නිසැකවම ඔවුන් මේ තරගාවලිය තුළ විශිෂ්ටය. ඔස්ට්රේලියාව සමග තමන් ලද ජයග්රහණය හුදු අහම්බයක් නොවන ආකාරය අද සිම්බාව්වේ කණ්ඩායම ආර්. ප්රේමදාස අන්තර්ජාතික ක්රීඩාංගනයේ දී ප්රකට කළහ. ඒ ශ්රී ලංකා කණ්ඩායම අමතක නොවන ආකාරයේ ප්රහාරයක් එල්ල කර කඩුළු 06ක විශිෂ්ඨ ජයග්රහණයක් වාර්තා කරමිනි. ඔවුන් සිහි කරන්නේ 96 ලෝක කුසලානය ජයග්රහණය කිරීමට ශ්රී ලංකා කණ්ඩායම ගිය ගමනය.
ශ්රී ලංකා ක්රීඩකයෝ දක්ෂ ලෙස ක්රීඩා කළහ. ඔවුහු ලකුණු 179ක ඉලක්කයක් සිම්බාබ්වේ කණ්ඩායමට ලබා දුන්හ. සිම්බාබ්වේ ක්රීඩකයෝ සෑම අතින්ම ශ්රී ලංකා කණ්ඩායමට වඩා ඉදිරියෙන් හිඳිමින් විශිෂ්ඨ ජයග්රහණයක් වාර්තා කළහ.
තේරුම් ගත යුත්තේ සිම්බාබ්වේ කණ්ඩායම තවදුරටත් කුඩා කණ්ඩායමක් නොවන බවය. ලෝක කුසලානයකට හිමිකම් කිව හැකි මට්ටමේ පරිචයක්, කණ්ඩායම් එකමුතුවක්, සටන්කාමීත්වයක් සහ නිවැරදි විද්යාත්මක ප්රවේශයකින් යුතුව තරග කළමනාකරණය කිරීමක් සහිත පරිනත ක්රීඩාවක් කරන සම්භාවනීය ක්රීඩා පරිචයක් සහිත සමූහයක තමන්ද කොටස්කරුවන් බව සිම්බාව්වේ කණ්ඩායම අද ලෝකයට තහවුරු කළේය.
ශ්රි ලංකා ඉනිම
කාසියේ වාසිය දිනුවේ ශ්රී ලංකා පිලය. ඔවුහු පළමුව පන්දුවට පහරදීම තේරූහ. ආරම්භක පිතිකරුවන් යුගලය ආර්. ප්රේමදාස පිටියේ වේගවත් ස්වභාවයෙන් උපරිම ප්රයෝජන ගැනීමට උත්සාහ කළහ. පළමු පන්දුවාර හය තුළ සිම්බාබ්වේ වේග පන්දු යවන්නන්ට එරෙහිව එල්ල කළ දැවැන්ත ප්රහාරයක් ඔවුන් විසින් දියත් කළේය. පළමු කඩුල්ල ලෙස කුසල් ජනිත් පෙරේරා දැවී යනවිට පන්දු ඕවර 05කි. ලකුණු 54කි. කුසල් දැවී යන්නේ ලකුණු 22කට ය. ඔහු ලකුණු 22 ලබන්නේ පන්දු 14ක් තුළය.
කෙසේ වෙතත්, ඉනිමේ මැද භාගයේදී තරගයේ පාලනය ශ්රී ලංකාවෙන් ගිලිහී ගියේය. සිම්බාබ්වේ දඟපන්දු යවන්නන් සහ වේගය අඩාල කළ පන්දු යවන්නන් ආර්. ප්රේමදාස තණතීරුවේ මන්දගාමී බව උපරිමයෙන් ප්රයෝජනයට ගත්හ. මෙම අවධියේදී ලකුණු රැස් කිරීමේ වේගය පාලනය වූවා පමණක් නොව, පීඩනය දරාගත නොහැකි වූ ශ්රී ලංකා මැද පෙළ පිතිකරුවන් අනවශ්ය පහරවල් සඳහා ගොස් සිය විකට්ටු පූජා කරන අයුරු දැකගත හැකි විය. පන්දුවාර 10ක් පුරා එකදු හතරේ පහරක් හෝ වාර්තා කිරීමට ශ්රී ලංකා පිතිකරුවන්ට ඉඩ නොදුන් සිම්බාබ්වේ පන්දු යවන්නන් ඇති කළ පීඩනය යම් තරමකට බිඳ දැම්මේ අවසන් ඕවරයේ දී දුනිත් වෙල්ලාගේ විසිනි.
දෙවැනි කඩුල්ල වෙනුවෙන් පැතුම් නිශ්ශංක සහ කුසල් මෙන්ඩිස් අතර ලකුණු 46ක සබඳතාවයක් ගොඩනැගිනි. කෙසේ වෙතත් අප දකින්නේ කුසල් මෙන්ඩිස් විසින් ලකුනු සොයා යෑමට නැවත වරක් කරන අරගලයකි. ඔහු පන්දු 20ක දී ලබා ගන්නේ ලකුණු 14ක් පමණි. එකම හතරේ පහරක් හෝ හයේ පහරක් ඔහුගේ ඉනිම තුළ දක්නට ලැබුනේ නැත.
තරගයේ ශ්රී ලංකා පිල වෙනුවෙන් හොඳම පිතිකරණය අදත් වාර්තා කළේ පැතුම් ය. පැතුම් පන්දු 41ක් තුළ ලකුනු 62ක් ලැබුවේය. ඒ හතරේ පහර 08ක් සමගිනි. යලිත් වරක් පවන් රත්නායක තමන්ගේ භූමිකාව හරියටම කළේය. පැතුම් නිශ්ශංක, දැවී ගිය පසු ඒ අන්තයෙන් පෙරහරක් සේ කඩුළු වැටෙද්දී පවන් හුදකලා සටනක නිරත විය. කමිඳු මෙන්ඩිස් ලකුණු 07කි. දසුන් ශානක යළිත් අසාර්ථකය. ඔහු ලකුණු 06කි. දුසාන් හේමන්ත දැවී යන්නේ ලකුණු නොලබාය. අවසාන ඕවරයේ ලකුනු 10ක් ලබා ගනිමින් දුනිත් වෙල්ලාලගේ පන්දු 08ක දී ලකුණු 15ක් නොදැවී ලැබුවේය. සිම්බාබ්වේ කණ්ඩායමට ශ්රී ලංකාව ලබා දුන් ඉලක්කය ලකුණු 178කි.
බ්ලෙසින් මුසරබානි ලකුණු 38කට කඩුළු 02ක්, බ්රෙඩ් එවන්ස් ලකුණු 35කට කඩුළු 02ක්, ග්රේම් ක්රීමර් ලකුණු 27ට කඩුළු 02ක්, රයන් බුරී ලකුණු 16කට කඩුල්ලක් ලැබුවේය.
සිම්බාබ්වේ හඹා යෑම
ලකුණු 179ක ඉලක්කයක් හඹා යෑමට පිටියට පිවිසි සිම්බාබ්වේ ආරම්භක පිතිකරුවන් මුල සිටම ඉතා ඉවසීමෙන් සහ උපායමාර්ගිකව ඉනිම ගොඩනැගූහ. ආර්. ප්රේමදාස පිටියේ සවස් භාගයේ දී පන්දුව දඟකැවීමට ඇති ඉඩකඩ හඳුනාගත් ඔවුන්, ශ්රී ලංකා දඟපන්දු යවන්නන්ට අනවශ්ය අවදානමක් ලබා නොදී තනි ලකුණු සහ දෙකේ ලකුණු කරා යොමු වූහ.
ශ්රී ලංකා කණ්ඩායම පළමු සිම්බාබ්වේ කඩුල්ල දවා ගන්නේ නව වැනි පන්දු ඕවරයේ 3 වැනි පන්දුවේ දී ය. තාදිවනාෂේ මරුමනී හතරේ පහර 5ක් එක් හයේ පහරක් සමග පන්දු 26ක දී ලකුණු 34ක් ලබා සිටිය දී දුනිත් වෙල්ලාලගේ හමුවේ දැවී යන්නේය. දෙවැනි කඩුල්ල දැවී යන්නේ 12 වැනි ඕවරයේ දී ය. රයන් බුරී පන්දු 12ක් තුළ හයේ හතරේ පහර දෙකක් සහ හයේ පහරක් සමග ලකුණු 23ක් ලබා සිටයිදීය.
මේ සියල්ල ඉදිරියේ එක් අන්තයක් ආරක්ෂා කරගනිමින් සෙමින් මෙන්ම ස්ථාවරව ඉනිම ගොඩ නගමින් බ්රයන් බෙනට් රැඳී සිටියේය. ශ්රී ලංකා පන්දු යවන්නන් පීඩනය එල්ල කිරීමට උත්සාහ කළද, පන්දුවට පහර දුන් පිතිකරුවන් පන්දුව පතිත වන ස්ථානය මැනවින් හඳුනාගෙන පාලනයකින් යුතුව ලකුණු රැස් කිරීම කැපී පෙනුණි.
තරගයේ තීරණාත්මක අවසන් පන්දුවාර කිහිපය තුළ ජයග්රහණය සඳහා අවශ්ය ලකුණු වේගය ඉහළ ගියේය. නායක සිකන්දර් රාසා නායකයෙක් සතු වගකීම කුමක්දැයි හරියටම පෙන්වා දුන්නේය. ඔහු හයේ පහර 04ක් සහ හතරේ පහර දෙකක් සමග පන්දු 26ක දී ලකුණු 45ක් ලබමින් කණ්ඩායම ජයග්රහණයේ එළිපත්තේ රැඳෙව්වේය.
සිම්බාබ්වේ පිතිකරණය හමුවේ එල්ල වුන පීඩනය අසල ශ්රී ලංකා පන්දු රකින්නන් බුල් කෙළින්නට පටන් ගත්තේය. සිබ්බාවේ පිතිකරුවෝ අවසන් පන්දුවාරයේදී ඉතා සන්සුන්ව ජයග්රාහී සීමාව පසු කළහ. ජයග්රහණය තෙක් රැඳී සිටි බ්රයන් බෙනට් නොදැවී ලකුණු 63ක් ලැබුවේය. ඒ හතරේ පහර 08ක් සමගින් පන්දු 48ක් තුළය.
අවසානයේ දී පන්දු 03ක් ඉතිරිව තිබිය දී සිම්බාබ්වේ කණ්ඩායම කඩුළු 06කින් දිනුම්ය. තරගයේ වීරයා කණ්ඩායම නියමිත මොහොතේ ජයග්රහණයේ එළිපත්තට රැගෙන එන්නට දැවැන්ත ප්රහාරයක් එලල කරමින් පන්දු 26ක දී ලකුණු 45ක් ලබා ගත් සිම්බාබ්වේ නායක සිකන්දර් රාසාය.
ඔස්ට්රේලියා කණ්ඩායමේ අනපේක්ෂිත විසිවී යෑම
අද මැච් එකක් දිනාගෙන කප්පරක් පරදින සුපුරුදු රටාව තුළ ශ්රී ලංකා කණ්ඩායම ගිලී යන විට ඔස්ට්රේලියාවට එරෙහිව තමන් ලද ජයග්රහණය අහම්බයක් නොවන බව සිම්බාබ්වේ ක්රීඩකයින් කළ තහවුරුව මේ තරගාවලියේ දී තැබූ විශේෂම සලකුණ ලෙස යළිත් ලියා තැබිය යුතුය.
2026 අයි.සී.සී. පිරිමි විස්සයි-විස්ස ලෝක කුසලාන තරගාවලියේ ‘B’ කාණ්ඩයේ මූලික වටයේ තරග නිමාවට පත්වන විට, සිම්බාබ්වේ සහ ශ්රී ලංකාව සුපිරි අට දෙනාගේ (Super Eight) වටය සඳහා සුදුසුකම් ලබා ගැනීමට සමත්ව තිබේ.
මෙහි වඩාත්ම කැපී පෙනෙන සිදුවීම වන්නේ ප්රබල ඔස්ට්රේලියානු කණ්ඩායම තරගාවලියෙන් ඉවතට විසිවීමය. සිම්බාබ්වේ හමුවේ ලැබූ අනපේක්ෂිත පරාජය සහ ශ්රී ලංකාව හමුවේ කඩුලු 8ක අන්ත පරාජයක් ලැබීම ඔස්ට්රේලියාවේ ඉරණම තීරණය කළේය. . මූලික වටය අවසානයේ ශ්රී ලංකාව ජයග්රහණ 3ක් සමඟ ප්රසාද ලකුණු 6ක් ලබා දෙවැනි ස්ථානය දිනා ගනිමින් ඉදිරි වටයට පිවිසීමට සමත් වූයේය. තුන්වන තැන අයර්ලන්තය ය. ඔස්ට්රේලියානු කණ්ඩායම සිටින්නේ සිවු වන ස්ථානයේ ය.
කාණ්ඩයේ ප්රමුඛයා අපරාජිත ගමනක නිරත වූ සිම්බාබ්වේ කණ්ඩායමය. ඔවුන් අද (19) පැවැති තීරණාත්මක අවසන් මූලික තරගයෙන් ශ්රී ලංකාව කඩුලු 6කින් පරාජය කරමින් ප්රසාද ලකුණු 7ක් ලබා කාණ්ඩයේ පෙරමුණ ගැනීමට සමත් වීය. අයර්ලන්තය සමඟ පැවැති තරගය වර්ෂාව නිසා අතහැර දැමීමෙන් හිමිවූ ප්රසාද ලකුණ ද සමඟින් සිම්බාබ්වේ කණ්ඩායම සිය ආධිපත්යය තහවුරු කර ගත්තේය. සිම්බාබ්වේ ලබන මේ ආකර්ශනීය ක්රිකට් පරිචය දෙස ක්රීඩා ලෝලීන් ලෙස අප බලා සිටින්නේ මහත් වූ ආනන්දයකින් බව ද ලියා තැබිය යුතුය.
