ලලිත් චාමින්ද-
ගාල්ල බන්ධනාගාරය තුළදී හදිසියේ ඇති වූ රෝගී තත්ත්වයක් හේතුවෙන් කරාපිටිය ජාතික රෝහලට ඇතුළත් කිරීමෙන් පසු මියගිය රැඳවියෙකුගේ උදරයේ තිබී අයිස් හෝ හෙරොයින් මත්කුඩු බවට සැකකෙරෙන පැකට් හතක් සොයාගෙන තිබේ.
මෙසේ මියගොස් ඇත්තේ 59 හැවිරිදි වියේ පසුවූ රැඳවියෙකි. පශ්චාත් මරණ පරීක්ෂණයේදී මෙම සැකකටයුතු පැකට් තොගය හමුවී ඇති අතර, මියගිය රැඳවියා විසින් බන්ධනාගාරය තුළදී මෙම මත්ද්රව්ය පාර්සල් ගිලදමා ඇති බවට විමර්ශන අංශ සැකකරයි.
මෙම පශ්චාත් මරණ පරීක්ෂණය ගාල්ල ජාතික රෝහලේ සහකාර අධිකරණ වෛද්ය නිලධාරී ජී.එස්. චතුරාංගනී විසින් සිදුකරනු ලැබූ අතර එහිදී රැඳවියාගේ මරණය සම්බන්ධයෙන් විවෘත නිගමනයක් ලබා දී ඇත.
වැඩිදුර පරීක්ෂණ කටයුතු සඳහා රැඳවියාගේ රුධිරය, මුත්රා මෙන්ම උදරයේ තිබී සොයාගත් සැකකටයුතු පැකට් ඇතුළු සිරුරේ කොටස් රජයේ රසපරීක්ෂකවරයා වෙත යොමු කිරීමට පියවර ගෙන තිබේ. ගාල්ල පොලිසිය මෙම සිදුවීම සම්බන්ධයෙන් වැඩිදුර විමර්ශන පවත්වයි.
