ඉඳුනිල් කහටපිටිය –
මෑත කාලය තුළ මත්ද්රව්ය භාවිත කර රිය පදවන පුද්ගලයින්ගේ සංඛ්යාව කැපී පෙනෙන ලෙස ඉහළ ගොස් ඇති බව රථවාහන පාලන හා මාර්ග ආරක්ෂාව පිළිබඳ නියෝජ්ය පොලිස්පති ඩබ්ලිව්.පී.ජේ. සේනාධීර පවසයි.
නියෝජ්ය පොලිස්පතිවරයා අනාවරණය කළේ ගතවූ මාස හතරක කාලය තුළ පමණක් මත්ද්රව්ය භාවිත කර රිය පැදවූ රියදුරන් 4,750කට එරෙහිව නීතිමය පියවර ගෙන ඇති බවය. පෙර වසරවලට සාපේක්ෂව මෙය ඉතා ඉහළ අගයක් බව ද හෙතෙම සඳහන් කළේය.
විශේෂයෙන්ම මගී ප්රවාහන සේවාවල නියුතු රියදුරන් ඉලක්ක කරගනිමින් මෙම පරීක්ෂණ අඛණ්ඩව ක්රියාත්මක වේ. මේ සඳහා ජාතික ප්රවාහන වෛද්ය ආයතනයේ ජංගම රසායනාගාර පහසුකම් භාවිත කරමින් ක්ෂණික පරීක්ෂණ සිදුකිරීමට පියවර ගෙන ඇති බව ද නියෝජ්ය පොලිස්පති සේනාධීර වැඩිදුරටත් ප්රකාශ කර සිටියේය.
මේ විමර්ශන පුලුල් කිරීමත් සමග මත්ද්රව්ය භාවිතා කර රිය පදවන පුද්ගලයින් නීතියේ රැහැනට කොටු වීමත් ඉහළ යන ආකාරය පෙනී ගොස් ඇත.
රිය අනතුරුවලත් කැපී පෙනන වැඩිවීමක්
දිවයින පුරා සිදුවන රිය අනතුරු සම්බන්ධයෙන් පොලිස් මූලස්ථානය නිකුත් කර ඇති නවතම දත්ත පරීක්ෂා කිරීමේදී මාරක අනතුරුවල භයානක වර්ධනයක් පෙන්නුම් කරයි. මේ වසරේ ජනවාරි මාසයේ සිට අප්රේල් මැද භාගය දක්වා වූ කාලය තුළ පමණක් මෙරට මාර්ගවල සිදුවූ රිය අනතුරුවලින් පුද්ගලයින් 713 දෙනෙකු ජීවිතක්ෂයට පත්ව ඇත. ඉන් වැඩිම පිරිසක් යතුරුපැදිකරුවන් වන අතර එම සංඛ්යාව 248කි.
විශේෂයෙන්ම අප්රේල් 10 වැනිදා සිට 15 වැනිදා දක්වා වූ සිංහල හා දෙමළ අලුත් අවුරුදු නිවාඩු සමය තුළ පමණක් මාරක රිය අනතුරු 42ක් වාර්තා වී ඇති අතර, ඉන් පුද්ගලයින් 44 දෙනෙකුට සිය ජීවිත අහිමි වී තිබේ.
වසරේ මුල් මාස දෙකක කාලය (මාර්තු 02 දක්වා) සලකා බැලීමේදී සමස්ත රිය අනතුරු 3,642ක් වාර්තා වී ඇත. ඉන් අනතුරු 405ක් මාරක ගණයේ අනතුරු වන අතර එමගින් පුද්ගල මරණ 422ක් සිදුවිය. මීට අමතරව බරපතළ තුවාල ලැබූවන් 866ක්, සුළු තුවාල ලැබූවන් 1,730ක් සහ දේපළ හානි පමණක් සිදුවූ අනතුරු 641ක් වාර්තා වී තිබේ.
පසුගිය වසරට සාපේක්ෂව මෙම වසරේ මුල් භාගයේ සිටම අනතුරුවල වර්ධනයක් දක්නට ලැබෙන අතර, ජනවාරි මස මුල් දින 25 තුළ පමණක් මරණ 155ක් වාර්තා වීමෙන් එම තත්ත්වය මනාව පැහැදිලි වේ. මත්ද්රව්ය භාවිත කර රිය පැදවීම මෙන්ම නොසැලකිලිමත් ලෙස රිය ධාවනය කිරීම මෙම මරණ සංඛ්යාව ඉහළ යාමට ප්රධාන හේතු වී ඇති බව වාර්තා වේ.
