ඉඳුනිල් කහටපිටිය –
ශ්රී ලංකා ක්රිකට් ව්යුහය තුළ තීරණාත්මක බලපෑමක් සිදු කළ හැකි ශ්රී ලංකා ‘ඒ’ කණ්ඩායමේ ප්රධාන පුහුණුකරු ධුරය වෙනස් කර ඇති ආකාරය සම්බන්ධයෙන් ක්රිකට් ක්ෂේත්රය තුළ දැඩි කතාබහක් සහ විවේචනාත්මක ස්වභාවයක් මතු වී තිබේ. ඒ මෙතෙක් එම ධුරය දැරූ ප්රවීණ පුහුණුකරුවෙකු වන අවිශ්ක ගුණවර්ධන එම තනතුරින් ඉවත් කර, ඒ වෙනුවට මෑතකදී ක්රීඩාවෙන් සමුගත් අශාන් ප්රියංජන් පත් කිරීමට ගත් තීරණයත් සමඟය.
මෙම වෙනස්කම සම්බන්ධයෙන් ක්රිකට් ලෝලීන් පමණක් නොව, විචාරකයන් ද ප්රශ්න කරන්නේ ජාතික කණ්ඩායමට ක්රීඩකයන් සපයන ප්රධානතම මූලාශ්රය වන ‘ඒ’ කණ්ඩායම සඳහා මෙතරම් අඩු පුහුණු අත්දැකීම් සහිත පුද්ගලයෙකු පත් කිරීමේ පදනම කුමක්ද යන්නයි.
ජෙරොම් ජයරත්නගේ තර්කය
ශ්රී ලංකා ක්රිකට් ආයතනයේ ක්රිකට් අධ්යක්ෂ ජෙරොම් ජයරත්න පවසන පරිදි, මෙම වෙනස සිදු කර ඇත්තේ නවමු චින්තනයක් (Fresh thinking) කණ්ඩායමට එක් කිරීමේ අරමුණිනි. අවිශ්ක ගුණවර්ධන වසර කිහිපයක් තිස්සේ මෙම ධුරයේ කටයුතු කළ ද, පසුගිය වසර පහක කාලය තුළ ‘ඒ’ කණ්ඩායමේ සිට ජාතික කණ්ඩායම දක්වා ක්රීඩකයන් ප්රවේශ වීමේ (Graduation) අගය ප්රතිශතයක් ලෙස සැලකිය යුතු තැනක නොමැති බව ඔහු පෙන්වා දෙයි.
“අපට අවශ්ය වන්නේ තරඟ ජයග්රහණය කරනවාට වඩා ජාතික කණ්ඩායමට අවශ්ය ක්රීඩකයන් නිර්මාණය කිරීමයි. අශාන් ප්රියංජන් වයසින් බාල වුවත්, ඔහු දැනටමත් ක්රීඩකයන් බිහි කිරීමේ හැකියාව පෙන්වා තිබෙනවා,” යනුවෙන් ජයරත්න සඳහන් කරයි.
කෙසේ වෙතත්, අවිශ්ක ගුණවර්ධන යටතේ ‘ඒ’ කණ්ඩායම ස්ථාවර දක්ෂතා දැක්වූයේය. අවිශ්ක යනු විනය සහ මානසික ශක්තිය සම්බන්ධයෙන් ප්රකට පුහුණුකරුවෙකි. එවැනි පසුබිමක ඔහුව 19න් පහළ කණ්ඩායමට යොමු කිරීම බොහෝ දෙනා දකින්නේ ඔහුගේ තනතුර පහත හෙළීමක් (Demotion) ලෙසය.
අශාන් ප්රියංජන්ගේ අභියෝගය
36 හැවිරිදි අශාන් ප්රියංජන් පසුගිය වසරේදී පළමු පෙළ ක්රිකට් ක්රීඩාවෙන් සමුගත් අයෙකි.
ඔහු 2008 වසරේ මැලේසියාවේ පැවති ICC අවුරුදු 19න් පහළ ක්රිකට් ලෝක කුසලානයේදී ශ්රී ලංකා කණ්ඩායමේ නායකත්වය දැරුවේ අශාන්ය. ඔහු 2013 දෙසැම්බර් 25 වන දින පාකිස්තානයට එරෙහිව එක්දින ජාත්යන්තර (ODI) වරම් ලබා ගත්තේය. එක්දින තරඟ 23කට සහ විස්සයි20 ජාත්යන්තර (T20I) තරඟ 3කට ශ්රී ලංකාව වෙනුවෙන් ක්රීඩා කළේය. එක්දින තරග වලදී එහිදී අර්ධ ශතක 2ක් වාර්තා කළේය.
දේශීය ක්රිකට් පිටියේ කොළඹ ක්රිකට් සමාජය (CCC) ඇතුළු විවිධ කණ්ඩායම් නියෝජනය කර ඇති අතර, ශ්රී ලංකා ‘ඒ’ කණ්ඩායමේ නිත්ය සාමාජිකයෙක් ලෙස ක්රීඩා කර තිබුණු ඉතිහාසයක් ඇත. බොහෝ කාලයක් ශ්රී ලංකා ඒ කණ්ඩායමේ ක්රීඩා කිරීම එම කණ්ඩායමේ පුහුණුකාර තනතුරට සුදුසුකමක් වන්නේ නැත. ශ්රී ලංකා ඒ කණ්ඩායමේ පුහුණුකාර තනතුර සදහා පත්වීමට ඔහු සතුව සතුව ඇති ප්රධානම සුදුසුකම ලෙස පෙනෙන්නේ ඉතා කෙටි කාලයක් කොළඹ ක්රිකට් සමාජයේ (CCC) ප්රධාන පුහුණුකරු ලෙස කටයුතු කර තිබීම පමණය.
මේ ඇත්ත ස්වරූපය විසින් පෙන්නුම් කරන්නේ පියවරින් පියවර යා යුතු ගමනක් ඔහුව එක්වර ඔසවා තබා ඇති ආකාරය ය. ජාත්යන්තර මට්ටමේ ‘ඒ’ කණ්ඩායමක් මෙහෙයවීමට අවශ්ය පුහුණු අත්දැකීම් ඔහු සතුද යන්න පිළිබඳව දැන් ක්රිකට් ක්ෂේත්රය තුළ ප්රශ්න කෙරෙමින් ඇත.
නව පත්වීමත් සමඟ අශාන් ප්රියංජන්ට සහාය නිලධාරීන් මණ්ඩලයක් හිමිව ඇත:
- සචිත් පතිරණ: දඟපන්දු පුහුණුකරු
- මනෝජ් අබේවික්රම සහ උපුල් චන්දන: පන්දු රැකීමේ පුහුණුකරුවන්
- රුමේෂ් රත්නායක: වේගපන්දු පුහුණුකරු
- චාමර සිල්වා: පිතිකරණ පුහුණුකරු
- අනුෂ සමරනායක: වේගපන්දු පුහුණුකරු (ජාතික සහ ‘ඒ’ කණ්ඩායම් දෙකටම)
මෙම පුහුණුකරුවන් සියලු දෙනා ජාතික කණ්ඩායමේ උපදේශක පීටර් කර්ස්ටන් සමඟ සමීපව කටයුතු කරනු ඇත. ක්රිකට් අධ්යක්ෂවරයා පවසන පරිදි, ක්රීඩකයන් 40ක සංචිතයක් පවත්වාගෙන යන අතර ඉන් ප්රධාන 20 දෙනා ජාතික පුහුණුකරු යටතේ ද, ඉතිරි 20 දෙනා අශාන් ප්රියංජන් යටතේ ද පුහුණු වීමට නියමිතය.
අවිශ්ක ගුණවර්ධනගේ භූමිකාව
අවිශ්ක ගුණවර්ධන යනු ශ්රී ලංකා ක්රිකට් ක්ෂේත්රයේ ගෞරවයට පාත්ර වූ චරිතයකි. 1998 සිට 2006 දක්වා ශ්රී ලංකාව වෙනුවෙන් ටෙස්ට් තරඟ 6කට සහ එක්දින තරඟ 61කට ක්රීඩා කර ඇති ඔහු, එක්දින ලකුණු 1,708ක් ලබාගෙන ඇත. පුහුණුකරුවෙකු ලෙස SSC කණ්ඩායම අඛණ්ඩව වාර 9ක් මෙහෙයවීම ඔහුගේ පළපුරුද්දට කදිම නිදසුනකි.
2016 සිට ‘ඒ’ කණ්ඩායම සමඟත්, 2017 දී ජාතික කණ්ඩායමේ පිතිකරණ පුහුණුකරු ලෙසත් කටයුතු කළ ඔහු, තරුණ ක්රීඩකයන් ජාත්යන්තර මට්ටමට ඔසවා තැබීමට මහත් වෙහෙසක් ගත් අයෙකි. ඔහු දැන් නැවතත් 19න් පහළ කණ්ඩායම භාරව කටයුතු කරන අතර, ඔහු සමඟ ඕමේෂ් විජේසිරිවර්ධන සහ දිල්රුවන් පෙරේරා සහාය පුහුණුකරුවන් ලෙස කටයුතු කරනු ඇත.
ක්ෂේත්රයේ විවේචන
විවේචකයන් පවසන්නේ ජාතික කණ්ඩායමට ක්රීඩකයන් ප්රවේශ නොවීම සම්බන්ධයෙන් පුහුණුකරුට පමණක් චෝදනා කළ නොහැකි බවය. එය තේරීම් කමිටුවේ තීරණ සහ ජාතික කණ්ඩායමේ කළමනාකාරිත්වයේ අවශ්යතාව මත තීරණය වන්නකි. එබැවින්, දක්ෂතා පෙන්වූ පළපුරුදු පුහුණුකරුවෙකු ඉවත් කර, පුහුණුකාර ක්ෂේත්රයට ආධුනිකයෙකු වන ප්රියංජන් පත් කිරීම අවදානම් සහගත පියවරක් බව බොහෝ දෙනාගේ මතයයි.
ප්රියංජන් 2008 වසරේ 19න් පහළ ලෝක කුසලානයේදී ශ්රී ලංකා කණ්ඩායම මෙහෙයවූ නායකයෙකු වුවද, ජාත්යන්තර පුහුණුකාරීත්වයේදී අත්දැකීම් බහුල අවිශ්ක ගුණවර්ධන සමඟ සැසඳීමේදී ඔහු සිටින්නේ පසුපසිනි.
මෙම නව පත්වීම් සමඟ ශ්රී ලංකා ‘ඒ’ කණ්ඩායමේ ඉදිරි ගමන කෙබඳු වේදැයි ඉදිරි තරඟාවලි හරහා තීරණය වනු ඇත.
