මෑතකදී ප්රසිද්ධියට පත් කරන ලද ජෙෆ්රි එප්ස්ටීන් (Jeffrey Epstein) නඩු වාර්තාවල කොටසක් ලෙස, දිවංගත සුප්රකට තාරකා භෞතික විද්යාඥ ස්ටීවන් හෝකින් බිකිනි ඇඳුමෙන් සැරසුණු කාන්තාවන් දෙදෙනෙකු අසල ඉතා ප්රීතියෙන් පසුවන අයුරු දැක්වෙන ඡායාරූපයක් නැවත කරළියට පැමිණ තිබේ.
නිල් පැහැති හාන්සි පුටුවක වැතිර, පලතුරුවලින් සරසන ලද පානයක් අතැතිව සිටින හෝකින්ගේ මෙම රූපය අන්තර්ජාලය තුළ දැඩි කුතුහලයක් සහ විවිධ කතාබහක් ඇති කිරීමට සමත්ව ඇත. කෙසේ වෙතත්, හෝකින්ගේ පවුලේ සාමාජිකයන් වහාම කරුණු පැහැදිලි කරමින් ප්රකාශ කර සිටියේ, එම කාන්තාවන් එක්සත් රාජධානියේ සිට ඔහු සමඟ පැමිණි ඔහුගේ දීර්ඝකාලීන උපස්ථායිකාවන් බවයි. එමෙන්ම එහි කිසියම් අයථා හැසිරීමක් පවතින බවට කෙරෙන අනුමාන කිරීම් “අතිශය වැරදි සහගත මෙන්ම සත්යයෙන් බෙහෙවින් දුරස්” බව පවසමින් ඔවුන් ඒවා බැහැර කර ඇත.
2006 මාර්තු මාසයට අයත් මෙම ඡායාරූපය ලබාගෙන ඇත්තේ ඇමරිකානු වර්ජින් දූපත්වල සෙන්ට් තෝමස්හි පිහිටි ‘රිට්ස් කාල්ටන්’ (Ritz-Carlton) හෝටලයේදීය. හෝකින් එහි ගොස් තිබුණේ “The Energy of Empty Space That Isn’t Zero” (ශුන්ය නොවන හිස් අවකාශයේ ශක්තිය) නමැති විද්යාත්මක සමුළුවකට සහභාගී වීම සඳහාය.
ප්රමුඛ පෙළේ විද්යාඥයින් 21 දෙනෙකු සහභාගී වූ මෙම වැඩසටහන සඳහා මූල්ය අනුග්රහය දක්වා තිබුණේ ලිංගික අපරාධකරුවෙකු ලෙස වරදකරු වූ එප්ස්ටීන් විසිනි. එප්ස්ටීන්ගේ ඉහළ පෙළේ සබඳතා ජාලය මේ වන විට දැඩි පරීක්ෂාවට ලක්ව පවතී. මෙම සංචාරය අතරතුර, හෝකින්ගේ චලන අපහසුතා සැලකිල්ලට ගනිමින් විශේෂයෙන් සකස් කරන ලද සබ්මැරීනයක නැගී මුහුදු පතුල නැරඹීමටත්, බාබකියු (Barbecue) සාදයකට සහභාගී වීමටත් ඔහුට අවස්ථාව සලසා දී තිබුණි.
එප්ස්ටීන් ලිපිගොනු හරහා තහවුරු නොකළ විවිධ චෝදනා මතු වී ඇතත් (2015 වසරේ එප්ස්ටීන් යැවූ විද්යුත් ලිපියක හෝකින් නීති විරෝධී ක්රියාවලට සම්බන්ධ බවට කළ අසත්ය ප්රකාශයක් ද ඇතුළුව), හෝකින් අතින් කිසිදු වරදක් සිදුව ඇති බවට සාක්ෂි හමු වී නොමැත. නවතම ලේඛනවල හෝකින්ගේ නම 250 වාරයකට වඩා සඳහන් වීමෙන් ඔහු වරදකරුවෙකු බව අදහස් නොවන බවත්, භෞතික විද්යාඥයාගේ එහි පැමිණීම හුදෙක් සමුළුවට අදාළ වෘත්තීයමය කාරණයක් පමණක් බවත් විශේෂඥයෝ අවධාරණය කරති.
හෝකින්ගේ ALS රෝගී තත්ත්වය පිළිබඳ අවබෝධය
හෝකින්ගේ අසාමාන්ය ජීවිතයේ කේන්ද්රය වූයේ දශක කිහිපයක් තිස්සේ ඔහු ‘ඇමියෝට්රොෆික් ලැටරල් ස්ක්ලෙරෝසිස්’ (ALS) රෝගය සමඟ කළ අරගලයයි. මෙය ‘මෝටර් නියුරෝන රෝගය’ (Motor Neuron Disease) ලෙස ද හැඳින්වේ. සරලව පැවසුවහොත්, ALS යනු ශරීරයේ ඉච්ඡානුග පේෂීන් (සිතා මතා ක්රියා කරවන මාංශ පේශීන්) පාලනය කරන ස්නායු සෛලවලට පහර දෙමින් ක්රමයෙන් වර්ධනය වෙමින් ස්නායු පරිහානියට පත් කරන රෝගී තත්ත්වයකි. මෙය ක්රමයෙන් මාංශ පේශි දුර්වල වීමටත්, අංශභාග තත්ත්වයටත් හේතු වන අතර අවසානයේ ස්වසනය, කථනය සහ ගිලීමේ හැකියාවටත් බලපෑම් කරයි.
කෙසේ වෙතත්, සාමාන්යයෙන් මෙහිදී පුද්ගලයාගේ බුද්ධිමය හැකියාවන්ට හානියක් සිදු නොවේ. 1963 දී කේම්බ්රිජ් විශ්ව විද්යාලයේ පශ්චාත් උපාධි අපේක්ෂකයෙකු ලෙස සිටියදී, වයස අවුරුදු 21 දී හෝකින් හට මෙම රෝගය ඇති බව හඳුනා ගැනුණි. පැකිලෙන සුළු කතාව සහ නිතර ඇද වැටීම වැනි මුල් රෝග ලක්ෂණ ඔහු පෙන්නුම් කළේය. එවකට වෛද්යවරුන් ඔහුට ජීවත් වීමට ඉතිරිව ඇත්තේ වසර දෙකක් පමණක් බව පැවසුවද, එම අනාවැකිය වැරදි බව ඔප්පු කරමින් ඔහු දශක පහකට වැඩි කාලයක් ජීවත් විය.
ALS රෝගය පුද්ගලයාගෙන් පුද්ගලයාට වෙනස් වේ. සාමාන්යයෙන් රෝගය හඳුනා ගැනීමෙන් පසු ආයු කාලය වසර දෙකක් හෝ පහක් වුවද, හෝකින්ගේ රෝගය ඉතා සෙමින් වර්ධනය වූ එකක් වූ නිසා දැඩි ශාරීරික සීමාවන් මධ්යයේ වුවද ඔහුගේ බුද්ධිමය කටයුතු කරගෙන යාමට ඔහුට හැකි විය. 1970 දශකය වන විට ඔහුට රෝද පුටුවක් අවශ්ය වූ අතර, 1985 දී වැළඳුණු නියුමෝනියාව නිසා සිදුකළ සැත්කමක් හේතුවෙන් ඔහුගේ ස්වභාවික කටහඬ අහිමි විය. ඉන්පසුව, මුලින් අතින් සහ පසුව කම්මුල් මාංශ පේශිවල චලනයෙන් ක්රියා කරන විශේෂිත උපකරණයක් ආධාරයෙන් ඔහු අදහස් ප්රකාශ කළේය.
ජයග්රහණ සහ නොසැලෙන ධෛර්යය පිරි ජීවිතයක්
ALS රෝගය දරුණු ලෙස වර්ධනය වුවද, හෝකින්ගේ ජීවිතය මිනිස් නොසැලෙන ධෛර්යය සහ බුද්ධිමය දීප්තිය පිළිබඳ සාක්ෂියක් විය. රෝගය හඳුනාගත් මුල් අවධියේදී දැඩි මානසික අවපීඩනයට පත්වුවද, පසුව ඔහු තම වැඩකටයුතු සඳහා නැවත කැප විය. තම කාලය සීමිත බව දැන සිටීම වැඩි යමක් සාක්ෂාත් කර ගැනීමට ඔහුට පෙළඹවීමක් විය. ඔහු ආචාර්ය උපාධිය සම්පූර්ණ කළ අතර, 1965 දී ජේන් වයිල්ඩ් (Jane Wilde) සමඟ විවාහ විය (ඔවුන්ට දරුවන් තිදෙනෙකු සිටී). එතැන් සිට ඔහු විශ්වය පිළිබඳ අපගේ අවබෝධය විප්ලවීය වෙනසකට ලක් කළේය.
කළු කුහර මගින් විකිරණ නිකුත් කරන බව ඔප්පු කිරීම (දැන් මෙය ‘හෝකින් විකිරණය’ ලෙස හැඳින්වේ), ‘බිග් බෑන්ග්’ (Big Bang) හෙවත් මහා පිපිරුම් වාදය පිළිබඳ සිද්ධාන්ත දියුණු කිරීම සහ 1988 දී “A Brief History of Time” නමැති ලොව වැඩියෙන්ම අලෙවි වූ ග්රන්ථය රචනා කිරීම ඔහුගේ ප්රධාන දායකත්වයන් වේ. පිටපත් මිලියන 10 කට වඩා අලෙවි වූ මෙම පොත මගින් සංකීර්ණ භෞතික විද්යාව සාමාන්ය ජනතාවට සමීප කළේය. ඔහු 1979 සිට 2009 දක්වා කේම්බ්රිජ්හි අතිශය ගෞරවනීය ‘ලුකාසියන් ගණිත මහාචාර්ය’ (Lucasian Professor of Mathematics) ධුරය දැරීය. මෙය වරක් අයිසැක් නිව්ටන් දැරූ ධුරයකි.
තම රෝගී තත්ත්වය මධ්යයේ වුවද හෝකින් ලොව පුරා සංචාරය කළේය, ආබාධිත පුද්ගලයන්ගේ අයිතිවාසිකම් වෙනුවෙන් පෙනී සිටියේය, සහ ‘The Simpsons’ වැනි රූපවාහිනී වැඩසටහන්වල පවා පෙනී සිටිමින් සංස්කෘතික නිරූපකයක් බවට පත් විය. 2018 වසරේදී වයස අවුරුදු 76 දී ඔහු සාමකාමීව අභාවප්රාප්ත විය. ඔහු ඉතිරි කර ගිය උරුමය හුදෙක් විද්යාවට පමණක් සීමා නොවී, මිනිස් ආත්මයේ පවතින අසීමිත ශක්තිය ලොවටම කියාපායි.
නැවත කරළියට පැමිණි එම ඡායාරූපය ඔහුගේ ප්රතිරූපයට කැළලක් ඇති කිරීමට වඩා, හෝකින්ගේ ජීවිතයේ සැහැල්ලු පැත්තක් ඉස්මතු කරයි. එනම්, දැඩි අභියෝග හමුවේ තමන්ට මුලුමනින්ම අහිමි වූ ජීවිතයේ සතුට සොයා යන මිනිසෙකුගේ සංවේදී දර්ශනයක් එම රූප රාමුවේ ඇති අයුරු පමණක් දකිමි.
ඇත්ත වශයෙන්ම එය අවුලවන සුළු පහත් ලිංගික අධ්යාශයන් ඉදිරියට දමා කරන අවකල් විග්රහයකට වඩා නිශ්ක්රීය කරන ලද ශරීරයක උද්දීප්තවන මනුෂ්ය හැඟීමක ගැඹුර සංවේදීව හඳුනා ගැනීමට අවස්ථාවක් කරගැනීමට තරම් ලෝකය යහපත් එකක් වනු ඇතැයි විශ්වාස කරමි.
