ශ්රී ලංකා මෝටර් රථ ධාවන පථයේ ළාබාලතම ධාවන ශූර 17 හැවිරිදි කේසර ගොඩගේ ඉන්දියාවේ ජාත්යන්තර මෝටර් රථ ශූරතාවලියක ජයග්රහණ ත්රිත්වයක් වාර්තා කිරීමට සමත් විය.
ඉන්දියාවේ චෙන්නායි නුවර ‘මැඩ්රාස් ජාත්යන්තර ධාවන පථයේදී පෙරේදා නිමාවට පත්වූ ඉන්දීය ජාතික මෝටර් රථ ශූරතාවලියේදී ඉන්දියාවේ ප්රබල තරගකරුවන් අබිබවා MRF Saloons කාණ්ඩයේ තරග ත්රිත්වයම ජය ගනිමින් ඔහු මේ දස්කම පෑ අතර, එය ශ්රී ලාංකික මෝටර් රථ ධාවන ශූරයකු ඉන්දියාවේ පෙන්නුම් කළ ඉහළම ජයග්රහණය ද වේ.
එම කාණ්ඩය යටතේ පැවැති වට 8කින් සමන්විත පළමු තරගයේදී එම තරග කාණ්ඩයේ හිටපු ශූරියක වන පූනේ නුවර ඩයනා පුන්ඩෝල් දෙවැනි ස්ථානයට පත්වූ අතර, ශ්රී ලාංකික තරගකරු කලිම් ඉක්බාල් තුන්වැනි ස්ථානය අත්කර ගත්තේය.
වට 10කින් සමන්විත දෙවැනි තරගයේදී චෙන්නායි නුවර අනිරුද් අරවින්ද් දෙවැනි ස්ථානයට පත්වූ අතර, චික්කමගලූරු නුවර තරගකාරිනියක වූ තරුෂි වික්රම් තුන්වැනි තැන දිනා ගත්තාය.
වට 8කින් සමන්විත තුන්වැනි තරගයේදී චෙන්නායි නුවර අනිරුද් අරවින්ද් දෙවැනි ස්ථානයත්, පූනේ නුවර තරගකාරිනියක වූ ඩයනා පුන්ඩෝල් තුන්වැනි ස්ථානයත් දිනා ගත්හ.
‘MRF MMSC FMSCI INDIAN NATIONAL CAR RACING CHAMPIONSHIP – 2024‘ තුන්වැනි වටයේ තරගාවලිය ලෙස පැවැති එම තරගාවලියට ඉන්දියාවේ ප්රබලතම ධාවන ශූරයන් රැසක් තරග වැදිණි. එම තරගාවලියේ සිව්වැනි තරග වටය ලබන අගෝස්තුවේ මැද භාගයේදී එම ධාවන පථයේදීම පැවැත්වීමට නියමිතය.
