තලපති විජේ ගේ ආගමනයෙන්   ත්‍රිකෝණාකාර ගැටුමක් බවට පත් වූ තමිල්නාඩු මැතිවරණය අපට බලපානු ඇත්තේ කෙසේ ද?

උපේක්ෂා උඩුවැරැල්ල –

තමිල්නාඩු ප්‍රාන්ත සභා මැතිවරණයේ ඡන්ද විමසීම මේ වනවිට ආරම්භ වී ඇත.  මැතිවරණය ප්‍රාන්තය පුරා විසිරී ඇති සියලුම මැතිවරණ කොට්ඨාස 234 සඳහාම එකම අදියරක් යටතේ පැවැත්වේ.

මැතිවරණ ක්‍රියාවලිය නිල වශයෙන් ආරම්භ වූයේ 2026 මාර්තු 30 වනදා නාමයෝජනා පත්‍ර භාර ගැනීමත් සමඟය. නාමයෝජනා භාර ගැනීම අප්‍රේල් 6 වනදා අවසන් වූ අතර අප්‍රේල් 7 වනදා නාමයෝජනා පරීක්ෂාව සිදු කෙරිණි. නාමයෝජනා ඉවත් කර ගැනීම සඳහා අප්‍රේල් 9 වනදා දක්වා කාලය ලබා දී තිබුණි. අද දින පෙරවරු 7:00 සිට පස්වරු 6:00 දක්වා ඡන්ද විමසීම සිදු කෙරේ.

මැතිවරණයේ ඡන්ද ගණනය කිරීමේ කටයුතු සහ නිල ප්‍රතිඵල නිකුත් කිරීම 2026 මැයි 4 වනදා සිදු කිරීමට නියමිතය. සමස්ත මැතිවරණ ක්‍රියාවලිය මැයි 6 වනදා වන විට අවසන් කිරීමට මැතිවරණ බලධාරීන් අපේක්ෂා කරයි.

මැතිවරණ ඉතිහාසය වෙනස් කරන තරගයක්…

අද පැවැත්වෙමින් ඇති මෙම  මැතිවරණය එම ප්‍රාන්තයේ දේශපාලන ඉතිහාසයේ සන්ධිස්ථානයක් සනිටුහන් කරයි. දිගුකාලීනව පැවති ද්විපාර්ශ්වික දේශපාලන තරගය මෙවර අස්ථාවර ත්‍රිකෝණාකාර සටනක් බවට පත්ව තිබේ. දශක ගණනාවක් පුරා තමිල්නාඩු දේශපාලනය හැඩගැසුණේ  ද්‍රවිඩ මුන්නේත්‍ර කඟම් හෙවත් DMK (ද්‍රවිඩ ප්‍රගතිශීල සම්මේලනය)  සහ අනෛත්තින්දියා අණ්ණා ද්‍රවිඩ මුන්නේත්‍ර කලහම් හෙවත්  AIADMK (සමස්ත ඉන්දීය අන්නා ද්‍රවිඩ ප්‍රගතිශීලී සම්මේලනය) යන ද්‍රවිඩ පක්ෂ දෙක වටාය. බලය මාරුවෙන් මාරුවට හුවමාරු කර ගනිමින් එම පක්ෂ දෙක ප්‍රාන්තයේ දේශපාලන ගමන් මග තීරණය කළේය. එහෙත් ජනප්‍රිය සිනමා නළු තලපති විජේ සහ ඔහුගේ ‘තමිලග වෙට්ට්‍රි කසාගම්’  හෙවත්  TVK (තමිළනාඩු ජයග්‍රාහී පක්ෂය)     පැමිණීම මෙම සමීකරණය උඩුයටිකුරු කර තිබේ.

වසර 50කට වැඩි කාලයක් තමිල්නාඩු දේශපාලනය ද්‍රවිඩ මතවාදය මත පදනම් විය. DMK සහ AIADMK පක්ෂ සතුව ශක්තිමත් ඡන්ද පදනමක් සහ දැවැන්ත ක්‍රියාකාරී ජාලයක් පවතී. ඔවුන්ගේ මැතිවරණ ව්‍යාපාර බොහෝ විට සුබසාධන කටයුතු මුල් කර ගත්තේය. මෑත කාලීන මැතිවරණවලදී පවා සටන පැවතියේ මෙම ප්‍රධාන පාර්ශව දෙක අතරය. මහ ඇමති එම්.කේ. ස්ටාලින් යටතේ DMK පක්ෂය 2021 ප්‍රාන්ත මැතිවරණය සහ 2024 ලොක් සභා මැතිවරණය ජය ගත්තේය. එමගින් ප්‍රාන්තයේ ප්‍රදේශ රැසක සහ සමාජ සංයුතීන් තුළ සිය ආධිපත්‍යය තහවුරු කිරීමට එම පක්ෂය සමත් විය.

ජේ. ජයලලිතාගේ අභාවයෙන් පසු AIADMK පක්ෂය යම් දුර්වල වීමකට ලක් විය. එසේ වුවද එඩප්පාඩි පලනිසාමි යටතේ එම පක්ෂය ප්‍රධාන විපක්ෂය ලෙස තවදුරටත් රැඳී සිටී. සංවිධානාත්මක අභියෝග මධ්‍යයේ වුවද ඔවුන් සැලකිය යුතු ඡන්ද පදනමක් පවත්වා ගෙන යයි. මැතිවරණ ජයග්‍රහණ සඳහා ඔවුන් භාරතීය ජනතා පක්ෂය (BJP) වැනි පක්ෂ සමඟ සන්ධානගත වීම කෙරෙහි විශ්වාසය තබයි.

තලපති විජේගේ ආගමනය කළ බලපෑම

මීට පෙර කුඩා පක්ෂ පැවතියේ දේශපාලන ක්ෂේත්‍රයේ කෙළවරකය. මැතිවරණ ප්‍රතිඵල තීරණය වූයේ DMK සහ AIADMK අතර සෘජු සටනකිනි.  මෙම ස්ථාවර ද්විපාර්ශ්වික ස්වභාවය විජේගේ දේශපාලන ආගමනයත් සමඟ බිඳ වැටී තිබේ. විජේ යනු තමිල් සිනමාවේ සිටින දැවැන්තම තරුවකි. ඔහු තමා සතු ජනප්‍රියත්වය දේශපාලන වේදිකාවක් දක්වා පරිවර්තනය කර තිබේ. ද්‍රවිඩ පක්ෂ දෙකටම අභියෝග කිරීම ඔහුගේ අරමුණ වී ඇත.

විජේ ගේ  TVK පක්ෂය දූෂණ විරෝධය, පාලන ප්‍රතිසංස්කරණ සහ සමාජ යුක්තිය යන තේමාවන් වටා තරුණ සහයෝගීතාවක් ගොඩනගා ගෙන තිබේ. ඔවුන් පහළම මට්ටමේ සිට සිය පක්ෂය ශක්තිමත් කිරීමට පියවර ගෙන ඇත. දැවැන්ත රැලි සහ සමාජ මාධ්‍ය මෙහෙයුම් හරහා නාගරික ඡන්දදායකයන් සහ  සිය ප්‍රථම ඡන්දය භාවිතා කරන නව ඡන්දදායකයන් අතර ඔවුන් ආකර්ෂණය දිනාගෙන තිබේ. සමහර ඇස්තමේන්තුවලට අනුව මෙම පක්ෂය සිය ප්‍රථම මැතිවරණයේදීම සියයට 15-20ක පමණ ඡන්ද ප්‍රතිශතයක් ලබා ගැනීමට ඉඩ ඇත.

විජේ ගේ මැතිවරණ පොරොන්දු

TVK උපාය මාර්ගය විජේගේ පෞද්ගලික ජනප්‍රියත්වයට පමණක් සීමා නොවේ. ඔවුන් මෙම මැතිවරණය පරම්පරාගත වෙනසක් ලෙස හඳුන්වයි. තරුණ ඡන්දදායකයන් ඉලක්ක කර ගනිමින් රැකියා, පුහුණු අවස්ථා සහ මූල්‍ය ආධාර ලබා දීමට ඔවුන් පොරොන්දු වී තිබේ. තමිල්නාඩුව තුළ ලක්ෂ 12.5ක පමණ  සිය ප්‍රථම ඡන්දය භාවිතා කරන  ඡන්දදායකයන් පිරිසක් සිටිති. අවුරුදු 40ට අඩු ඡන්දදායකයන් සංඛ්‍යාව කෝටි 2.5කට ආසන්නය. එම නිසා මෙම තරුණ ඉලක්කගත ප්‍රවේශය ඉතා තීරණාත්මකය.

විජේ කාන්තා ඡන්දදායකයන් දිනා ගැනීමට ද විශේෂ උත්සාහයක් දරයි. සමස්ත ඡන්දදායකයන්ගෙන් සියයට 51ක් පමණ කාන්තාවන්ය.

• අවුරුදු 60ට අඩු කාන්තාවන් සඳහා රුපියල් 2,500ක මාසික දීමනාවක් ලබා දීමට TVK පොරොන්දු වී ඇත.
• වාර්ෂිකව නොමිලේ ගෑස් සිලින්ඩර 6ක් ලබා දීම ද ඔවුන්ගේ පොරොන්දුවකි.
• විවාහ කටයුතු සඳහා රන් සහ  සාරි ලබා දීමේ සුබසාධන වැඩපිළිවෙළක් ද ඔවුන් හඳුන්වා දී තිබේ. මෙය දේශපාලන උපාය මාර්ගික වෙනසකි.

විජේ ප්‍රධාන පක්ෂ දෙකට අභියෝගයක් ද?

මෙම ත්‍රිකෝණාකාර සටන හුදෙක් තෙවන පාර්ශවයක් එක්වීමක් පමණක් නොවේ. එය මැතිවරණ ගතිකත්වයේ ව්‍යුහාත්මක වෙනසකි. TVK පක්ෂය ප්‍රධාන පක්ෂ දෙකේම ඡන්ද පදනමට හානි කරමින් සිටී. DMK වෙත නැඹුරු විය හැකි තරුණ සහ නාගරික ඡන්ද ඔවුන් දිනා ගනිමින් සිටී. එමෙන්ම සාම්ප්‍රදායිකව AIADMK වටා ගොනුවන  රජයට එරෙහි ඡන්ද ද විජේ ගේ පක්ෂය  වෙත ආකර්ෂණය වේ. මෙම ඡන්ද බෙදී යාම නිසා මැතිවරණ ප්‍රතිඵලය පුරෝකථනය කිරීම අපහසුය.

TVK පක්ෂය සෘජු ජයග්‍රහණයක් ලබා නොගත්ත ද, රජයක් පිහිටුවීමේදී තීරණාත්මක සාධකය බවට පත්වීමට ඉඩ ඇත.

තමිල්නාඩු සන්ධාන දේශපාලනයේ වෙනසක්

මෙම තත්ත්වය තමිල්නාඩුවේ සන්ධාන දේශපාලනයට ද බලපා තිබේ. ඉතිහාසය පුරා තමිල්නාඩුවේ ජයග්‍රහණය තීරණය වූයේ පුළුල් සන්ධාන හරහාය. එහෙත් TVK පක්ෂය තනිව තරග කිරීමට තීරණය කිරීම නිසා අනෙක් පක්ෂවල ගණනය කිරීම් සංකීර්ණ වී ඇත. රජයට එරෙහි ඡන්ද බෙදී යාම වැළැක්වීමට AIADMK උත්සාහ කරයි. ඒ වෙනුවෙන් ඔවුන් මෙය DMK සහ තමන් අතර සෘජු සටනක් ලෙස පෙන්වීමට උත්සාහ දරයි. DMK පක්ෂය සිය පාලන වාර්තාව සහ සුබසාධන වැඩපිළිවෙළ තවදුරටත් ප්‍රචලිත කිරීමට පියවර ගෙන තිබේ.

කන්‍යාකුමාරි, තූත්තුකුඩි සහ තිරුනෙල්වේලි වැනි දකුණු දිස්ත්‍රික්කවල මෙන්ම චෙන්නායි වැනි නගරවල ද මෙම ත්‍රිකෝණාකාර සටන දැඩිව පවතී. සාම්ප්‍රදායික ඡන්ද රටාවන් වෙනස් කිරීමට TVK පක්ෂය සමත්ව ඇත. කෙසේ වුවද ඡන්දදායකයන්ගෙන් සියයට 40කට වැඩි පිරිසක් තවමත් මෙය DMK සහ AIADMK අතර සටනක් ලෙස සලකන බව සමීක්ෂණ පෙන්වා දෙයි. ත්‍රිකෝණාකාර සටනක් ලෙස මෙය පිළිගන්නේ සියයට 20කට අඩු පිරිසකි.

හැමෝටම ඇති වාසි අවාසි

එම්.කේ. ස්ටාලින්ගේ DMK පක්ෂයට සිය යහපාලන ප්‍රතිරූපය වාසියකි. සුබසාධනය, සමාජ යුක්තිය සහ ස්ථාවර පාලනය මත ඔවුන් සිය මැතිවරණ ව්‍යාපාරය රඳවාගෙන සිටී. සුළු ජාතීන්, දාලිත් ජනතාව සහ නාගරික මධ්‍යම පන්තියේ සහය ඔවුන්ට පවතී.

එහෙත් රජයට එරෙහි විරෝධය පාලනය කිරීම සහ තරුණ ඡන්ද TVK වෙත ගලා යාම වැළැක්වීම ඔවුන්ට ඇති අභියෝගයය.

AIADMK පක්ෂයට ඇති වාසිය වන්නේ රජයට එරෙහි ඡන්ද ඒකරාශී කිරීමට ඇති හැකියාවය. දූෂණය සහ නීතිය හා සාමය පිළිබඳ ප්‍රශ්න මතු කරමින් ඔවුන් ප්‍රහාරාත්මක මැතිවරණ ව්‍යාපාරයක නිරත වේ.

එහෙත් TVK පක්ෂය ඔවුන්ට දැඩි තර්ජනයකි. රජයට එරෙහි ඡන්ද බෙදී යාම නිසා AIADMK පක්ෂයේ ජයග්‍රාහී අවස්ථා අවම වීමට ඉඩ ඇත.

සමස්තයක් ලෙස 2026 තමිල්නාඩු මැතිවරණය සරල තරගයක් නොවේ. DMK, AIADMK සහ TVK යන පක්ෂ තුන අතර පවතින මෙම ත්‍රිකෝණාකාර සටනේදී නවක පක්ෂය සෘජු ජයග්‍රාහකයා නොවුවද, අවසන් ප්‍රතිඵලය තීරණය කරන ප්‍රධාන සාධකය වනු නිසැකය.

මෙම මැතිවරණය ලංකාවට බලපානු ඇත්තේ  කෙසේ ද?

ශ්‍රී ලංකාවට  මෙම මැතිවරණය  අතිශය වැදගත් වන්නේ පෝක් සමුද්‍ර සන්ධියේ දෙපස වෙසෙන දෙමළ ජනයා අතර පවතින සමීප ජනවාර්ගික, සංස්කෘතික සහ දේශපාලන සබඳතා හේතුවෙනි.

තමිල්නාඩුව යනු ශ්‍රී ලාංකික දෙමළ ජනතාව කෙරෙහි දැඩි අනුකම්පාවක් සහ සහෝදරත්වයක් දක්වන මිලියන සංඛ්‍යාත දෙමළ ජනතාවකගේ නිවහනය. දශක ගණනාවක සිට තමිල්නාඩු දේශපාලනඥයන් සහ ඡන්දදායකයන් ශ්‍රී ලංකාවේ සිදුවන සිදුවීම්, විශේෂයෙන්ම සිවිල් යුද්ධයෙන් පසු තත්ත්වය, ජනවාර්ගික අයිතිවාසිකම් සහ ප්‍රතිසන්ධානය වැනි කරුණු කෙරෙහි දැඩි අවධානයෙන් පසුවේ. තමිල්නාඩුවේ පිහිටුවන නව රජයක්   නව දිල්ලියේ පිහිටි ඉන්දීය මධ්‍යම රජයට බලපෑම් කරමින් ශ්‍රී ලංකාවේ දෙමළ ප්‍රජාවගේ ගැටලුවලදී වඩාත් දැඩි ස්ථාවරයක් ගැනීමට බල කරන ඉතිහාසයක් අපි අත් විඳ ඇත්තෙමු.

මෙයට ප්‍රධාන හේතුව වන්නේ තමිල්නාඩුවේ දේශපාලන පක්ෂ “දෙමළ හිතවාදී” බව පෙන්වමින් ඡන්ද දිනා ගැනීමට එකිනෙකා සමඟ තරග වැදීමය. ශ්‍රී ලංකාවේ නායකයන් ද සිය රටේ සිදුවන දේ තමිල්නාඩු දේශපාලනයට බලපාන බවත්, එහි ප්‍රතිවිරුද්ධ බලපෑම ශ්‍රී ලංකාවට එල්ල වන බවත් මැනවින් වටහාගෙන සිටිති.

දේශපාලන බලපෑම

මෙම මැතිවරණය වැදගත් වීමට තවත් ප්‍රධාන හේතුවක් වන්නේ ඉන්දු-ශ්‍රී ලංකා සබඳතා සහ විශේෂයෙන්ම 1987 ඉන්දු-ලංකා ගිවිසුම ක්‍රියාත්මක කිරීමට ඇති බලපෑමය. 13 වැනි ආණ්ඩුක්‍රම ව්‍යවස්ථා සංශෝධනය හරහා බලය බෙදා හැරීම සහ පළාත් සභා මැතිවරණය පැවැත්වීම මගින් දෙමළ බහුතරයක් වෙසෙන ප්‍රදේශවලට බලය ලබා දීමට එම ගිවිසුමෙන් පොරොන්දු විය. ශ්‍රී ලංකාවේ දෙමළ දේශපාලන පක්ෂ නිරන්තරයෙන් ඉන්දියාවෙන් ඉල්ලා සිටින්නේ සමානාත්මතාවය, යුක්තිය සහ සාමය උදෙසා ශ්‍රී ලංකාව මෙම පොරොන්දු සම්පූර්ණයෙන් ඉටු කරන බව සහතික කරන ලෙසය.

තමිල්නාඩුවේ පොදු ජනතාව මෙම ප්‍රශ්න කෙරෙහි දක්වන දැඩි සංවේදීතාව නිසා, 2026 දී ජයග්‍රහණය කරන ඕනෑම පක්ෂයක් මේ සම්බන්ධයෙන් නව දිල්ලියට වැඩි බලපෑමක් කිරීමට ඉඩ ඇත. තමිල්නාඩුවේ මේ දේශපාලන මනෝභාවය  මැතිවරණයට පෙර සිටම ඉන්දීය දේශපාලනයේ හැසිරීමෙන් ප්‍රකට වී තිබේ.   තමිල්නාඩුව නියෝජනය කරන ඉන්දීය උප ජනාධිපතිවරයා මැතිවරණයට දින කිහිපයකට පෙර කොළඹ සංචාරය කිරීමේ අරමුණ ද ඉන්දියාව දෙමළ ජනයාගේ ප්‍රශ්න කෙරෙහි අවධානයෙන් සිටින බව පෙන්වීමට සහ තමිල්නාඩු ඡන්දදායකයන්ගේ හැඟීම් සමනය කිරීමට ගත් උත්සාහයක් ලෙස බව බොහෝ දෙනා විශ්වාස කරති.

ඉන්දීය ධීවර ගැටලුව සහ සරණාගත ප්‍රශ්නය

මීට අමතරව, ධීවර අයිතීන් සහ තමිල්නාඩුවේ වෙසෙන ශ්‍රී ලාංකික දෙමළ සරණාගතයන් පිළිබඳ එදිනෙදා ගැටලු ද මෙම මැතිවරණයේදී කැපී පෙනේ. පෝක් සමුද්‍ර සන්ධියේ මසුන් ඇල්ලීමේදී සහ කච්චතීවු දූපත සම්බන්ධ මතභේදවලදී තමිල්නාඩු ධීවරයන් සහ ශ්‍රී ලංකා නාවික හමුදාව අතර නිරන්තර ගැටුම් ඇති වේ. තමිල්නාඩු දේශපාලන පක්ෂ දේශීය ජීවනෝපායන් ආරක්ෂා කිරීම සඳහා මැතිවරණ සමයේදී මෙම ප්‍රශ්නය දිගින් දිගටම මතු කරයි.

ඒ අතරම, දශක ගණනාවක සිට තමිල්නාඩු කඳවුරුවල වෙසෙන දහස් සංඛ්‍යාත ශ්‍රී ලාංකික දෙමළ සරණාගතයන් ඉන්දීය පුරවැසිභාවය ඉල්ලා සිටීම ද මැතිවරණ වේදිකාවේ උණුසුම් මාතෘකාවකි. තමිල්නාඩුවේ නව රජයක් මගින් මෙම මානුෂීය සහ දේශසීමා ප්‍රශ්න සම්බන්ධයෙන් නව දිල්ලියට දැඩි බලපෑමක් කළ හැකි අතර, එය ශ්‍රී ලංකාව ඉන්දියාව සමඟ පවත්වන සබඳතාවලට සෘජුවම බලපානු ඇත.

කෙටියෙන් කිවහොත්, ශ්‍රී ලංකාව තමිල්නාඩු මැතිවරණයේ ප්‍රධානතම මාතෘකාව නොවුවද, එම මැතිවරණ ප්‍රතිඵලය දෙමළ අයිතිවාසිකම් සම්බන්ධයෙන් ඉන්දියාව ශ්‍රී ලංකාවට ලබා දෙන බලපෑම තීරණය කරනු ඇත.  එය රටේ දේශපාලනයේ ගතිකත්වය තීරණය කරන ප්‍රධාන බලපෑමක් වීම අපේක්ෂා කළ යුතු තත්ත්වයකි.