කොහුවල, කළුබෝවිල ප්රදේශයේ පෞද්ගලික නිවාස සංකීර්ණයකදී 26 හැවිරිදි චීන ජාතික කාන්තාවක පිහියකින් ඇන ඝාතනය කිරීමේ සිද්ධියට සම්බන්ධ ප්රධාන සැකකරු හඳුනාගැනීම සඳහා පොලිසිය මහජන සහාය පතයි.
පසුගිය මාර්තු 23 වැනි සඳුදා දහවල් කාලයේදී කොහුවල, කළුබෝවිල පාරේ පිහිටි කෙන්ට් රෙසිඩන්ස් (Kent Residence) නිවාස සංකීර්ණයේ දෙවන මහලේ අංක 02/01 දරන නිවාස ඒකකය තුළදී මෙම කාන්තාව ඝාතනයට ලක්ව තිබිණි. පොලිස් විමර්ශනවලදී අනාවරණය වී ඇත්තේ ඇයගේ හිටපු පෙම්වතා විසින් මෙම ඝාතනය සිදුකර ඇති බවයි. මියගිය තරුණිය සහ සැකකරු අතර ඇති වූ පෞද්ගලික ආරවුලක් දුරදිග යාමෙන් මෙම ඝාතනය සිදුව ඇති බව මූලික පරීක්ෂණවලදී හෙළි වී තිබේ.
විමර්ශන අංශ පවසන පරිදි, ඝාතනයට ලක්වූ චීන ජාතික තරුණිය සහ සැකකරු මෙරට කිසිදු අධ්යාපන ආයතනයකට හෝ ස්ථිර රැකියාවකට සම්බන්ධ වී ඇති බවට මෙතෙක් තොරතුරු අනාවරණය වී නොමැත. ඔවුන් දෙදෙනාම මෙරටට පැමිණ ඇත්තේ සංචාරක වීසා බලපත්ර (Tourist Visa) මගින් බවට මූලිකව සැක කෙරෙන අතර, ඔවුන්ගේ වීසා කාලසීමාවන් ඉක්මවා මෙරට රැඳී සිටියේ ද යන්න පිළිබඳව ආගමන විගමන දෙපාර්තමේන්තුව හරහා විධිමත් පරීක්ෂණයක් ආරම්භ කර ඇත.
සැකකරු මේ වන විට ප්රදේශයෙන් පළාගොස් සැඟව සිටින අතර, ඔහු ගුවන් මගින් මෙරටින් පිටව යාම වැළැක්වීම සඳහා ගුවන් තොටුපොළ බලධාරීන් ද දැනුවත් කිරීමට පොලිසිය පියවර ගෙන තිබේ. සැකකරු අත්අඩංගුවට ගැනීම සඳහා ගල්කිස්ස කොට්ඨාස අපරාධ විමර්ශන කාර්යාංශය සහ කොහුවල පොලිසිය පුළුල් විමර්ශනයක් ආරම්භ කර ඇත.
සැකකරුගේ තොරතුරු පහත පරිදි වේ:
- නම: WANG HUIYIN (වෑන්ග් හුයින්)
- උපන් දිනය: 2000.06.01
- විදේශ ගමන් බලපත්ර අංක: EE6791329 හෝ ER3805969
- විශේෂ සලකුණු: සැකකරුගේ වම් අතේ ඇඟිලි තුවාල වී මැහුම් දමා ඇත.
සැකකරු හඳුනාගැනීමට හැකි වන පරිදි පොලිසිය විසින් ඔහුගේ ඡායාරූපයක් ද මාධ්ය වෙත මුදා හැර ඇත. මෙම සැකකරු සම්බන්ධයෙන් යම් තොරතුරක් වෙතොත් පහත සඳහන් දුරකථන අංක වෙත දැනුම් දෙන ලෙස පොලිසිය මහජනයාගෙන් ඉල්ලා සිටියි.
- ස්ථානාධිපති (කොට්ඨාස අපරාධ විමර්ශන කාර්යාංශය – ගල්කිස්ස): 071-8596408
- ස්ථානාධිපති (කොහුවල පොලිස් ස්ථානය): 071-8591669
