවද, ඇමරිකාව සිය 82 වන ගුවන් හමුදා බලකායට අයත් දහස් සංඛ්යාත සෙබළුන් පිරිසක් මැදපෙරදිග වෙත යැවීමට සූදානම් වන බව රොයිටර් පුවත් සේවය වාර්තා කරයි. මෙය කලාපයේ යුද බිය තවදුරටත් තීව්ර කිරීමට හේතු වී තිබේ.
පසුගිය පෙබරවාරි 28 වැනිදා ඇමරිකාව සහ ඊශ්රායලය එක්ව ඉරානයට ප්රහාර එල්ල කළේ එරට න්යෂ්ටික වැඩසටහන සම්බන්ධ සාකච්ඡා අසාර්ථක වූ බව පවසමිනි. ඉන් අනතුරුව ඉරානය විසින් ඇමරිකානු කඳවුරු පවතින රටවලට ප්රහාර එල්ල කළ අතර, ලෝකයේ තෙල් ප්රවාහනයෙන් පහෙන් පංගුවක් සිදුවන ‘හෝමුස් සමුද්ර සන්ධිය’ (Strait of Hormuz) වසා දැමීමට කටයුතු කළේය. මේ හේතුවෙන් ලෝක ඉන්ධන මිල ශීඝ්රයෙන් ඉහළ ගිය අතර ගෝලීය බලශක්ති අර්බුදයක් ද නිර්මාණය විය.
ට්රම්ප්ගේ ජනප්රියතාව පල්ලම් බසී
රොයිටර් පුවත් සේවය වාර්තා කරන පරිදි නවතම මත විමසුම් වාර්තා පෙන්වා දෙන්නේ ඩොනල්ඩ් ට්රම්ප් නැවතත් බලයට පත්වීමෙන් පසු ඔහුගේ ජනප්රියතාව අවම මට්ටමකට වැටී ඇති බවය. ඉන්ධන මිල ඉහළ යාම සහ ඉරානය සමඟ පවතින යුද්ධය කෙරෙහි ඇමරිකානු වැසියන්ගේ දැඩි අකමැත්ත මීට හේතු වී තිබේ.
රොයිටර්/ඉප්සොස් (Reuters/Ipsos) මත විමසුමට අනුව ට්රම්ප්ගේ ක්රියාකලාපය අනුමත කරන්නේ ඇමරිකානුවන්ගෙන් 36%ක් පමණි.
ඉරානයේ ස්ථාවරය
ට්රම්ප් පසුගියදා ප්රකාශ කළේ ඇමරිකාව සහ ඉරානය අතර ඉතා ඵලදායී සාකච්ඡා ආරම්භ වී ඇති බවය. කෙසේ වෙතත් ඉරානය එම ප්රකාශය ප්රතික්ෂේප කර තිබේ. ඉරාන පාර්ලිමේන්තු කථානායක මොහොමඩ් බකර් කලීබාෆ් පවසන්නේ සෘජු සාකච්ඡා සිදුවන බවට පළවන වාර්තා ‘අසත්ය පුවත්’ (Fake News) බවයි.
ඉරාන විප්ලවීය ආරක්ෂක බලකායේ (IRGC) බලපෑම මත ඉරානය සිය ස්ථාවරය තවදුරටත් දැඩි කරමින් සිටින බව ටෙහෙරාන් ආරංචි මාර්ග පවසයි.
ඊශ්රායලයට එල්ල වූ ප්රහාර
මේ අතරතුර තෙල් අවිව් (Tel Aviv) නුවර ඉලක්ක කරගනිමින් ඉරානය මිසයිල ප්රහාර එල්ල කර තිබේ.
මෙම ප්රහාරවලින් එරට ගොඩනැගිලි රැසකට හානි සිදුව ඇති අතර ජනතාව දැඩි භීතියට පත්ව සිටිති. ලෙබනනයේ හිස්බුල්ලා සංවිධානයට එරෙහිව ඊශ්රායලය සිදුකරන මෙහෙයුම් ද තවමත් නතර වී නොමැති අතර, සමස්ත කලාපයම දැඩි යුද උණුසුමක පවතී.
