දේශපාලන ක්රියාවලිය තුළ තරුණ නියෝජනය වැඩි කිරීමට 262 වන අධිකාරය වූ පළාත් පාලන ආයතන ජන්ද විමසීම් ආඥාපනත සංශෝධනය සඳහා ඉදිරිපත් කළ කෙටුම්පතක් ලෙස පාර්ලිමේන්තු මන්ත්රී ප්රේමනාත් සී දොලවත්ත විසින් ඉදිරිපත් කර ඇති සාධනීය පුද්ගලික මන්ත්රී යෝජනාව අවභාවිතා කරමින් නාම යෝජනාත් කැඳවා තිබෙන පලාත් පාලන මැතිවරණය කල් දැමීමේ කුමන්ත්රණයක් පිළිබඳව අද (05) පාර්ලිමේන්තුව තුළ තියුණු සංවාදයක් ඇති විය.
නාමයෝජනා සඳහා දිනත් ප්රකාශයට පත් කර , නාමයෝජනා සංයුතිය පිළිබඳ ගැසට් පත්රයකින් දන්වා ඒ ක්රියාවලිය කරගෙන යන අතරතුර දොලවත්ත මන්ත්රීවරයාගේ යෝජනාව පාර්ලිමේන්තුව තුළ නීතියක් ලෙස සම්මත කරගැනීමට කරන මෙම උත්සාහය මේ මොහොතේ පැවැත්වීමට සූදානම්වන මැතිවරණය විෂයෙහි බරපතල විකෘතියක් නිර්මාණය කරනු ඇතැයි විපක්ෂය කරුණු මතු කරමින් ප්රකාශ කළේය.
මේ පිළිබඳව කරුණු දැක්වූ ජාතික ජන බලවේගයේ නායක පාර්ලිමේන්තු මන්ත්රී අනුර කුමාර දිසානායක මෙසේ ඒ තත්ත්වය පැහැදිලි කළේය.
ඔහු කීවේ ඉතාම සාධනීය කරුණු සහිත දොලවත්ත මන්ත්රීවරයාගේ යෝජනාව පිළිගන්නා නමුත් එය වලංගු විය යුත්තේ මෙම මැතිවරණයට නොව ඊලඟ පලාත් පාලන මැතිවරණයකට බවය.
මන්ත්රීවරයා මෙසේ ද පැවසීය.
“පළාත් පාලන මැතිවරණයන්හි පළමු සහ දෙවන නාම යෝජනා ලැයිස්තුවල අවම වශයෙන් 25%ක තරුණ නියෝජනය තහවුරු කිරීමට අවශ්ය ප්රතිපාදන මෙම නව කෙටුම්පතෙහි ඇතුළත් .“
“එහෙත් මැතිවරණ කොමිසම නාම යෝජනා දින ප්රකාශයට පත් කර අවසන්. දේශපාලන ව්යාපාර තමන්ගේ නාම යෝජනා සකස් කරමින් ඉන්නවා. එවැනි නාම යෝජනා සකස් කරමින් ඉන්න ගමන් දැන් මේ පාර්ලිමේන්තුවට පනතක් එනවා එම නාමයෝජනාවල සංයුතිය වෙනස් කරන්න.“
“සති දෙකක් ප්රකාශයට පත් කරලා තියනවා නාමයෝජනා කැඳවන්න. නාමයෝජනාවල සංයුතිය, අඩංගු විය යුත්තේ කොහොම ද, නාම යෝජනා සකස් විය යුත්තේ කොහොම ද කියලා ගැසට් නිවේදනය ප්රකාශයට පත් කරලා තියනවා. දැන් පාර්ලිමේන්තුව උත්සාහ කරනවා ඊට පටහැනි නීතියක් සම්පාදනය කරන්න. එය යෝග්ය තත්ත්වයක් නොවෙයි. “
“දැනට තියෙන්නෙ කාන්තා නියෝජනය තරග වදින ප්රතිශතයෙන් සියයට දහයකුත්, මුලු නියෝජනය සියයට විසිපහක් වන අකාරයටත් නාම යෝජනා සංයුතිය සකස් කරන්න. ඒ අනුව තමයි මේ නාමයෝජනා සකස් කරන්නෙ. සති දෙකයි තිබෙන්නේ.“
“දැන් මේ පාර්ලිමේන්තුවට යෝජනාවක් එනවා ඒක ඇතුළට තරුණ නියෝනය ඇතුළත් කරන්න කියලා. ඒ නිසා ගරු නියෝජ්ය කතානායක තුමනි. මේ පාර්ලිමේන්තුවෙ නාම යෝජනා කැඳවීමට පෙර මෙම නීතිය සම්මත උනොත් පනත ඇතුළෙ ගටුමක් නිර්මාණය වෙනවා. එක වගන්තියකින් කියන දේ නෙමෙයි අනෙක් වගන්තියෙන් ඇතිවෙන්නෙ.“
“ඒ නිසා මැතිවරණ කොමිසමට නියමිත පරිදි මැතිවරණය පැවැත්වීම සඳහා දුෂ්කරතාවයක් ඇති වෙනවා. දොලවත්ත මන්ත්රීතුමාගෙ යෝජනාවට අපි කවුරුත් පක්ෂපාතීයි. තව දේවල් පළාත් පාළන මැතිවරණයට අවශ්යයයි කියලා අපි ඇතිවෙනකම් කාරක සභාවෙ කතා කරලා තියනවා.“
“ඒව වලංගුයි. හැබැයි ඒ සියල්ල වලංගු වෙන්නෙ මේ මැතිවරණයට නෙමෙයි. මේ මැතිවරණයට දැන් එය වලංගු කරගැනිම සඳහා අවස්ථාවක් නෑ. “
“නාම යෝජනා කැඳවීම ප්රකාශයට පත් කරලා තියනවා. නාමයෝජනා කැඳවීම ප්රකාශයට පත් කරලා තියෙද්දි ඒ නාමයෝජනාවල සංයුතිය එහි අඩංගුව වෙනස් කිරීම සඳහා මෙම පාර්ලිමේන්තුවේ දී නිති සම්පාදනය කරන්න උත්සාහ කරනවා නම් ඒක ඉතාම විහිලුකාරී තත්ත්වයක්.“
