ඇමරිකා එක්සත් ජනපද රජය විසින් ශ්රී ලංකා ගුවන් හමුදාව වෙත පරිත්යාග කරන ලද TH-57 ‘සී රේන්ජර්’ (Sea Ranger) වර්ගයේ බහුකාර්ය හෙලිකොප්ටර් යානා 10 නිල වශයෙන් භාර ගැනීම ජනාධිපති අනුර කුමාර දිසානායකගේ ප්රධානත්වයෙන් රත්මලාන ගුවන් හමුදා කඳවුරේදී ඊයේ (24) සිදු විය.
රත්මලාන ගුවන් හමුදා කඳවුර වෙත පැමිණි ජනාධිපතිවරයා ගුවන් හමුදා උත්තමාචාර සහිතව පිළිගත් අතර, අනතුරුව හෙලිකොප්ටර් යානා නිරීක්ෂණය කරමින් එහි කාර්ය මණ්ඩලය සමඟ සමූහ ඡායාරූපයකට ද පෙනී සිටියේය.
මෙහිදී දෙරට අතර ද්විපාර්ශ්වික ගිවිසුමකට ද අත්සන් තැබුණු අතර, ඊට ශ්රී ලංකා ගුවන් හමුදාපති එයාර් මාර්ෂල් බන්දු එදිරිසිංහ සහ ඇමරිකානු පැසිෆික් ගුවන් හමුදා ආඥාපති ජෙනරාල් කෙවින් ෂ්නයිඩර් (General Kevin Schneider) අත්සන් තැබූහ.
මෙම TH-57 ‘සී රේන්ජර්’ යානා සතු බහුකාර්ය හැකියාවන් හේතුවෙන් ඉදිරියේදී ඒවා ආපදා සහන සේවා, සෙවීම් සහ මුදාගැනීම්, හදිසි මහජන සේවා මෙන්ම එක්සත් ජාතීන්ගේ සාමසාධක මෙහෙයුම් සඳහා ගුවන් කාර්ය මණ්ඩල පුහුණු කිරීම් ඇතුළු ක්ෂේත්ර කිහිපයක මෙහෙයුම් සඳහා යොදවා ගැනීමට නියමිතය.
විශේෂ භාණ්ඩ ප්රවාහන පහසුකම් ඔස්සේ පසුගිය ජූනි 01වන දින ලංකාවට රැගෙන ආ මෙම යානා, රත්මලාන ගුවන් ඉංජිනේරු අංශයේදී එකලස් කෙරුණු අතර, තාක්ෂණික පරීක්ෂණ සහ අත්හදා බැලීමේ පියාසැරිය අවසන් කිරීමෙන් පසු නිල මෙහෙයුම්වලට එක් කෙරේ.
මෙම අවස්ථාවට ආරක්ෂක නියෝජ්ය අමාත්ය විශ්රාමික මේජර් ජෙනරාල් අරුණ ජයසේකර, මාර්ෂල් ඔෆ් ද එයාර් ෆෝස් රොෂාන් ගුණතිලක, ආරක්ෂක ලේකම් විශ්රාමික එයාර් වයිස් මාර්ෂල් සම්පත් තුයියකොන්තා, ත්රිවිධ හමුදාපතිවරු සහ පොලිස්පති ඇතුළු ආරක්ෂක අංශ ජ්යෙෂ්ඨ නිලධාරීන් පිරිසක් එක්ව සිටියහ.
ඇමරිකා එක්සත් ජනපදය නියෝජනය කරමින් දකුණු සහ මධ්යම ආසියානු කටයුතු පිළිබඳ ඇමරිකානු සහකාර රාජ්ය ලේකම් Paul Kapur, වැඩබලන තානාපති Jayne Howell සහ ආරක්ෂක උපදේශක ලෙෆ්ටිනන්ට් කර්නල් Matthew House ඇතුළු උසස් නිලධාරීහු පිරිසක් ද මෙම අවස්ථාවට සහභාගි වූහ.
