තමන්ගේ පක්ෂයට වියදම් කළ පුද්ගලයා ආරක්ෂා කර, ඔහුගේ දේපළ පවා නිදහස් කර දී ඇති රජය, වෙනත් පාර්ශවයන් වෙත ඇඟිල්ල දික් කරමින් පාස්කු ප්රහාරය දේශපාලනීකරණය කරමින් සිටින බව ශ්රී ලංකා පොදුජන පෙරමුණේ ජාතික සංවිධායක නාමල් රාජපක්ෂ පවසයි.
ඊයේ (20) නෙළුම් මාවතේ පිහිටි පක්ෂ මූලස්ථානයේදී මාධ්යවේදීන් නැඟූ ප්රශ්නවලට පිළිතුරු දෙමින් ඔහු මේ බව සඳහන් කළේය.
පාස්කු ප්රහාරය සම්බන්ධ පරීක්ෂණ වත්මන් ආණ්ඩුව විසින් සම්පූර්ණයෙන්ම දේශපාලනීකරණය කර ඇති බවත්, එක් පැත්තකින් හිටපු අමාත්ය පිල්ලෙයාන් අත්අඩංගුවට ගෙන වෙනත් ඝාතනයක් සම්බන්ධයෙන් අධිකරණයට ඉදිරිපත් කිරීම හාස්යයට කරුණක් බවත් නාමල් රාජපක්ෂ මෙහිදී පැවසීය.
විෂය භාර අමාත්යවරයා ඔහුගෙන් තොරතුරු රාශියක් අනාවරණය කරගත් බව පැවසුවද, ක්රියාත්මක වන ආකාරය ගැටලුසහගත බව ඔහු පෙන්වා දුන්නේය.
හිටපු බුද්ධි අංශ ප්රධානී සුරේෂ් සලේ අත්අඩංගුවට ගෙන ප්රශ්න කිරීම සම්බන්ධයෙන් අදහස් දක්වමින් නාමල් රාජපක්ෂ කියා සිටියේ, අදාළ ප්රශ්න කිරීම් සිදු කරනු ලබන්නේ පාස්කු ප්රහාරය සම්බන්ධ බුද්ධි වාර්තා ලාච්චුවේ දමා සඟවාගෙන සිටි පුද්ගලයන් විසින්ම බවය.
පාස්කු ප්රහාරයේ මහ මොළකරුවන් රාජපක්ෂලා යැයි පවසන පිරිස්, ජනතා විමුක්ති පෙරමුණේ ජාතික ලැයිස්තුවේ සිටි සහ එම පක්ෂයට වියදම් කළ ඊබ්රාහිම්ගෙන් ඒ පිළිබඳව විමසීම වඩාත් උචිත බව නාමල් රාජපක්ෂ අවධාරණය කළේය.
“ඊබ්රාහිම් තවමත් ජවිපෙ සාමාජිකයෙක්. ඔහුගේ පුතුන් දෙදෙනා ත්රස්තවාදීන් වූයේ ඇයිද කියා ඔහු දන්නවා ඇති. තමන්ගේ පක්ෂයට වියදම් කළ කෙනාව හංගලා, ආරක්ෂා කරලා, ඔහුගේ දේපළත් නිදහස් කරලා දීලා කොහේවත් නැති අයට ඇඟිල්ල දික් කිරීම නිවැරදි නැහැ,” යැයි ඔහු වැඩිදුරටත් කියා සිටියේය.
