පහුගිය ජනාධිපතිවරණයේ දී ප්රධානතම අපේක්ෂකයෙකුගේ මැතිවරණ සටහන මෙහෙයවීම සඳහා දෙමටගොඩ හන්දියට නුදුරින් තුන්මහල් ගොඩනැගිල්ලක ප්රධාන මැතිවරණ කාර්යාලයක් පවත්වාගෙන ගියේය. ඒ සඳහා එම ගොඩනැගිල්ල ලැබී තිබුණේ කුලියට නොව, ව්යාපාරිකයෙකුගේ ප්රදානයක් වශයෙනි.
අනතුරුව මහ මැතිවරණයේ දී පොහොට්ටුවේ ප්රබලම වියත් තරුණ දේශපාලකයෙකුගේ මැතිවරණ කාර්යාලයක් ගොඩනැගිල්ලේම පවත්වාගෙන ගියේය. ඒ දේශපාලකයා පාර්ලිමේන්තු ගියේය. ඔහුට අවශ්ය කාර්යාල පහසුකම සැලසුවේත් මුලින් කී ව්යාපාරිකයා විසිනි. ඒ මුදල් අයකරගැනීමකින් තොරවය.
සමාජයට මහා දානපතියෙක් සේ පෙනී සිටි මේ තුන්මහල් ගොඩනැගිල්ල හිමි ව්යාපාරිකයාගේ දෙමටගොඩ පිහිටි මාලිගාවක් වගේ නිවස අද (29) උදේ සී.අයි.ඩී. ය වැටලුවේය.
ඒ ව්යාපාරිකයාට කීවේ කවුරුත් කීවේ දෙමටගොඩ රුවන් කියාය. දෙමටගොඩ රුවන් දෙමටගොඩ චමින්දගේ සහෝදරයා ය. දෙමටගොඩ චමින්ද මේ වනවිට මරණීය දණ්ඩනය හිමි වී මහඋළුගෙදරය. ඒ භාරත ලක්ෂ්මන් ප්රේමදන්ද්ර ඝාතනයට වරදකරු වී මෙනි.
දෙමටගොඩ චමින්ද ප්රසිද්ධව සිටියේ කුඩු ජාවාරමටය. දෙමටගොඩ රුවන් ද එසේමය. දන්නෝ සියලු දෙනා මේ දෙසෝයුරන්ගේ පැටිකිරිය දැනගෙන සිටියහ. රටේ දේශපාලකයන් බැලන්ස් කරගෙන පොලිසියේ ඉහළම නිලධාරීන්ට “මචං“ වහරින් ආමන්ත්රණය කරමින් ඔවුන්ට ඇති තරම් මුදල් වියදම් කරමින් දෙමටගොඩ රුවන් කරන මත්ද්රව්ය ජාවාරම ගැන සී.අයි.ඩි. ය සිටියේ දීර්ඝ විමර්ශනයකය. ගහන්නම් වාලේ ගසා අත් පය පුච්චා ගන්නට පමණක් නොව බෙල්ලත් කපා ගන්නට සූදානම් නොවූ සී.අයි.ඩී. විමර්ශකයන් දෙමටගොඩ රුවන්ගේ විමර්ශන පෙළ ගස්වන්නේ ඉතාම සීරුවෙනි.
අසීමිත වත්කම්
දෙමටගොඩ රුවන් අසීමිත වත්කම් සහිත වූවෙකි. ඔහුගේ අධි සුඛෝපභෝගී වාහන ගණනාවක් විමර්ශකයෝ අධ්යයනය කළහ. ඒ සමහර වාහන පාවිච්චි කළේ පොලිසියේ ලොක්කන්ය. තවත් වාහන පන්සල්වල නායක හාමුදුරුවරුය. සමහර වාහන ස්ථානගත කර තිබුණේ කොළඹින් පිටය. ඔහුට කොළඹ වටා අධි සුඛෝපභෝගී මහල් නිවාස තිබිණි. වතු තිබිණි. ඔහු ජීවත් වූයේ මාලිගාවක් වැනි නිවසකය.
මේ වත්කම් පිළිබඳ විමර්ශකයෝ නීත්යානුකූලව ඔහුව ගෙන්වා ප්රශ්න කරන්නේ මත්ද්රව්ය ජාවාරම ගැන තොරතුරු ගණනාවක් ලැබෙමින් තිබුණ් හෙයිනි. ඔහු ඒ සඳහා සී.අයි.ඩී.ආවේ බදු ලිපි ගොනුත් සමගය. දෙමටගොඩ ඔහු සතුව අවන්හලක් ඇත්තේය. ඔහු ඉදිරිපත්කළ වත්කම් සියල්ලම එම අවන්හලෙන් කළ ඉපැයීම්ය. ඒ සඳහා ඔහු බදු ලේඛනත් ඉදිරිපත් කළේය. එම බදුගෙවීම නිවැරදිවම කළ ආකාරය ලිපි ලේඛනවල තිබිණි. ඒ ගෙවූ බදු ප්රමාණය කොළඹ තරු පන්තියේ හෝටලයක්වත් නොගෙවන තරම් විය. රුවන් කොටුවන්නේ මෙතැනිනි.
විමර්ශකයෝ අදාල බදු ලේඛන ආදායම් බදු දෙපාර්තමේන්තුව හරහා නැවත විමසා බැලූහ. චමින්ද ඉදිරිපත් කළ සියලුම ලිපිගොනු ව්යාජ ඒවා බව තහවුරු වූයේය. විමර්ශනය ශක්තිමත්ව ගොඩනැගෙන්නේ මේ තහවුරු කරගැනීමෙන් පසුය.
රුවන්ගේ ගෙදර
රුවන් සොයාගෙන විමර්ශකයන් ඔහුගේ නිවසට යන්නේය. නිවස පිටතින් ලොකු ලකයක් නැති බව පෙනුණත් ඇතුළනම් මාලිගාවකි. නිවසේ අවට සහ අභ්යන්තරයේ සෑම ප්රදේශයක්ම ආවරණය වන ආකාරයට සී.සී.ටී.වී ආවරණයක් පැවතුනේ බලකොටුවක මෙනි. ඉහළම මාලයේ ලංකාවේ ඇති සුපිරිම ජිම් එකකි. එම පහසුකම් සලසා දී තිබුණේ රුවන්ගේ සහ චමින්දගේ දරුවන්ට ක්රීඩා කිරීමටය.
වත්තේ නවතා තිබූ අති සුඛෝපභෝගී වාහන පන්තිය කෝටි 12ක් ඉක්මවීය. බැංකු කීපයකම සේප්පුවල ඔහුගේ රන් බඩු තැන්පත් කර ඇති බව හෙළි වී තිබේ. නිවසේ සේප්පුවලද කෝටි ගණන් රන් බඩු සහ මුදල්ය.
විමර්ශකයන් කියන්නේ ඔහු පසුගිය වසර තුළ පමණක් රට තුළට ගෙනා කුඩු ප්රමාණය කිලෝ 1000ක් ඉක්මවා ඇති බවය. එනම් කුඩු ටොන් එකක් ගෙන්වා ඇති බවය. ඒ මුදල් භාවිතයෙන් ඔහු රටේ දේශපාලනය මෙන්ම නීතිය ක්රියාත්මක කරන පොලිසිය ද හසුරුවා ඇති බවය.
මේ වනවිට රුවන්ගේ කුඩු සල්ලිවලින් නැටූ රූකඩ දේශපාලකයින් මෙන්ම රුවන්ගේ මචංලා වූ පොලිස් ලොක්කන් ද , රුවන්ගේ කුඩු ඩීල් කළ හමුදා නිලධාරීන් ද නම් පිටින් දැන් සී.අයි.ඩී ලයිතුවලය.
දියවූ දේශපාලන හයිය!
දෙමටගොඩ රුවන් මින් පෙර අවස්ථා කීපයක දීම දේශපාලනයට ප්රවේශ වීමට උත්සාහ කළේය. පසුගිය රජය සමයේ දී ශ්රී.ල.නි.ප බොරැල්ලේ ප්රබලයෙක් හරහා පොදුජන එක්සත් පෙරමුණෙන් බොරැල්ල නගර සභාවට එන්නට හැදුවේය. එය අභ්යන්තර විරෝධය නිසා වැලකිනි. අනතුරුව එක්සත් ජාතික පෙරමුණේ බොරැල්ල කොට්ඨාසයක සංවිධායක තනතුරක් සිය පුතාට ලබා දීමට කටයුතු කර එහි කටයුතු කරගෙන යද්දී මතු වූ විරෝධතාවයක් නිසා මග නැවතුනේය. ජනාධිපතිවරණයට හා මහ මැතිවරණයට පොදුජන පෙරමුණේ පහසුකම් සපයන ව්යාපාරිකයෙක් ලෙස ඔහු මතුවන්නේ ඉන් අනතුරුවය.
එහෙත් මෙතෙක් තිබූ දේශපාලන හයිය රුවන් නොසිතූ ලෙස රුවන්ගෙන් ඉවත් වෙමින් ඇත. ඒ හේතුව නොපෙනේ. මින් පෙර දී දෙමටගොඩ රුවන් රටේ හිටපු ඉහළම පොලිස් නිළධාරියත් තමන්ගේ මත් කුඩු ගනුදෙණු බේරාගන්නට කඩේ යැවිය හැකි බලයක් සහිතව සිටියේය.
වර්ෂ 2010 දී දෙමටගොඩ රුවන්ගේ කුඩු තොගයක් හලාවත සිට කොළඹ රැගෙන එන විට පොලිස් විමර්ශකයින් කණ්ඩායමක් විසින් අත්අඩංගුවට ගත්තේය. එදිනම රාත්රියේ දී පොලිසියේ ඉහළම නිලධාරියා විමර්ශකයන් සොයා ගියේය. ගොස් ඔහුගේ නිරීක්ෂණය යටතේම අදාලා ලිපි ලේඛන වෙනස් කළේය. කුඩු තොගය උසාවි ගියේ කේරල ගංජා ලෙස වෙනස් වීමෙනි.
එවැනි බලයක් සහිතව සිට, මෑතක්වන තුරුම දේශපාලකයන් හා පොලිස් නිලධාරීන් සිය මුදල්වලින් නැටවූ දෙමටගොඩ රුවන්ට එරෙහිව පොලිස් විමර්ශකයන් නැගී සිට ඇත.
මුදල් විශුද්ධිකරණය යටතේ ඔහුට නඩු පවරා ඔහුගේ දේපල , වත්කම් රාජ සන්තක කිරීමේ කටයුත්ත ක්රියාත්මක වෙමින් තිබේ.
